ഗർഭിണിയായ ഭാര്യ ജീവനൊടുക്കിയതറിഞ്ഞു ദോഹയിൽ നിന്ന് നാട്ടിലേക്കു തിരിച്ച ഭർത്താവിനെ ബംഗ്ളൂരിൽ ലോഡ്ജിൽ മരിച്ച നിലയിൽ കണ്ടെത്തി 

ബംഗ്ളൂർ: (KVARTHA) ഗർഭിണിയായ ഭാര്യ ജീവനൊടുക്കിയതറിഞ്ഞു ദോഹയിൽ നിന്ന് നാട്ടിലേക്കു തിരിച്ച യുവാവിനെ മരിച്ച നിലയിൽ കണ്ടെത്തി. എടത്വ കൊടുപ്പുന്ന സ്വദേശി പി എസ് സനുകുട്ടനെയാണ് ബംഗ്ളൂരിൽ ലോഡ്ജിൽ മരിച്ച നിലയിൽ കണ്ടെത്തിയത്. ജൂലൈ 11 ശനിയാഴ്ചയാണ് സനുകുട്ടന്റെ ഭാര്യ മാവേലിക്കര ഉമ്പർനാട് പഴയതോപ്പിൽ ഹരീഷ്മയെ വീട്ടിൽ മരിച്ച നിലയിൽ കണ്ടെത്തിയത്. മരണ വിവരം അറിഞ്ഞ് ദോഹയിൽ നിന്നും നാട്ടിലേക്ക് തിരിച്ചതായിരുന്നു സനുകുട്ടൻ.

നെടുമ്പാശേരിയിൽ എത്തിയില്ല

മാർച്ച് മാസത്തിലായിരുന്നു ഇരുവരും വിവാഹിതരായത്. തുടർന്ന് ജൂൺ മാസത്തിലാണ് സനുകുട്ടൻ വിദേശത്തേക്ക് പോയത്. ദോഹയിൽ നിന്നും ബംഗ്ളൂരിൽ ഇറങ്ങിയ ശേഷം നെടുമ്പാശേരി വിമാനത്താവളത്തിൽ എത്തുമെന്നായിരുന്നു ഇയാൾ വീട്ടുകാരെ അറിയിച്ചത്.

ഇതനുസരിച്ച് ബന്ധുക്കൾ നെടുമ്പാശേരിയിൽ കാത്തുനിന്നെങ്കിലും സനുകുട്ടൻ എത്തിയില്ല. തുടർന്ന് ബംഗ്ളൂർ വിമാനത്താവളത്തിൽ അധികൃതരുമായി ബന്ധപ്പെട്ടപ്പോൾ സനുകുട്ടൻ അവിടെ ഇറങ്ങിയതായി ബന്ധുക്കൾക്ക് വിവരം ലഭിച്ചു.

അന്വേഷണത്തിനൊടുവിൽ ലോഡ്ജിൽ കണ്ടെത്തി

ഫോണിൽ ബന്ധപ്പെടാൻ സാധിക്കാത്തതിനെ തുടർന്ന് നടത്തിയ പരിശോധനയിലാണ് ലോഡ്ജ് മുറിയിൽ മരിച്ച നിലയിൽ കണ്ടെത്തുന്നത്. ബന്ധുക്കൾ മലയാളി അസോസിയേഷനുമായും പൊലീസുമായും ബന്ധപ്പെട്ടിരുന്നു.

ലോഡ്ജിൽ മലയാളിയെ മരിച്ചനിലയിൽ കണ്ടെത്തിയിട്ടുണ്ടെന്ന് പൊലീസ് അറിയിച്ചതോടെ ബന്ധുക്കളെത്തി സനുകുട്ടനാണെന്ന് സ്ഥിരീകരിക്കുകയായിരുന്നു. മൂന്നു മാസം ഗർഭിണിയായിരുന്നു ഹരീഷ്മ. ഹരീഷ്മയുടെ സംസ്കാരം മാവേലിക്കരയിൽ നടത്തി. സംഭവത്തിൽ പൊലീസ് കൂടുതൽ അന്വേഷണം നടത്തിവരികയാണ്.

ശ്രദ്ധിക്കുക: ആത്മഹത്യ ഒന്നിനും പരിഹാരമല്ല. മാനസിക ബുദ്ധിമുട്ടുകൾ ഉണ്ടാകുമ്പോൾ സഹായത്തിനായി ദിശ ഹെൽപ്പ് ലൈൻ നമ്പറായ 1056 ലോ 14416 ലോ വിളിക്കുക.

പുതിയ വാർത്തകൾക്കായി ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക.

Article Summary: A tragic incident unfolded as an expatriate youth, P S Sanukuttan from Edathua, was found dead in a lodge in Bengaluru while returning home from Doha after hearing the news of his wife' death.

#BengaluruNews #NRI #KeralaNews #TragicNews #Edathua #Mavelikkara #CrimeNews #AmmuNews