വിദ്യാർത്ഥികളെ തട്ടിക്കൊണ്ടുപോയി ക്രൂരമായി മർദിച്ച സംഭവം: ട്രെയിനി അധ്യാപകൻ്റെ കൂട്ടാളികളായ രണ്ടുപേർ പിടിയിൽ

പഴയങ്ങാടി: (KVARTHA) പയ്യന്നൂർ ഗവൺമെൻ്റ് ബോയ്സ് ഹയർ സെക്കൻഡറി സ്കൂളിലെ വിദ്യാർത്ഥികളെ തട്ടിക്കൊണ്ടുപോയി ക്രൂരമായി മർദിച്ച കേസിൽ കൗമാരക്കാരൻ ഉൾപ്പെടെ രണ്ടുപേർ പോലീസിൻ്റെ പിടിയിലായി. 

ആദിശേഷനെ (18) എസ്.ഐ. കെ. സുഹൈൽ അറസ്റ്റ് ചെയ്തു. ഇയാളെ കോടതിയിൽ ഹാജരാക്കി റിമാൻഡ് ചെയ്തു. കേസിൽ ഉൾപ്പെട്ട കൗമാരക്കാരനെ നോട്ടീസ് നൽകി വിട്ടയച്ചതായും പോലീസ് അറിയിച്ചു.

സംഭവത്തിലെ മുഖ്യപ്രതിയായ സ്കൂളിലെ ട്രെയിനി അധ്യാപകൻ ലിജോ ജോൺ നിലവിൽ ഒളിവിലാണ്. ഇയാൾക്കായി അന്വേഷണം ഊർജിതമാക്കിയതായി പോലീസ് വ്യക്തമാക്കി. 

സ്കൂളിലെ ബി.എഡ് പരിശീലനത്തിൻ്റെ ഭാഗമായി ജോലി ചെയ്തിരുന്ന ലിജോ ജോണും കൂട്ടാളികളും ചേർന്നാണ് വിദ്യാർത്ഥികളെ ആക്രമിച്ചതെന്ന് പരാതിയിൽ പറയുന്നു. പയ്യന്നൂർ സ്കൂളിലെ പ്ലസ് ടു വിദ്യാർത്ഥികളായ തൃക്കരിപ്പൂർ സ്വദേശികൾക്കാണ് ക്രൂരമർദനമേറ്റത്.

ഡിസംബർ ഒൻപത് ചൊവ്വാഴ്ച വൈകുന്നേരം 6.30 ഓടെ മാടായി വാടിക്കൽ പുഴക്കരയിൽ വെച്ചായിരുന്നു അക്രമം നടന്നത്. ഡിസംബർ അഞ്ച് വെള്ളിയാഴ്ച സ്കൂളിൽ നിന്നും ടൂർ പോയ സമയത്ത് അടിമാലിയിൽ വെച്ച് പെൺകുട്ടികളോടൊപ്പം ഡാൻസ് ചെയ്യുന്നതിനിടെ പ്രതി വിദ്യാർത്ഥിനികളോട് അപമര്യാദയായി പെരുമാറിയെന്ന് ആരോപണമുണ്ട്. ഇക്കാര്യം വിദ്യാർത്ഥികൾ പ്രിൻസിപ്പാളിനോട് പരാതിപ്പെട്ടതിലെ വിരോധമാണ് ആക്രമണത്തിന് കാരണമായതെന്ന് പോലീസ് പറയുന്നു.

വിദ്യാർത്ഥികളെ വാടിക്കൽ പുഴക്കരയിലേക്ക് തട്ടിക്കൊണ്ടുപോയി ഇരുമ്പുവടികൊണ്ടും മരവടികൊണ്ടും ആക്രമിച്ചെന്നാണ് പരാതി. പരാതിക്കാരനായ വിദ്യാർത്ഥിക്കൊപ്പമുണ്ടായിരുന്ന മറ്റു രണ്ട് പേർക്കും ആക്രമണത്തിൽ പരിക്കേറ്റു. 

മട്ടലുകൊണ്ടും മരവടികൊണ്ടും ഇവരെ പ്രതികൾ മർദിച്ചതായി മൊഴിയുണ്ട്. പരിക്കേറ്റ വിദ്യാർത്ഥികൾ തൃക്കരിപ്പൂരിലെ സ്വകാര്യ ആശുപത്രിയിൽ ചികിത്സ തേടിയിരുന്നു.

ജാമ്യമില്ലാ വകുപ്പുകൾ പ്രകാരമാണ് പ്രതികൾക്കെതിരെ കേസ് രജിസ്റ്റർ ചെയ്തിരിക്കുന്നത്. കേസിൽ ലിജോ ജോണിനെ കൂടാതെ മറ്റൊരാൾ കൂടി പിടിയിലാകാനുണ്ടെന്നും അവർക്കായി തെരച്ചിൽ തുടരുകയാണെന്നും പഴയങ്ങാടി പോലീസ് അറിയിച്ചു.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായം താഴെ കമൻ്റ് ചെയ്യൂ.

Article Summary: Police arrested two accomplices of a trainee teacher for assaulting students in Payyannur.

#Payyannur #StudentAssault #PazhayangadiPolice #KeralaNews #CrimeNews #SchoolSafety