അഴീക്കോട് മീൻകുന്നിൽ വീട്ടുപറമ്പിൽ അതിക്രമിച്ചുകയറി വളർത്തുപ്രാവുകളെ കൂട്ടത്തോടെ വെട്ടിക്കൊന്നെന്ന് പരാതി

കണ്ണൂർ: (KVARTHA) വളപട്ടണം പോലീസ് സ്റ്റേഷൻ പരിധിയിലെ അഴീക്കോട് മീൻകുന്നിൽ വീട്ടുപറമ്പിൽ അതിക്രമിച്ചുകയറി വളർത്തുപ്രാവുകളെ കൂട്ടത്തോടെ വെട്ടിക്കൊന്നെന്ന് പരാതി. മീൻകുന്ന് വലിയപറമ്പിലെ സി. അനുരാഗിന്റെ (23) വീട്ടിലാണ് അതിക്രമം നടന്നത്. മുൻവൈരാഗ്യത്തെ തുടർന്നാണ് അക്രമമെന്നാണ് പോലീസിന്റെ പ്രാഥമിക നിഗമനം.

പ്രാവുകളെ കൊന്നൊടുക്കി

ബുധനാഴ്ച പുലർച്ചെയാണ് അക്രമം നടന്നതെന്നാണ് പോലീസ് സംശയിക്കുന്നത്. അനുരാഗിന്റെ വീടിന്റെ പിറകിലെ വലിയ കൂടുകളിൽ അമ്പതോളം പ്രാവുകളെ വളർത്തിയിരുന്നു. ഇതിൽ മുപ്പതോളം പ്രാവുകളെയാണ് അക്രമി സംഘം വെട്ടിക്കൊന്ന നിലയിൽ കണ്ടെത്തിയത്. വീടിന് ഗേറ്റില്ലാത്തത് അക്രമികൾക്ക് വീട്ടുപറമ്പിൽ എളുപ്പത്തിൽ പ്രവേശിക്കാനും കൃത്യം നടത്തിയ ശേഷം രക്ഷപ്പെടാനും സാധിച്ചുവെന്ന് കരുതുന്നു.

രാവിലെ എട്ടു മണിയോടെയാണ് പ്രാവുകൾ ചത്തുകിടക്കുന്നത് വീട്ടുകാരുടെ ശ്രദ്ധയിൽപ്പെട്ടത്. നാട്ടുകാർ അറിയിച്ചതിനെ തുടർന്ന് വളപട്ടണം പോലീസ് സ്ഥലത്തെത്തി അന്വേഷണം ആരംഭിച്ചു. അഞ്ചോളം പേർ അടങ്ങുന്ന സംഘമാണ് അക്രമത്തിന് പിന്നിലെന്നാണ് പുറത്തുവരുന്ന വിവരം.

പശ്ചാത്തലം

പ്രാവുകളെ വിറ്റതുമായി ബന്ധപ്പെട്ട തർക്കവും മർദ്ദനവുമാണ് പുതിയ അക്രമത്തിന് കാരണമെന്ന് പോലീസ് സംശയിക്കുന്നു. 2026 ഫെബ്രുവരി 22 ഞായറാഴ്ച ഉച്ചയ്ക്ക് 12.30 മണിയോടെ വളർത്താൻ കൊടുത്ത നാല് പ്രാവുകളെ മറ്റൊരാൾക്ക് വില്പന നടത്തിയത് ചോദ്യം ചെയ്തതിന്റെ പേരിൽ എം. സച്ചിന് മർദ്ദനമേറ്റ സംഭവമുണ്ടായിരുന്നു. പ്രാവിന്റെ പണം നൽകാമെന്ന് പറഞ്ഞ് സച്ചിനെ ഒന്നാം പ്രതിയുടെ വീട്ടിലേക്ക് വിളിച്ചുവരുത്തി വീട്ടു മുറ്റത്തുവെച്ച് കൈകൊണ്ടും ഇരുമ്പ് പൈപ്പുകൊണ്ടും ആക്രമിച്ചുവെന്നാണ് പരാതി.

തുടർ മർദ്ദനവും ഭീഷണിയും

ഞായറാഴ്ച രാത്രി 8.30 മണിയോടെ സ്കൂട്ടറിൽ പോകുകയായിരുന്ന സച്ചിനെ അഴീക്കോട് മീൻകുന്ന് സ്വാമിമഠം റോഡിൽ വെച്ച് പ്രതികൾ തടഞ്ഞുനിർത്തി ഇരുമ്പുവടികൊണ്ട് തലക്കും താടിക്കും അടിച്ച് പരിക്കേൽപ്പിക്കുകയും കേസ് കൊടുത്താൽ കൊല്ലുമെന്ന് ഭീഷണിപ്പെടുത്തുകയും ചെയ്തുവെന്ന് പരാതിയിൽ പറയുന്നു. പരിക്കേറ്റ യുവാവ് നിലവിൽ പരിയാരത്തെ കണ്ണൂർ ഗവ. മെഡിക്കൽ കോളേജ് ആശുപത്രിയിൽ ചികിത്സയിലാണ്.

ഈ സംഭവത്തിൽ സച്ചിന്റെ പരാതിയുടെ അടിസ്ഥാനത്തിൽ അഴീക്കോട് മീൻകുന്ന് വലിയപറമ്പിലെ അനുരാഗ്, അനുവിന്ദ് എന്നിവർക്കെതിരെ വളപട്ടണം പോലീസ് കേസെടുത്തിരുന്നു. ഈ കേസിൽ അന്വേഷണം നടന്നുവരുന്നതിനിടെയാണ് ബുധനാഴ്ച പുലർച്ചെ അനുരാഗിന്റെ വീട്ടിലെ പ്രാവുകളെ വെട്ടിക്കൊന്ന നിലയിൽ കണ്ടെത്തിയത്. കേസിൽ പോലീസ് ഊർജ്ജിതമായ അന്വേഷണം തുടരുകയാണ്.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Around 30 pet pigeons were brutally hacked to death by trespassing into a house compound in Azhikode Meenkunn, Kannur. Police suspect that the attack was a fallout of a prior enmity related to a dispute over selling pigeons, which had previously led to a youth being assaulted.

#KannurNews #AnimalCruelty #CrimeNews #KeralaPolice #Azhikode #KVARTHA