പാലക്കാട്: (KVARTHA) പുതുപ്പെരിയാരത്ത് 29 കാരിയെ ദുരൂഹ സാഹചര്യത്തില്‍ ഭർതൃവീട്ടിൽ മരിച്ച നിലയിൽ കണ്ടെത്തി. മാട്ടുമന്ത ചോളോട് സ്വദേശിനി മീരയാണ് (29) മരിച്ചത്. മരണത്തിന് ഉത്തരവാദി ഭർത്താവ് അനൂപാണെന്ന് ആരോപിച്ചുകൊണ്ട് യുവതിയുടെ കുടുംബം പോലീസിൽ പരാതി നൽകിയിട്ടുണ്ട്. സംഭവത്തിൽ കേസെടുത്ത് അന്വേഷണം ആരംഭിച്ചതായി പോലീസ് അറിയിച്ചു.

മരിച്ച മീരയുടെ ബന്ധു ഡെയ്‌സി അനിൽകുമാർ പോലീസിന് നൽകിയ മൊഴിയിൽ പറയുന്നത് പ്രകാരം, തിങ്കളാഴ്ച ഭർത്താവ് അനൂപുമായി വഴക്കുണ്ടായതിനെ തുടർന്ന് മീര സ്വന്തം വീട്ടിലേക്ക് വന്നിരുന്നു. പിന്നീട്, ചൊവ്വാഴ്ച രാത്രി 11 മണിയോടെ ഭർത്താവ് അനൂപ് വീട്ടിലെത്തി സംസാരിച്ച് മീരയെ തിരികെ കൂട്ടിക്കൊണ്ടുപോയി. ഇതിന് പിന്നാലെയാണ് മീര മരിച്ചതെന്ന് ബന്ധുക്കൾ പറയുന്നു.

ബുധനാഴ്ച രാവിലെയാണ് മീരയുടെ മരണവിവരം വീട്ടുകാർ അറിയുന്നത്. മരണവിവരം തങ്ങളെ അറിയിച്ചത് പോലീസാണെന്നും, മീരയെ ആശുപത്രിയിൽ എത്തിച്ചപ്പോൾ അവിടെ ഭർത്താവോ ഭർതൃവീട്ടുകാരോ ഉണ്ടായിരുന്നില്ലെന്നും ഡെയ്‌സി പോലീസിന് മൊഴി നൽകിയിട്ടുണ്ട്. ഭർത്താവ് അനൂപ് മദ്യപിച്ചെത്തി മീരയെ നിരന്തരം ഉപദ്രവിക്കാറുണ്ടായിരുന്നതായും, ഈ വിവരം മീര തങ്ങളോട് അടുത്തിടെയാണ് പറഞ്ഞതെന്നും കുടുംബാംഗങ്ങൾ ആരോപിച്ചു.

വളരെ മനക്കരുത്തുള്ള യുവതിയാണ് മീരയെന്നും, ആദ്യ വിവാഹത്തിൽ ഉപേക്ഷിച്ചുപോയ ഭർത്താവിനു ശേഷം സ്വന്തം മകളെ വളർത്തി വളരെ ആത്മധൈര്യത്തോടെ ജീവിച്ച മീര ഒരിക്കലും ജീവനൊടുക്കില്ലെന്നും ഡെയ്‌സി പോലീസിനോട് പറഞ്ഞു. മീരയുടെ രണ്ടാം വിവാഹമായിരുന്നു ഇത്. കുടുംബത്തിന്റെ പരാതിയുടെ അടിസ്ഥാനത്തിൽ ഭർത്താവ് അനൂപിനെ കസ്റ്റഡിയിലെടുത്ത് ചോദ്യം ചെയ്യുമെന്നും, തുടർനടപടികൾ സ്വീകരിക്കുമെന്നും പോലീസ് അറിയിച്ചു.

ഗാർഹിക പീഡനക്കേസുകൾ കൈകാര്യം ചെയ്യുന്നതിൽ പോലീസ് കൂടുതൽ ജാഗ്രത പാലിക്കണമെന്ന് നിങ്ങൾ കരുതുന്നുണ്ടോ? കമന്റ് ചെയ്യൂ.

Young woman was found dead at her in-laws' house in Palakkad; her family alleges domestic abuse and foul play.

#KeralaCrime #Palakkad #DomesticAbuse #SuspiciousDeath #CrimeNews #PoliceInvestigation