പിണറായിയിൽ റീൽസ് ചിത്രീകരണത്തിനിടെ സിപിഎം പ്രവർത്തകൻ്റെ കൈപ്പത്തി തകർന്ന സംഭവം: പൊട്ടിയത് ചെറിയ പടക്കമല്ലെന്ന് സൂചന നൽകുന്ന ദൃശ്യങ്ങൾ പുറത്ത്

കണ്ണൂർ: (KVARTHA) പിണറായി വെണ്ടുട്ടായിയിൽ സി.പി.എം പ്രവർത്തകൻ്റെ കൈയിലിരുന്ന് സ്ഫോടകവസ്തു പൊട്ടിത്തെറിച്ച സംഭവത്തിൻ്റെ കൂടുതൽ ദൃശ്യങ്ങൾ പുറത്തുവന്നു. ചൊവ്വാഴ്ച ഉച്ചയ്ക്ക് രണ്ട് മണിയോടെ കനാൽക്കരയിൽ നടന്ന സ്ഫോടനത്തിൽ പരിക്കേറ്റ സി.പി.എം പ്രവർത്തകൻ വിപിൻ രാജിൻ്റെ കൈപ്പത്തി തകരുന്ന ദൃശ്യങ്ങളാണ് ഇപ്പോൾ പുറത്തായിരിക്കുന്നത്.

സോഷ്യൽ മീഡിയ റീൽസ് ചിത്രീകരണത്തിനിടെയാണ് സ്ഫോടകവസ്തു പൊട്ടിത്തെറിച്ചതെന്നാണ് വിപിൻ രാജ് പോലീസിന് നൽകിയ പ്രാഥമിക മൊഴി. വിപിൻ രാജിൻ്റെ ബന്ധു മൊബൈൽ ഫോണിൽ പകർത്തിയ ദൃശ്യങ്ങളാണ് നിലവിൽ പുറത്തുവന്നിരിക്കുന്നത്. അല്പം വലിയ രൂപത്തിലുള്ള സ്ഫോടകവസ്തുവാണ് വിപിൻ രാജിൻ്റെ കൈയിലിരുന്ന് പൊട്ടിത്തെറിച്ചതെന്നാണ് ദൃശ്യങ്ങളിൽ നിന്ന് വ്യക്തമാകുന്നത്.

സ്ഫോടനത്തിൽ വിപിൻ രാജിൻ്റെ വലത് കൈപ്പത്തി തകരുകയും വിരലുകൾ ചിന്നിച്ചിതറുകയും ചെയ്തിട്ടുണ്ട്. സംഭവത്തിന് പിന്നാലെ, പൊട്ടിയത് സാധാരണ ഓലപ്പടക്കമാണെന്ന് സി.പി.എമ്മും പോലീസും വിശദീകരിച്ചിരുന്നു.

അനധികൃതമായി നിർമ്മിച്ച സ്ഫോടകവസ്തുവാണ് വിപിൻ രാജ് കൈകാര്യം ചെയ്തതെന്ന ആരോപണമാണ് ഉയരുന്നത്. രാഷ്ട്രീയ എതിരാളികളെ ഭീഷണിപ്പെടുത്താനായി നിർമ്മിച്ച വസ്തുവാണിതെന്ന സംശയവും രാഷ്ട്രീയ കേന്ദ്രങ്ങളിൽ ഉയർന്നിട്ടുണ്ട്. സി.പി.എം റെഡ് വളൻ്റിയർ കൂടിയായ വിപിൻ രാജ് സോഷ്യൽ മീഡിയയിൽ സജീവമാണ്. നേരത്തെ കോൺഗ്രസ് ഓഫീസ് ആക്രമിച്ചതുൾപ്പെടെയുള്ള വിവിധ അക്രമ കേസുകളിൽ ഇയാൾ പ്രതിയാണെന്ന് പോലീസ് വൃത്തങ്ങൾ അറിയിച്ചു.

സംഭവത്തിൽ സ്ഫോടകവസ്തു അശ്രദ്ധമായി കൈകാര്യം ചെയ്തെന്ന വകുപ്പ് ചുമത്തിയാണ് പിണറായി പോലീസ് കേസ്സെടുത്തിരിക്കുന്നത്. ഫോറൻസിക് വിദഗ്ധർ സ്ഥലത്തെത്തി ശേഖരിച്ച സാമ്പിളുകളുടെ രാസപരിശോധനാ ഫലം ഇതുവരെ പുറത്തുവന്നിട്ടില്ല. അനധികൃതമായ സ്ഫോടകവസ്തു വിപിൻ രാജിന് എവിടെ നിന്ന് ലഭിച്ചുവെന്ന കാര്യത്തിൽ അന്വേഷണം പുരോഗമിക്കുകയാണെന്ന് പോലീസ് വ്യക്തമാക്കി.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ താഴെ രേഖപ്പെടുത്തൂ. ഷെയർ ചെയ്യൂ.

Article Summary: Video visuals of Pinarayi explosion show high intensity explosives; CPM worker injured during Reels shoot.

#PinarayiExplosion #KannurNews #CPM #KeralaPolice #ExplosionVisuals #ReelsAccident