മുഴപ്പിലങ്ങാട് ടോൾ ബൂത്തിൽ കൂട്ടത്തല്ല്: സ്ത്രീകൾ ഉൾപ്പെടെയുള്ള യാത്രക്കാരും ജീവനക്കാരും ഏറ്റുമുട്ടി!

കണ്ണൂർ: (KVARTHA) തലശ്ശേരി - മാഹി ബൈപ്പാസിലെ മുഴപ്പിലങ്ങാട് ടോൾ ബൂത്ത് വീണ്ടും സംഘർഷഭരിതമായി. ഞായറാഴ്ച രാത്രി പത്ത് മണിയോടെ ടോൾ നിരക്കിനെ ചൊല്ലിയുണ്ടായ തർക്കം വാക്കേറ്റത്തിലും പിന്നീട് കൈയ്യാങ്കളിയിലും കലാശിക്കുകയായിരുന്നു. രണ്ട് യുവതികൾ ഉൾപ്പെടെയുള്ള നാലംഗ യാത്രാസംഘവും ടോൾ പിരിവ് ജീവനക്കാരും തമ്മിലാണ് ഏറ്റുമുട്ടിയത്.

മുഴപ്പിലങ്ങാട് ദേശീയപാതയിലെ ടോൾ ബൂത്തിൽ യാത്രക്കാരുമായി നിരന്തരം പ്രശ്നങ്ങളുണ്ടാകാറുണ്ടെന്ന് നാട്ടുകാർ പറയുന്നു. അമിത ടോൾ നിരക്ക് ചോദ്യം ചെയ്ത യാത്രക്കാരോട് ടോൾ ജീവനക്കാർ അപമര്യാദയായി പെരുമാറിയതാണ് ഇത്തവണത്തെ സംഘർഷത്തിന് കാരണം. ടോൾ ജീവനക്കാരായ രണ്ട് പേർക്കും ഒരു സുരക്ഷാ ജീവനക്കാരനും യാത്രക്കാരുടെ ആക്രമണത്തിൽ പരിക്കേറ്റു.

സംഘർഷത്തിൻ്റെ സി.സി.ടി.വി ദൃശ്യങ്ങൾ പുറത്തുവന്നിട്ടുണ്ട്. ജീവനക്കാർ യാത്രക്കാരെ പിടിച്ചു തള്ളുന്നതും, പ്രകോപിതരായ യാത്രക്കാർ തിരിച്ച് ആക്രമിച്ച് പ്രത്യാക്രമണം നടത്തുന്നതും ദൃശ്യങ്ങളിൽ വ്യക്തമാണ്. 

മറ്റ് യാത്രാക്കാർ ഇടപെട്ടാണ് സ്ഥിതി ശാന്തമാക്കിയത്. ക്യൂവിൽ കാത്തു കെട്ടിക്കിടക്കുന്ന വാഹനയാത്രക്കാരോട് ടോൾ ജീവനക്കാരുടെ പെരുമാറ്റരീതിയെക്കുറിച്ച് വ്യാപകമായ പരാതി നിലനിൽക്കുന്നുണ്ട്. ഇവിടെ മുമ്പും സമാനമായ കയ്യാങ്കളികൾ നടന്നിട്ടുണ്ട്.

മുഴപ്പിലങ്ങാട് ടോൾ ബൂത്തിൽ നടന്ന സംഘർഷത്തെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: A brawl erupted at the Muzhappilangad toll booth on the Thalassery-Mahe bypass between a four-member travel group, including two women, and toll collection staff, triggered by a dispute over toll fees. Two toll staff and a security guard were injured.

#Muzhappilangad, #TollBooth, #Kannur, #Brawl, #RoadSafety, #KeralaNews