അപകടത്തിൽ പരിക്കേറ്റ് മൊഴി നൽകാനെത്തിയ ആരോഗ്യപ്രവർത്തകരോട് നെടുങ്കണ്ടം പോലീസ് അപമര്യാദയായി പെരുമാറിയെന്ന് പരാതി; കേസെടുക്കാൻ വിസമ്മതിച്ചു

നെടുങ്കണ്ടം: (KVARTHA) വാഹനാപകടവുമായി ബന്ധപ്പെട്ട് മൊഴി നൽകാൻ സ്റ്റേഷനിലെത്തിയ ആരോഗ്യപ്രവർത്തകരോട് പോലീസ് അപമര്യാദയായി പെരുമാറിയെന്ന് പരാതി.

നെടുങ്കണ്ടം പോലീസ് സ്റ്റേഷനിലെ ഉദ്യോഗസ്ഥർക്കെതിരെയാണ് ഉടുമ്പൻചോല കുടുംബാരോഗ്യ കേന്ദ്രത്തിലെ ജീവനക്കാർ ആരോപണവുമായി രംഗത്തെത്തിയിരിക്കുന്നത്. അപകടത്തിൽ ഗുരുതരമായി പരിക്കേറ്റിട്ടും കേസെടുക്കാൻ പോലീസ് തയ്യാറായില്ലെന്നും ആരോപണമുണ്ട്.

കഴിഞ്ഞ ദിവസം ജോലി കഴിഞ്ഞ് മടങ്ങവെ ജീവനക്കാർ സഞ്ചരിച്ചിരുന്ന ഓട്ടോറിക്ഷ കൽകൂന്തലിൽ അപകടത്തിൽപ്പെട്ടിരുന്നു. ആരോഗ്യവകുപ്പ് ജീവനക്കാരോടൊപ്പം മറ്റ് യാത്രക്കാരും വാഹനത്തിലുണ്ടായിരുന്നു.

അപകടത്തിൽ പരിക്കേറ്റ ഇവരെ നെടുങ്കണ്ടം താലൂക്ക് ആശുപത്രിയിൽ പ്രവേശിപ്പിച്ചു. ആശുപത്രിയിൽനിന്ന് വിവരം ലഭിച്ചിട്ടും പരിക്കേറ്റവരുടെ മൊഴി രേഖപ്പെടുത്താൻ പോലീസ് എത്തിയില്ല.

പകരം സ്റ്റേഷനിലേക്ക് വിളിച്ചുവരുത്തുകയായിരുന്നു. മൂന്ന് മണിക്കൂറോളം കാത്തുനിന്നിട്ടും മൊഴി രേഖപ്പെടുത്തിയില്ലെന്നും ഉദ്യോഗസ്ഥർ മോശമായി പെരുമാറിയെന്നും ജീവനക്കാർ ആരോപിച്ചു. സ്റ്റേഷനിലുണ്ടായിരുന്ന വനിതാ ഉദ്യോഗസ്ഥർ, ഇവർക്കൊപ്പം സഞ്ചരിച്ചിരുന്ന മറ്റൊരാളെ മാത്രമാണ് വിളിച്ച് വിവരങ്ങൾ തിരക്കിയത്.

തുടർന്ന് കേസെടുക്കാനാവില്ലെന്നും പരാതി പിൻവലിക്കണമെന്നും സമ്മർദം ചെലുത്തിയതായും പറയുന്നു. സംഭവത്തിൽ പരിക്കേറ്റ ചന്ദ്രവല്ലിയമ്മ, ബ്ലസി മാർട്ടിൻ, റംലത്ത് ബീവി എന്നിവർ ഉടുമ്പൻചോല കുടുംബാരോഗ്യ കേന്ദ്രത്തിലെ ജീവനക്കാരോടൊപ്പം ആരോഗ്യവകുപ്പ് അധികൃതർക്ക് പരാതി നൽകി.
 

ഈ വിഷയത്തിൽ നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: Healthcare workers allege police misbehavior in Idukki.

#KeralaPolice #Idukki #Nedumkandam #PoliceBrutality #Complaint #Crime