ഡോക്ടറെ കബളിപ്പിച്ച് കോടികൾ തട്ടിയെടുത്ത കേസ്: മുഖ്യപ്രതി എറണാകുളത്ത് നിന്ന് പിടിയിലായി

മട്ടന്നൂർ: (KVARTHA) ഓൺലൈൻ ഷെയർ ട്രേഡിങ്ങിന്റെ മറവിൽ മട്ടന്നൂരിലെ പ്രമുഖ ഡോക്ടറിൽ നിന്ന് 4.43 കോടി രൂപ തട്ടിയെടുത്ത കേസിലെ മുഖ്യപ്രതി അറസ്റ്റിൽ. ഓൺലൈൻ ഷെയർ വ്യാപാരത്തിലൂടെ ലാഭമുണ്ടാക്കാമെന്ന് വിശ്വസിപ്പിച്ച് ഡോക്ടറിൽ നിന്ന് നാല് കോടി 43 ലക്ഷം രൂപ തട്ടിയെടുത്ത കേസിലെ മുഖ്യപ്രതിയായ സൈനുൽ ആബിദിനെ (43) കണ്ണൂർ സൈബർ സ്റ്റേഷൻ പോലീസ് അറസ്റ്റ് ചെയ്യുകയായിരുന്നു. 

സൈബർ സ്റ്റേഷൻ പോലീസ് ഇൻസ്‌പെക്ടർ മഹേഷ് കണ്ടമ്പേത്തിന്റെ നിർദേശാനുസരണം സൈബർ ക്രൈം പോലീസാണ് പ്രതിയെ പിടികൂടിയത്. ഇതോടെ ഈ കേസിൽ അറസ്റ്റിലായ പ്രതികളുടെ എണ്ണം മൂന്നായി. കണ്ണൂർ റേഞ്ച് ഡി.ഐ.ജി. യതീഷ് ചന്ദ്രയുടെ നേതൃത്വത്തിൽ സിറ്റി പോലീസ് കമ്മീഷണർ നിധിൻരാജ്, അഡീഷണൽ എസ്.പി. സജേഷ് വാഴവളപ്പിൽ, ക്രൈംബ്രാഞ്ച് ഡിവൈ.എസ്.പി. എം.ടി. ജേക്കബ്, സൈബർ ക്രൈം പോലീസ് എന്നിവരടങ്ങിയ സംഘമാണ് കേസ് അന്വേഷിക്കുന്നത്.

എസ്.ഐ.മാരായ പ്രജീഷ് ടി.പി., എ.എസ്.ഐ. പ്രകാശൻ വി.വി., സി.പി.ഒ. സുനിൽ കെ., സീനിയർ സി.പി.ഒ. ജിതിൻ സി. എന്നിവരടങ്ങിയ സംഘമാണ് പ്രതിയെ എറണാകുളത്ത് നിന്ന് പിടികൂടിയത്. തുടർന്ന് ഇയാളെ കോടതിയിൽ ഹാജരാക്കി റിമാൻഡ് ചെയ്തു. 

നേരത്തെ ഓൺലൈൻ ഷെയർ ട്രേഡ് തട്ടിപ്പ് കേസിലെ പ്രതികളായ ബാഷ, റിജാസ് എന്നിവരെ പോലീസ് അറസ്റ്റ് ചെയ്തിരുന്നു. ഇവരിൽനിന്ന് ലഭിച്ച വിവരങ്ങളുടെ അടിസ്ഥാനത്തിലാണ് സൈനുൽ ആബിദ് അറസ്റ്റിലായത്.

പ്രതി മൊബൈൽ ഫോൺ ഉപയോഗിക്കാത്തത് അന്വേഷണസംഘത്തിന് വലിയ വെല്ലുവിളിയായിരുന്നു. ഇയാളെ തേടി ഇയാളുടെ വീട്ടിൽ പലതവണ പോയെങ്കിലും കണ്ടെത്താനായില്ല. ഒടുവിൽ ഇയാളുടെ വീടിരിക്കുന്ന പ്രദേശത്ത് മഫ്തിയിൽ രാവും പകലും ക്യാമ്പ് ചെയ്താണ് പോലീസ് പ്രതിയെ പിടികൂടിയത്.

ഓൺലൈൻ തട്ടിപ്പുകളെക്കുറിച്ച് നിങ്ങൾക്കെന്തെങ്കിലും പറയാനുണ്ടോ? ഈ വാർത്തയെക്കുറിച്ച് നിങ്ങളുടെ അഭിപ്രായം കമന്റ് ചെയ്യുക.

Article Summary: Key suspect in a Rs 4.43 crore online trading scam arrested in Mattannur.

#OnlineScam #CyberCrime #Mattannur #PoliceArrest #ShareTradingFraud #KeralaPolice