നീലേശ്വരം: (KVARTHA) തെരു അഞ്ഞൂറ്റമ്പലം വീരർകാവ് ക്ഷേത്രത്തിൽ നടന്ന കളിയാട്ടത്തിനിടെ പടക്കശേഖരത്തിന് തീപ്പിടിച്ചുണ്ടായ അപകടവുമായി ബന്ധപ്പെട്ട കേസിൽ നീലേശ്വരം പൊലീസ് എട്ട് ക്ഷേത്ര ഭാരവാഹികൾക്കെതിരെ കൊലപാതകക്കുറ്റം ചുമത്തി. ഈ കേസുമായി ബന്ധപ്പെട്ട് പൊലീസ് തയ്യാറാക്കിയ പ്രഥമ വിവര റിപ്പോർട്ട് കോടതിയിൽ സമർപ്പിച്ചു.

ജാമ്യം ലഭിച്ചിരുന്ന എട്ട് പ്രതികൾക്കെതിരെ കഴിഞ്ഞ ദിവസം കോടതി അറസ്റ്റ് വാറണ്ട് പുറപ്പെടുവിച്ചു. മജിസ്ട്രേറ്റ് കോടതി അനുവദിച്ച ജാമ്യം റദ്ദാക്കിയാണ് ജില്ല സെഷൻസ് കോടതി ഈ ഉത്തരവ് നൽകിയത്. ജാമ്യക്കാരില്ലാത്തതിനാൽ ജയിലിൽ നിന്ന് പുറത്തിറങ്ങാൻ കഴിയാത്ത മറ്റൊരു പ്രതിയായ രാജേഷിനെ വിട്ടയക്കരുതെന്ന് കോടതി നിർദേശിച്ചു. കൂടാതെ, ജാമ്യത്തിലിറങ്ങിയ മറ്റു പ്രതികളായ ക്ഷേത്രഭാരവാഹികളെ കോടതിയിൽ ഹാജരാകാൻ നോട്ടീസ് അയച്ചു.

വ്യാഴാഴ്ച ജില്ല സെഷൻസ് കോടതി കേസ് പരിഗണിച്ചപ്പോൾ പ്രതികൾ ഹാജരായിരുന്നില്ല. ഇതിനെ തുടർന്നാണ് ഇവർക്കെതിരെ അറസ്റ്റ് വാറണ്ട് പുറപ്പെടുവിക്കാൻ കോടതി നിർദ്ദേശിച്ചത്. റിമാൻഡിലുള്ള മറ്റൊരു പ്രതിയായ വിജയൻ ജാമ്യാപേക്ഷ നൽകാൻ നീക്കം നടത്തുന്നതിനിടയിലാണ് ജില്ല സെഷൻസ് കോടതിയുടെ ഈ ഇടപെടൽ ഉണ്ടായത്.

ജാമ്യം ലഭിച്ച പ്രതികൾ പൊലീസിൽ കീഴടങ്ങാതെ ഹൈക്കോടതിയെ സമീപിക്കാൻ സാധ്യതയുണ്ടെന്നാണ് സൂചന. ഈ സാഹചര്യത്തിൽ പ്രതികളെ കണ്ടെത്തുന്നതിന് പൊലീസ് അന്വേഷണം തുടങ്ങി. അപകടത്തിൽ അഞ്ച് പേർ മരിക്കുകയും 149 പേർക്ക് പരുക്കേൽക്കുകയും ചെയ്‌തിരുന്നു.

 #Neeleswaram #FirecrackerAccident #MurderCharges #TempleOfficials #PoliceInvestigation #Kerala