റായ്പൂർ: (KVARTHA) ഛത്തീസ്ഗഡിലെ ബീജാപൂരിൽ മാധ്യമപ്രവർത്തകൻ മുകേഷ് ചന്ദ്രകറിൻ്റെ ദുരൂഹ മരണത്തിൽ അന്വേഷണം പുരോഗമിക്കവെ, കൊലപാതക സാധ്യതയും രാഷ്ട്രീയ പാർട്ടികളുടെ ആരോപണ പ്രത്യാരോപണങ്ങളും വിഷയത്തെ കൂടുതൽ സങ്കീർണമാക്കുന്നു. വെള്ളിയാഴ്ചയാണ് 33 കാരനായ മുകേഷിൻ്റെ മൃതദേഹം സെപ്റ്റിക് ടാങ്കിൽ കണ്ടെത്തിയത്. 

എൻഡിടിവിയിലെ ഫ്രീലാൻസ് ജേണലിസ്റ്റും 'ബസ്തർ ജംഗ്ഷൻ' എന്ന യൂട്യൂബ് ചാനലിന്റെ നടത്തിപ്പുകാരനുമായിരുന്നു മുകേഷ്. ബസ്തറിലെ ആഭ്യന്തര വാർത്തകൾക്ക് പുറമെ, മാവോയിസ്റ്റുകൾ തട്ടിക്കൊണ്ടുപോയ പൊലീസുകാരെയും ഗ്രാമീണരെയും മോചിപ്പിക്കുന്നതിലും അദ്ദേഹം നിർണായക പങ്ക് വഹിച്ചിട്ടുണ്ട്.

തിരോധാനവും കണ്ടെത്തലും

ജനുവരി ഒന്നിന് രാത്രി മുതലാണ് മുകേഷിനെ കാണാതായത്. പുതുവർഷ ദിനത്തിൽ വൈകുന്നേരം മുകേഷിനെ കണ്ടിരുന്നെന്നും പിറ്റേന്ന് രാവിലെ വീട്ടിൽ ഇല്ലാതിരുന്നതിനെ തുടർന്ന് അന്വേഷണം ആരംഭിച്ചെന്നും യുകേഷ് പറയുന്നു. മുകേഷിന്റെ ഫോൺ സ്വിച്ച് ഓഫ് ചെയ്ത നിലയിലായിരുന്നു. കോൺട്രാക്ടറായ സുരേഷ് ചന്ദ്രകറിനെ അന്ന് വൈകുന്നേരം മുകേഷ് കാണേണ്ടതായിരുന്നുവെന്നും ഇരുവരും അടുത്ത ബന്ധുക്കളാണെന്നും യുകേഷ് കൂട്ടിച്ചേർത്തു.

സെപ്റ്റിക് ടാങ്കിലെ ദുരൂഹ മരണം

പൊലീസ് അന്വേഷണത്തിൽ നിർണായക വഴിത്തിരിവുണ്ടായത്, ചാത്തൻ പാറ ബസ്തിയിലെ കരാറുകാരൻ സുരേഷ് ചന്ദ്രക്കറിൻ്റെ വീട്ടുവളപ്പിലെ സെപ്റ്റിക് ടാങ്കിൽ മുകേഷിൻ്റെ മൃതദേഹം കണ്ടെത്തിയതോടെയാണ്. ശരീരത്തിൽ ആഴത്തിലുള്ള മുറിവുകളുണ്ടായിരുന്നത് കൊലപാതക സാധ്യതയിലേക്കാണ് വിരൽ ചൂണ്ടുന്നത്. മുകേഷിന്റെ അവസാന ലൊക്കേഷനും മൊബൈൽ ഫോൺ കോളുകളും കേന്ദ്രീകരിച്ച് പൊലീസ് അന്വേഷണം ഊർജിതമാക്കിയിട്ടുണ്ട്. 

സുരേഷ് ചന്ദ്രക്കർ തൊഴിലാളികൾക്കായി നിർമ്മിച്ച പാർപ്പിട സമുച്ചയത്തിൽ പുതിയ കോൺക്രീറ്റ് കാസ്റ്റിങ് കണ്ടതിനെ തുടർന്ന് നടത്തിയ പരിശോധനയിലാണ് സെപ്റ്റിക് ടാങ്കിൽ മൃതദേഹം കണ്ടെത്തിയത്. ടാങ്ക് രണ്ടു ദിവസം മുൻപാണ് മൂടി കോൺക്രീറ്റ് ചെയ്തതെന്നും പൊലീസ് കണ്ടെത്തി.

രാഷ്ട്രീയ ആരോപണ പ്രത്യാരോപണങ്ങൾ

മുകേഷിൻ്റെ മരണത്തെ തുടർന്ന് കോൺഗ്രസും ബിജെപിയും പരസ്പരം ആരോപണങ്ങളുമായി രംഗത്തെത്തിയിട്ടുണ്ട്. സുരേഷ് ചന്ദ്രക്കറിന് കോൺഗ്രസുമായുള്ള ബന്ധമാണ് ബിജെപി പ്രധാനമായും ഉന്നയിക്കുന്നത്. മറുവശത്ത്, സംസ്ഥാനത്തെ ക്രമസമാധാന തകർച്ച ചൂണ്ടിക്കാട്ടി കോൺഗ്രസ് ബിജെപിയെ വിമർശിക്കുന്നു. ഛത്തീസ്ഗഡ് മുഖ്യമന്ത്രി വിഷ്ണുദേവ് സായി സംഭവത്തിൽ ദുഃഖം രേഖപ്പെടുത്തുകയും കുറ്റവാളികൾക്കെതിരെ കർശന നടപടി എടുക്കുമെന്നും അറിയിച്ചു. 

കോൺഗ്രസ് സംസ്ഥാന അധ്യക്ഷൻ ദീപക് ബൈജ്, ബിജെപി ഭരണത്തിൽ മാധ്യമപ്രവർത്തകർക്ക് ജീവൻ പണയം വെച്ചാണ് ജോലി ചെയ്യേണ്ടി വരുന്നതെന്നും മുകേഷിൻ്റെ മരണം ക്രമസമാധാന തകർച്ചയുടെ ഉദാഹരണമാണെന്നും ആരോപിച്ചു. ഇതിന് മറുപടിയായി ബിജെപി, സുരേഷ് ചന്ദ്രക്കറും കോൺഗ്രസ് പാർട്ടിയുമായുള്ള ബന്ധം ചൂണ്ടിക്കാട്ടി കോൺഗ്രസിനെ പ്രതിക്കൂട്ടിലാക്കി.

സുരേഷ് ചന്ദ്രക്കർ എന്ന കോൺട്രാക്ടർ

മുകേഷിൻ്റെ മൃതദേഹം കണ്ടെത്തിയ സെപ്റ്റിക് ടാങ്കിന്റെ ഉടമ സുരേഷ് ചന്ദ്രക്കർ, ബസ്തറിലെ പ്രധാന കോൺട്രാക്ടർമാരിൽ ഒരാളാണ്. സർക്കാർ നിർമ്മാണ പ്രവർത്തനങ്ങളിലും ഖനനത്തിലും അദ്ദേഹം പങ്കാളിയാണ്. ഛത്തീസ്ഗഡ് പ്രദേശ് കോൺഗ്രസിൻ്റെ പട്ടികജാതി സെല്ലിൻ്റെ സംസ്ഥാന വൈസ് പ്രസിഡൻ്റ് കൂടിയാണ് സുരേഷ്. 

ഏതാനും മാസങ്ങൾക്ക് മുമ്പ് മഹാരാഷ്ട്ര നിയമസഭാ തിരഞ്ഞെടുപ്പിൽ നവപൂർ നിയമസഭയുടെ നിരീക്ഷകനായും അദ്ദേഹം പ്രവർത്തിച്ചിട്ടുണ്ട്. ദരിദ്ര പശ്ചാത്തലത്തിൽ നിന്ന് വളർന്ന് സർക്കാർ കോൺട്രാക്ടുകളിലൂടെ പ്രമുഖ കോൺട്രാക്ടറായി മാറിയ സുരേഷ്, 2021-ൽ ആഢംബര വിവാഹത്തിലൂടെ ശ്രദ്ധ നേടിയിരുന്നു.

 #MukeshChandrakar, #SepticTank, #Chhattisgarh, #PoliticalAllegations, #JournalistDeath, #BJPCongress