രക്തസാക്ഷി ഫണ്ട് വിവാദം: പയ്യന്നൂരിൽ കോൺഗ്രസ്-സിപിഎം ഏറ്റുമുട്ടൽ; എംഎൽഎയുടെ രാജി ആവശ്യപ്പെട്ടുള്ള പ്രകടനം അക്രമാസക്തമായി

കണ്ണൂർ: (KVARTHA) സി.പി.എം കണ്ണൂർ ജില്ലാ കമ്മിറ്റിയംഗം വി. കുഞ്ഞികൃഷ്ണൻ നടത്തിയ വെളിപ്പെടുത്തലുകൾക്ക് പിന്നാലെ പയ്യന്നൂരിൽ രാഷ്ട്രീയ സംഘർഷം രൂക്ഷമാകുന്നു. രക്തസാക്ഷി ഫണ്ട് തിരിമറിയുമായി ബന്ധപ്പെട്ട് ആരോപണ വിധേയനായ പയ്യന്നൂർ എം.എൽ.എ ടി.ഐ മധുസൂദനൻ സ്ഥാനം രാജിവയ്ക്കണമെന്ന് ആവശ്യപ്പെട്ട് കോൺഗ്രസ് നടത്തിയ പ്രതിഷേധ പ്രകടനം തെരുവ് യുദ്ധത്തിൽ കലാശിച്ചു.

സംഘർഷം ഇങ്ങനെ

പയ്യന്നൂർ ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ പയ്യന്നൂർ നഗരത്തിൽ നടന്ന പ്രതിഷേധ പ്രകടനത്തിനിടെയാണ് സംഘർഷമുണ്ടായത്. പ്രകടനത്തിൽ കോൺഗ്രസ് പ്രവർത്തകർ പ്രകോപനപരമായ മുദ്രാവാക്യങ്ങൾ വിളിച്ചുവെന്ന് ആരോപിച്ച് സി.പി.എം പ്രവർത്തകർ രംഗത്തുവന്നതോടെയാണ് സ്ഥിതിഗതികൾ വഷളായത്. തുടർന്ന് ഇരുവിഭാഗവും തമ്മിൽ ഏറ്റുമുട്ടലമുണ്ടായി. സംഘർഷത്തിൽ പയ്യന്നൂർ ബ്ലോക്ക് കോൺഗ്രസ് കമ്മിറ്റി പ്രസിഡന്റ് ജയരാജൻ ഉൾപ്പെടെ മൂന്ന് പേർക്ക് പരിക്കേറ്റു.

റോഡ് ഉപരോധം

സമാധാനപരമായി പ്രകടനം നടത്തുകയായിരുന്ന തങ്ങളെ സി.പി.എം പ്രവർത്തകർ അക്രമിക്കുകയായിരുന്നുവെന്ന് കോൺഗ്രസ് നേതാക്കൾ ആരോപിച്ചു. അക്രമം കൺമുന്നിൽ കണ്ടിട്ടും പൊലീസ് നടപടിയെടുത്തില്ലെന്ന് ആരോപിച്ച് കോൺഗ്രസ് പ്രവർത്തകർ സെൻട്രൽ ബസാർ റോഡ് ഉപരോധിച്ചു. പിന്നീട് പൊലീസ് ഇടപെട്ട് പ്രതിഷേധക്കാരെ നീക്കം ചെയ്ത ശേഷമാണ് ഇതുവഴിയുള്ള ഗതാഗതം പുനഃസ്ഥാപിക്കപ്പെട്ടത്.

കെ.പി.സി.സി പ്രസിഡന്റിന്റെ പ്രതികരണം

ധൻരാജ് രക്തസാക്ഷി ഫണ്ട് തട്ടിപ്പ് നടത്തിയ ടി.ഐ മധുസൂദനൻ എം.എൽ.എ സ്ഥാനം രാജിവെക്കണമെന്ന് ആവശ്യപ്പെട്ട് കോൺഗ്രസ് പ്രവർത്തകർ നടത്തിയ പ്രകടനത്തിന് നേരെ സി.പി.എം പ്രവർത്തകർ നടത്തിയ ആക്രമണം പ്രതിഷേധാർഹമാണെന്ന് കെ.പി.സി.സി പ്രസിഡന്റ് സണ്ണി ജോസഫ് എം.എൽ.എ പറഞ്ഞു.

‘രക്തസാക്ഷി ഫണ്ട് വെട്ടിപ്പിൽ നിന്നുള്ള ജനശ്രദ്ധ തിരിക്കാനുള്ള ഗൂഢനീക്കമാണ് ഈ ആക്രമണം. സി.പി.എം മുൻ ഏരിയാ സെക്രട്ടറി പി. കുഞ്ഞികൃഷ്ണൻ നടത്തിയ വെളിപ്പെടുത്തലിലൂടെ സി.പി.എമ്മിന്റെ ജീർണ്ണതയാണ് തുറന്നുകാട്ടപ്പെട്ടത്. ഇതിലെ ജാള്യതയാണ് സി.പി.എമ്മിനെ അക്രമത്തിന് പ്രേരിപ്പിക്കുന്നത്,’ സണ്ണി ജോസഫ് പറഞ്ഞു.

രക്തസാക്ഷി കുടുംബത്തോടും അണികളോടും സി.പി.എമ്മിന് അൽപ്പമെങ്കിലും ആത്മാർത്ഥതയുണ്ടെങ്കിൽ രക്തസാക്ഷി ഫണ്ട് വെട്ടിപ്പ് നടത്തിയ പ്രതികളെ നിയമത്തിന് വിട്ടുകൊടുക്കുകയാണ് വേണ്ടതെന്നും കോൺഗ്രസ് പ്രവർത്തകരെ ആക്രമിച്ച മുഴുവൻ സി.പി.എമ്മുകാരായ പ്രതികളെയും അറസ്റ്റ് ചെയ്യണമെന്നും അദ്ദേഹം ആവശ്യപ്പെട്ടു.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായങ്ങൾ കമൻ്റ് ചെയ്യു

Article Summary: A protest march by Congress demanding the resignation of Payyannur MLA T.I. Madhusoodanan over martyr fund embezzlement allegations turned violent, leading to a clash with CPM workers. Three people, including the Congress Block President, were injured.

#Payyannur #Kannur #Politics #CPM #Congress #Clash #MartyrFund #KeralaNews