തിരുവനന്തപുരം: (KVARTHA) ഹേമ കമ്മിറ്റി റിപ്പോർട്ടിലെ (Hema Committee Report) കണ്ടെത്തലുകളുടെ അടിസ്ഥാനത്തിൽ സിനിമയിലെ ലൈംഗിക അതിക്രമങ്ങളെക്കുറിച്ച് പോക്‌സോ കേസ് (POCSO) എടുക്കണമെന്ന ആവശ്യവുമായി സാമൂഹിക പ്രവർത്തക പി.ഇ.ഉഷ (P E Usha) ആഭ്യന്തര വകുപ്പിന് പരാതി നൽകി. അൽത്തിയ സ്ത്രീ കൂട്ടായ്മയ്ക്കു വേണ്ടിയാണ് പരാതി നൽകിയിരിക്കുന്നത്.

റിപ്പോർട്ടിലെ 41-ാം പേജിലെ 82-ാം ഖണ്ഡികയിലെ വിവരങ്ങൾ ചൂണ്ടിക്കാട്ടിയാണ് പരാതി. ഈ ഖണ്ഡികയിൽ പെൺകുട്ടികൾക്കും സ്ത്രീകൾക്കും സിനിമയിൽ നേരിടേണ്ടി വന്ന ലൈംഗിക അതിക്രമങ്ങളെക്കുറിച്ച് വിവരിക്കുന്നുണ്ട്. ഇത് പോക്‌സോ നിയമത്തിൽ വരുന്ന കുറ്റകൃത്യങ്ങളുടെ പരിധിയിൽ വരുന്നതാണെന്ന് പി.ഇ.ഉഷ വ്യക്തമാക്കി.

പോക്‌സോ നിയമത്തിന്റെ 19 (1) വകുപ്പ് പ്രകാരം ഇത്തരം വിവരം ലഭിച്ചാൽ പൊലീസ് കേസെടുക്കേണ്ടതാണ്. അതിനാൽ ഈ കേസിൽ പൊലീസ് അന്വേഷണം നടത്തണമെന്നും ഇരകളുടെ സ്വകാര്യത സംരക്ഷിക്കണമെന്നും പരാതിയിൽ ആവശ്യപ്പെട്ടു.

കലാരംഗത്തെ സ്ത്രീകൾക്ക് സുരക്ഷിതമായ അന്തരീക്ഷം ഒരുക്കുന്നതിനും ഇത്തരം നടപടികൾ അനിവാര്യമാണെന്ന് പി.ഇ.ഉഷ പറഞ്ഞു. ഹൈക്കോടതി മുൻ ജഡ്ജിയുടെ നേതൃത്വത്തിലുള്ള കമ്മിറ്റി നടത്തിയ അന്വേഷണത്തിന്റെ അടിസ്ഥാനത്തിൽ ഉണ്ടായ റിപ്പോർട്ടാണിത്. അതിനാൽ ഈ റിപ്പോർട്ടിലെ കണ്ടെത്തലുകളുടെ അടിസ്ഥാനത്തിൽ സർക്കാർ ഉടൻ നടപടിയെടുക്കണമെന്നും പരാതിയിൽ ആവശ്യപ്പെട്ടു.

#HemaCommitteeReport #POCSOAct #MalayalamFilmIndustry #WomenSafety #India #FilmIndustry #JusticeForSurvivors