പയ്യന്നൂരിൽ ഒരേ വീട്ടിൽ അഞ്ചാം തവണയും മോഷണം; കള്ളനെ കൊണ്ടു തോറ്റ വീട്ടുടമ ഇനി വീട് പൂട്ടേണ്ടെന്ന് തീരുമാനിച്ചു

കണ്ണൂർ: (KVARTHA) പയ്യന്നൂരിൽ ദേശീയ പാതയോരത്തെ വീട്ടിൽ തുടർച്ചയായി മോഷണം നടക്കുന്നതായി പരാതി. അഞ്ച് തവണയും വീടിന്റെ മുൻവാതിൽ കുത്തിത്തുറന്ന് മോഷണം നടന്നതോടെ, ഇനി വീട് പൂട്ടാതെ തുറന്നിടാൻ തീരുമാനിച്ചിരിക്കുകയാണ് വീട്ടുടമസ്ഥൻ. പയ്യന്നൂർ വെള്ളൂർ സ്കൂൾ സ്റ്റോപ്പിന് സമീപത്തെ റിട്ട. പ്രൊഫസർ ആർ. സത്യനാഥന്റെ തറവാട്ടു വീട്ടിലാണ് അഞ്ചാമതും കള്ളൻ കയറിയത്.

നിത്യസന്ദർശകനായി കള്ളൻ

2002-ലാണ് ഈ വീട്ടിൽ ആദ്യമായി മുൻവാതിൽ പൊളിച്ച് മോഷണം നടന്നത്. അന്ന് സ്വർണവും പണവും നഷ്ടപ്പെട്ടിരുന്നു. തുടർന്ന് രണ്ടാമതും മുൻവാതിൽ പൊളിച്ച് കള്ളൻ കയറി പണം അപഹരിച്ചു. മോഷണശല്യം കാരണം കുടുംബം പിലാത്തറയിലേക്ക് താമസം മാറിയെങ്കിലും കള്ളന്റെ ശല്യം തുടരുകയായിരുന്നു. 

പിന്നീട് വാടകക്കാർ താമസിച്ച സമയത്ത് ശലഭമില്ലായിരുന്നെങ്കിലും അവർ ഒഴിഞ്ഞുപോയ ദിവസം തന്നെ വീണ്ടും മോഷണം നടന്നതായി പറയപ്പെടുന്നു. കള്ളനെ പിടികൂടാൻ ഉടമ സിസിടിവി സ്ഥാപിച്ചെങ്കിലും അടുത്ത തവണ എത്തിയ കള്ളൻ അതും കവർന്നതായാണ് വിവരം.

വാതിൽ പൂട്ടേണ്ടെന്ന് വീട്ടുടമ

ഞായറാഴ്ച ഉച്ചയ്ക്ക് പറമ്പിൽ വെള്ളം നനയ്ക്കാൻ എത്തിയ ആളാണ് വീടിന്റെ മുൻവാതിൽ വീണ്ടും പൊളിച്ച നിലയിൽ കണ്ടത്. ഓരോ തവണയും വാതിൽ അറ്റകുറ്റപ്പണി നടത്തുന്നതിനായി വൻതുക ചെലവാകുന്നുണ്ടെന്നും ഇനി വാതിൽ മാറ്റുകയല്ലാതെ വഴിയില്ലെന്നും ആശാരി നിർദ്ദേശിച്ചതോടെയാണ് വീട് പൂട്ടേണ്ടെന്ന് ഉടമ തീരുമാനിച്ചത്. വീട് ഇനി പൂട്ടാതെ രാപ്പകൽ തുറന്നിടാൻ പറമ്പ് നോക്കി നടത്തുന്നയാൾക്ക് അദ്ദേഹം നിർദ്ദേശം നൽകി.

പോലീസിന് നാണക്കേട്

മുമ്പ് നാലുതവണ മോഷണം നടന്നപ്പോഴും പയ്യന്നൂർ പോലീസിൽ പരാതി നൽകിയിരുന്നെങ്കിലും പ്രതിയെ കണ്ടെത്താൻ സാധിച്ചിട്ടില്ലെന്ന് ആക്ഷേപമുണ്ട്. അഞ്ചാമതും മോഷണം നടന്നതോടെ പോലീസ് അന്വേഷണം ഊർജിതമാക്കിയിട്ടുണ്ട്. തുടർച്ചയായ മോഷണങ്ങൾ നടന്നിട്ടും പ്രതിയെ പിടികൂടാൻ കഴിയാത്തത് പോലീസിന്റെ ഭാഗത്തുനിന്നുള്ള വീഴ്ചയാണെന്ന് നാട്ടുകാർക്കിടയിൽ സംസാരമുണ്ട്.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: A retired professor in Payyannur decided to leave his house unlocked after being robbed five times, as the cost of door repairs exceeded the stolen amounts.

#PayyannurNews #Theft #KeralaPolice #Burglar #Vellur #Justice #PoliceFailure #ViralNews #KVARTHA