പയ്യന്നൂരിലെ ഒന്നര വയസ്സുകാരന്റെ മരണം: അനസ്തീഷ്യ നൽകേണ്ട സാഹചര്യം ഇല്ലായിരുന്നുവെന്ന് പോസ്റ്റ്മോർട്ടം റിപ്പോർട്ട്

പയ്യന്നൂർ: (KVARTHA) ഒന്നര വയസ്സുകാരൻ ദേവാൻഷ് ശൗര്യയുടെ മരണത്തിൽ നിർണായക വിവരങ്ങളുമായി പ്രാഥമിക പോസ്റ്റ്മോർട്ടം റിപ്പോർട്ട്. കുട്ടിക്ക് അനസ്തീഷ്യ നൽകേണ്ട യാതൊരു സാഹചര്യവും നിലവിലില്ലായിരുന്നുവെന്നാണ് റിപ്പോർട്ടിലെ പ്രധാന കണ്ടെത്തൽ. സംഭവത്തിൽ പയ്യന്നൂർ ബേബി മെമ്മോറിയൽ ആശുപത്രിയിലെ മൂന്ന് ഡോക്ടർമാരെ ചോദ്യം ചെയ്യാൻ പോലീസ് ഒരുങ്ങുകയാണ്.

പോലീസ് അന്വേഷണം തുടരുന്നു

ചികിത്സാ രേഖകൾ മെഡിക്കൽ ബോർഡ് പരിശോധിച്ച ശേഷം തുടർ നടപടികളിലേക്ക് കടക്കാനാണ് പോലീസ് തീരുമാനം. അനസ്തീഷ്യ നൽകിയ ഡോക്ടർക്ക് പുറമെ, പീഡിയാട്രീഷ്യൻ, പ്ലാസ്റ്റിക് സർജൻ എന്നിവരെയാണ് പോലീസ് ചോദ്യം ചെയ്യാൻ വിളിപ്പിച്ചിരിക്കുന്നത്.

രണ്ട് ദിവസത്തിനകം ഡോക്ടർമാർ ചോദ്യം ചെയ്യലിന് ഹാജരാകണമെന്ന് ആശുപത്രി മാനേജ്മെന്റിന് പോലീസ് നിർദേശം നൽകിയിട്ടുണ്ട്. മൂന്ന് ഡോക്ടർമാരുടെയും ഫോണുകൾ നിലവിൽ സ്വിച്ച് ഓഫ് ആണെന്ന് പോലീസ് അറിയിച്ചു. പയ്യന്നൂർ ഡിവൈഎസ്പിയുടെ നേതൃത്വത്തിലാണ് അന്വേഷണം പുരോഗമിക്കുന്നത്.

ആശുപത്രി മാനേജ്മെന്റിനെതിരെ പ്രതിഷേധം

ചികിത്സാ പിഴവ് ആരോപണത്തിൽ നിന്നും ഒഴിഞ്ഞുമാറാൻ ആശുപത്രി മാനേജ്മെന്റ് ശ്രമിക്കുന്നതായി ആക്ഷേപമുണ്ട്. കുറ്റം ഡോക്ടർമാരിൽ ചുമത്തി മാനേജ്മെന്റ് രക്ഷപ്പെടാൻ ശ്രമിക്കുന്നതിൽ ഡോക്ടർമാർക്കിടയിൽ കടുത്ത പ്രതിഷേധമുണ്ട്. ആശുപത്രിയിലെ ചില ഡോക്ടർമാർ സോഷ്യൽ മീഡിയയിലൂടെ രാജിക്കാര്യം പ്രഖ്യാപിച്ചിട്ടുണ്ട്. 

അനസ്തീഷ്യ നൽകി കുട്ടിയെ പ്ലാസ്റ്റിക് സർജറിക്ക് വിധേയമാക്കേണ്ട കാര്യമില്ലായിരുന്നുവെന്ന് ഡോക്ടർമാർക്കിടയിൽ തന്നെ അഭിപ്രായമുയർന്നിട്ടുണ്ട്. രോഗികളെ ചൂഷണം ചെയ്ത് കൊള്ളലാഭം കൊയ്യാനുള്ള മാനേജ്മെന്റിന്റെ സമ്മർദ്ദമാണ് ഒന്നര വയസ്സുകാരന്റെ ജീവൻ നഷ്ടപ്പെടാൻ കാരണമായതെന്ന വിമർശനവും ശക്തമാണ്.

ഈ വാർത്ത നിങ്ങളുടെ വാട്സാപ്പ് ഗ്രൂപ്പുകളിൽ ഷെയർ ചെയ്യുക. പുതിയ വാർത്തകൾക്കായി ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: The preliminary post-mortem report regarding the death of 1.5-year-old Devansh Shaurya in Payyannur states that there was no medical necessity for anesthesia. 

#Payyannur #DevanshShaurya #MedicalNegligence #KeralaNews #BabyMemorialHospital #PoliceInvestigation #AmmuNews