വടക്കൻ കേരളത്തിൽ വ്യാപക 'കോമ്പിങ് ഓപ്പറേഷൻ'; 159 വാറൻ്റ് പ്രതികൾ പിടിയിൽ, 606 ക്രിമിനൽ കേസുകൾ

കണ്ണൂർ: (KVARTHA) കണ്ണൂർ റേഞ്ച് ഡിഐജി കെ കാർത്തിക് ഐപിഎസിൻ്റെ നേതൃത്വത്തിൽ ജൂലൈ 11-ന് കണ്ണൂർ റേഞ്ചിലെ മുഴുവൻ പോലീസ് ജില്ലകളിലും (കോഴിക്കോട് സിറ്റി, കോഴിക്കോട് റൂറൽ, വയനാട്, കണ്ണൂർ സിറ്റി, കണ്ണൂർ റൂറൽ, കാസർകോട്) റേഞ്ച് തല സംയുക്ത പരിശോധനാ ഓപ്പറേഷൻ സംഘടിപ്പിച്ചു. 

കാപ്പ ലിസ്റ്റിൽപ്പെട്ടവർ, പിടികിട്ടാപ്പുള്ളികൾ, വാറൻ്റ് പ്രതികൾ എന്നിവരെ കണ്ടെത്തുക, കുറ്റവാളികൾ, മുൻ കുറ്റവാളികൾ, സാമൂഹ്യവിരുദ്ധർ എന്നിവരെ നിരീക്ഷിക്കുക, പ്രതിരോധ പോലീസിംഗ് ശക്തിപ്പെടുത്തുക എന്നിവയായിരുന്നു ഈ 'കോമ്പിങ് ഓപ്പറേഷൻ്റെ' പ്രധാന ലക്ഷ്യം.

പരിശോധനയുടെ പ്രധാന വിവരങ്ങൾ

അന്തർസംസ്ഥാന അതിർത്തികൾ, ബസ് സ്റ്റാൻഡുകൾ, റെയിൽവേ സ്റ്റേഷനുകൾ, ഹോട്ടലുകൾ, ലോഡ്ജുകൾ, ഹോംസ്റ്റേകൾ, ലഹരിമരുന്ന് വിൽപന നടക്കാൻ സാധ്യതയുള്ള സ്ഥലങ്ങൾ എന്നിവിടങ്ങളിൽ ഒരേസമയം പരിശോധന നടത്തി. മദ്യപിച്ച് വാഹനം ഓടിക്കുന്നവർ, ലഹരിവസ്തുക്കളുടെ കടത്ത് എന്നിവ കണ്ടെത്തുന്നതിനായി ട്രാഫിക് എൻഫോഴ്സ്മെൻ്റ് വിഭാഗം കർശനമായ വാഹന പരിശോധനയും നടത്തി. 

81 അതിർത്തി പരിശോധനാ കേന്ദ്രങ്ങൾ സ്ഥാപിക്കുകയും 937 അന്തർസംസ്ഥാന വാഹനങ്ങൾ ഉൾപ്പെടെ ആകെ 9,328 വാഹനങ്ങൾ പരിശോധിക്കുകയും ചെയ്തു. റേഞ്ചിലുടനീളം 260 മൊബൈൽ പട്രോളിംഗ് സംഘങ്ങളെ നിയോഗിച്ചു. 

452 ഹോട്ടലുകൾ, ലോഡ്ജുകൾ, ഹോംസ്റ്റേകൾ എന്നിവയും 164 ബസ് സ്റ്റാൻഡുകളും റെയിൽവേ സ്റ്റേഷൻ പരിസരങ്ങളും പരിശോധിച്ചു. കാപ്പ നിരീക്ഷണത്തിലുള്ള 38 പേരെയും പരിശോധനയ്ക്ക് വിധേയരാക്കി.

അറസ്റ്റും കേസുകളും

പരിശോധനയിൽ 21 ലോംഗ് പെൻഡിംഗ് വാറൻ്റ് പ്രതികളെയും 138 നോൺ-ബെയ്ലബിൾ വാറൻ്റ് പ്രതികളെയും അറസ്റ്റ് ചെയ്തു. 216 മുൻ കുറ്റവാളികളെയും നിരീക്ഷണത്തിലുള്ളവരെയും പരിശോധിച്ചു. 733 സാമൂഹ്യവിരുദ്ധരെയും സംശയാസ്പദമായ സാഹചര്യത്തിൽ കണ്ടവരെയും ചോദ്യം ചെയ്തു. 

മദ്യപിച്ച് വാഹനം ഓടിച്ചതിന് 229 കേസുകളും, 99 എൻഡിപിഎസ് കേസുകളും, മറ്റ് പ്രത്യേക നിയമപ്രകാരം 278 കേസുകളും രജിസ്റ്റർ ചെയ്തു. സ്വർണക്കടത്ത്, ഹവാല ഇടപാടുകളുമായി ബന്ധപ്പെട്ട് കേസുകളൊന്നും റിപ്പോർട്ട് ചെയ്തിട്ടില്ല. മൊത്തത്തിൽ 159 വാറൻ്റ് പ്രതികളെ അറസ്റ്റ് ചെയ്യുകയും 606 ക്രിമിനൽ കേസുകൾ രജിസ്റ്റർ ചെയ്യുകയും ചെയ്തു.

പ്രാദേശിക വിവരങ്ങൾ കുമ്പളയിലെ പ്രതി പിടിയിൽ

പൊതുജനങ്ങൾ തടിച്ചുകൂടുന്ന 32 റെയിൽവേ സ്റ്റേഷൻ, ബസ് സ്റ്റാൻഡ് പരിസരങ്ങളും പോലീസിൻ്റെ കർശന നിരീക്ഷണത്തിലായിരുന്നു. ഗുണ്ടാ നിയമ പ്രകാരം നിരീക്ഷണത്തിലുള്ള ഒൻപതു വ്യക്തികളുടെ വീടുകളിൽ പോലീസ് നേരിട്ടെത്തി പരിശോധന നടത്തി. മുൻകാല കുറ്റവാളികളും സാമൂഹിക വിരുദ്ധരുമായ 25 പേരെ പരിശോധിച്ചു. 

കാസർകോട് ജില്ലയിലെ ചന്തേര സ്റ്റേഷൻ പരിധിയിൽ നിന്ന് മാത്രം അഞ്ച് ലഹരികേസുകൾ പിടികൂടി. മദ്യപിച്ച് വാഹനമോടിച്ച 42 പേർക്കെതിരെ കേസെടുത്തു. സംശയാസ്പദമായ സാഹചര്യത്തിൽ കണ്ട് ചോദ്യം ചെയ്ത 80 പേർക്കെതിരെയും, മറ്റ് പ്രാദേശിക നിയമലംഘനങ്ങൾക്ക് 46 പേർക്കെതിരെയും നിയമനടപടികൾ സ്വീകരിച്ചു. 

കോമ്പിങ് ഓപ്പറേഷനിടെ കുമ്പള പോലീസ് സ്റ്റേഷനിലെ ലഹരി കേസിൽ ഒളിവിൽ കഴിഞ്ഞിരുന്ന പ്രതിയായ ടി എം സമീർ (39) എന്ന ലാവാ സമീറിനെ ഹൊസ്ദുർഗ് പോലീസ് പിടികൂടി.

ഡിഐജിയുടെ പ്രതികരണം

ക്രമസമാധാന നില തകർക്കുന്നവർക്കും ലഹരി മാഫിയകൾക്കുമെതിരെ ശക്തമായ നടപടികളുമായി മുൻപോട്ടു പോകുമെന്ന് കണ്ണൂർ റേഞ്ച് ഡിഐജി കെ കാർത്തിക് ഐപിഎസ് അറിയിച്ചു. 

കാപ്പ പ്രതികൾ, കുറ്റവാളികൾ, സംശയാസ്പദമായ വ്യക്തികൾ എന്നിവരെ പരിശോധിച്ചത് ഭാവിയിലെ പ്രതിരോധ പ്രവർത്തനങ്ങൾക്ക് സഹായകമാകും. കുറ്റവാളികളെ കണ്ടെത്താനും സാമൂഹ്യവിരുദ്ധരെ നിരീക്ഷിക്കാനും ഇത്തരം പരിശോധനകൾ തുടരുമെന്നും അദ്ദേഹം വ്യക്തമാക്കി.

ഈ വാർത്ത നിങ്ങളുടെ വാട്സാപ്പ് ഗ്രൂപ്പുകളിൽ ഷെയർ ചെയ്യുക. പുതിയ വാർത്തകൾക്കായി ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: A massive combing operation was conducted across all six police districts under the Kannur Range on July 11, led by Kannur Range DIG K. Karthik IPS. The operation aimed to track down KAAPA suspects, absconders, and warrant accused, and to curb drug trafficking. 

#KannurRange #KeralaPolice #CombingOperation #CrimeNews #KasaragodNews #DIGKKarthik #NDPS #KeralaNews #AmmuNews