കുടുംബത്തിന്റെ നിയമപോരാട്ടത്തിന് തിരിച്ചടി: നവീൻ ബാബുവിന്റെ മരണക്കേസ് ജില്ലാ സെഷൻസ് കോടതിയിലേക്ക് മാറ്റി

കണ്ണൂർ: (KVARTHA) മുൻ കണ്ണൂർ എഡിഎം നവീൻ ബാബുവിന്റെ ദുരൂഹമരണത്തിൽ തുടരന്വേഷണം ആവശ്യപ്പെട്ട് കുടുംബം നൽകിയ ഹർജി ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതി മേൽകോടതിയിലേക്ക് മാറ്റി.

കേസിന്റെ തുടർനടപടികൾ തലശ്ശേരി ജില്ലാ സെഷൻസ് കോടതിയിലേക്കാണ് മാറ്റിയത്. കേസ് സെഷൻസ് കോടതിയിലേക്ക് മാറ്റണമെന്ന പ്രതിഭാഗം അഭിഭാഷകനായ അഡ്വ. കെ. വിശ്വന്റെ വാദം അംഗീകരിച്ചാണ് കോടതിയുടെ ഈ നടപടി.

ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് മുഹമ്മദലി ഷഹ്‌ഷാദാണ് ഇന്ന് രാവിലെ കേസിൽ വിധി പറഞ്ഞത്. കേസിൽ തുടരന്വേഷണം വേണമോയെന്ന കാര്യത്തിൽ മേൽകോടതി തീരുമാനമെടുക്കും. നവീൻ ബാബു ദുരൂഹസാഹചര്യത്തിൽ മരിച്ച കേസിൽ അന്വേഷണം പൂർണമല്ലെന്നും ഇവരുടെ ഫോൺ കോൾ രേഖകൾ ഹാജരാക്കിയിട്ടില്ലെന്നും നവീൻ ബാബുവിന്റെ കുടുംബം കോടതിയിൽ ആരോപിച്ചിരുന്നു.

അതേസമയം, കേസ് അനാവശ്യമായി നീട്ടിക്കൊണ്ടുപോകരുതെന്നും തുടർ അന്വേഷണ ഹർജി നിലനിൽക്കില്ലെന്നുമായിരുന്നു ദിവ്യയുടെ അഭിഭാഷകൻ വാദിച്ചത്. നവീൻ ബാബുവിന്റെ മരണത്തിൽ തുടരന്വേഷണം ആവശ്യപ്പെട്ട് അദ്ദേഹത്തിന്റെ ഭാര്യ മഞ്ജുവാണ് കണ്ണൂർ ഒന്നാം ക്ലാസ് മജിസ്‌ട്രേറ്റ് കോടതിയിൽ ഹർജി സമർപ്പിച്ചത്.

പോലീസിനെതിരെ ഗുരുതരമായ ആരോപണങ്ങൾ ഉന്നയിച്ചുകൊണ്ടുള്ളതായിരുന്നു ഹർജി. പ്രതിക്ക് രക്ഷപ്പെടാൻ പഴുതുകളുള്ള കുറ്റപത്രമാണ് കോടതിയിൽ സമർപ്പിച്ചതെന്ന് ഹർജിയിൽ ചൂണ്ടിക്കാട്ടിയിരുന്നു.

കുറ്റം തെളിയിക്കാൻ ആവശ്യമായ രേഖകൾ മറച്ചുവെച്ചുവെന്നും, നവീൻ ബാബുവിന്റെ മരണത്തിൽ കൂടുതൽ അന്വേഷണം വേണമെന്നും ഹർജിയിൽ കുടുംബം ആവശ്യപ്പെട്ടിരുന്നു.

കുറ്റപത്രത്തിലെ പതിമൂന്ന് പിഴവുകളാണ് ഹർജിയിൽ പ്രധാനമായും ചൂണ്ടിക്കാണിച്ചത്. പ്രശാന്തനിൽനിന്ന് നവീൻ ബാബു കൈക്കൂലി വാങ്ങിയെന്ന് പ്രചരിപ്പിച്ചതായി കുറ്റപത്രത്തിൽ പറയുന്നു. എന്നാൽ, ഈ കാര്യം തെറ്റാണെന്ന് ലാൻഡ് റെവന്യൂ കമ്മീഷണറുടെ അന്വേഷണത്തിൽ തെളിഞ്ഞിട്ടുണ്ട്.

ഇക്കാര്യത്തെപ്പറ്റി പ്രത്യേക അന്വേഷണസംഘം (എസ്.ഐ.ടി.) അന്വേഷിച്ചില്ലെന്ന് ഹർജിയിൽ ആരോപിച്ചിരുന്നു. പെട്രോൾ പമ്പിന് എൻ.ഒ.സി. നൽകാൻ നവീൻ ബാബു കാലതാമസം വരുത്തിയിട്ടില്ല. നവീൻ ബാബു കുറ്റസമ്മതം നടത്തിയെന്ന് ജില്ലാ കളക്ടർ പറഞ്ഞിട്ടില്ല.

ജില്ലാ കളക്ടറുടെ ആദ്യ പ്രതികരണവും മൊഴിയും തമ്മിൽ വൈരുധ്യമുണ്ടെന്നും, ഇത് എസ്.ഐ.ടി. അന്വേഷിച്ചില്ലെന്നും മൊഴികൾ അവഗണിച്ചതിലൂടെ അന്വേഷണം എസ്.ഐ.ടി. അട്ടിമറിച്ചുവെന്നും ഹർജിയിൽ പറയുന്നു.

പ്രശാന്തന്റെ സ്വത്തും സ്വർണപ്പണയവും വിശദീകരിക്കുന്ന മൊഴിയിൽ വൈരുധ്യമുണ്ടെന്നായിരുന്നു ഹർജിയിലെ മറ്റൊരു ആരോപണം. സ്വർണപ്പണയം കൈക്കൂലി നൽകാനെന്ന മൊഴി എസ്.ഐ.ടി.യെ വഴിതെറ്റിക്കാനാണ്. പ്രശാന്തന്റെ മൊഴിയിലെ വൈരുധ്യം തെളിയിക്കാൻ എസ്.ഐ.ടി. ബാങ്ക് അക്കൗണ്ട് രേഖകൾ കണ്ടെത്തിയില്ല. നവീൻ ബാബു കൈക്കൂലി വാങ്ങിയെന്ന് മുഖ്യമന്ത്രിക്ക് പ്രശാന്തൻ നൽകിയ പരാതിയിലില്ല.

മുഖ്യമന്ത്രിക്ക് നൽകിയ പരാതിയെപ്പറ്റി പ്രോസിക്യൂഷൻ മറച്ചുവെച്ചുവെന്നും ഹർജിയിൽ ചൂണ്ടിക്കാട്ടിയിരുന്നു. നവീൻ ബാബുവിന്റെ ക്വാർട്ടേഴ്സിനു സമീപത്തുനിന്നുള്ള സി.സി.ടി.വി. ദൃശ്യങ്ങൾ എഡിറ്റ് ചെയ്തുവെന്നും സി.സി.ടി.വി. ദൃശ്യങ്ങളിലുള്ള ആളുകളെ എസ്.ഐ.ടി. തിരിച്ചറിഞ്ഞില്ലെന്നും ആരോപണമുണ്ട്.

സമ്പൂർണ സി.സി.ടി.വി. ദൃശ്യങ്ങൾ ഹാജരാക്കാൻ എസ്.ഐ.ടിക്ക് കഴിഞ്ഞില്ല. കേസിൽ പ്രതിഭാഗത്തെ സഹായിക്കാനാണ് വിജിലൻസ് വകുപ്പ് ഇടപെട്ടതെന്നും ഹർജിയിൽ കുറ്റപ്പെടുത്തിയിരുന്നു.

ഒക്ടോബർ 15-നാണ് നവീൻ ബാബുവിനെ പള്ളിക്കുന്നിലെ താമസസ്ഥലത്ത് തൂങ്ങിമരിച്ച നിലയിൽ കണ്ടെത്തിയത്. നവീൻ ബാബുവിന് യാത്രയയപ്പ് നൽകുന്ന പരിപാടിയിലേക്ക് അപ്രതീക്ഷിതമായി പി.പി. ദിവ്യ എത്തുകയും അന്നത്തെ കളക്ടർ അരുൺ കെ. വിജയന്റെ സാന്നിധ്യത്തിൽ വിമർശനം ഉന്നയിക്കുകയും ചെയ്തിരുന്നു.

ഇതിൽ മനംനൊന്ത് നവീൻ ബാബു ആത്മഹത്യ ചെയ്തുവെന്നാണ് കേസ്. കേസിൽ പി.പി. ദിവ്യ മാത്രമാണ് പ്രതി. ദിവ്യയെ പ്രതിചേർത്തുകൊണ്ടുള്ള കുറ്റപത്രം അന്വേഷണസംഘം കോടതിയിൽ സമർപ്പിച്ചിരുന്നു. സംഭവം നടന്ന് 166 ദിവസത്തിനുശേഷമായിരുന്നു കുറ്റപത്രം സമർപ്പിച്ചത്. കേസിൽ 82 പേരുടെ മൊഴി രേഖപ്പെടുത്തിയിരുന്നു.

കേരളമൊട്ടാകെ കോളിളക്കം സൃഷ്ടിച്ച ഈ കേസിലാണ് നീതിക്കുവേണ്ടിയുള്ള കുടുംബത്തിന്റെ പോരാട്ടത്തിന് നിയമവേദിയിൽനിന്ന് തിരിച്ചടി നേരിട്ടത്.

നവീൻ ബാബുവിന്റെ മരണക്കേസ് സംബന്ധിച്ച ഈ കോടതി നടപടിയെക്കുറിച്ച് നിങ്ങളുടെ അഭിപ്രായങ്ങൾ എന്താണ്? സുഹൃത്തുക്കളുമായി ഇത് പങ്കുവെച്ച് ചർച്ച ചെയ്യൂ.

Article Summary: Naveen Babu's death case transferred to Sessions Court.

#NaveenBabuCase #KeralaNews #Kannur #LegalNews #CourtDecision #KeralaPolice