എം പരിവാഹന്റെ പേരിൽ വാട്‌സാപ്പിലൂടെ തട്ടിപ്പ്; പിഴയടയ്ക്കാൻ 'എപികെ' ഫയൽ, തിരുവനന്തപുരത്ത് ഒറ്റദിവസം പണം നഷ്ടപ്പെട്ടത് 6 പേർക്ക്

തിരുവനന്തപുരം: (KVARTHA) സംസ്ഥാനത്ത് എം പരിവാഹൻ ആപ്പിന്റെ മറവിൽ വാട്‌സാപ്പിലൂടെയുള്ള സൈബർ തട്ടിപ്പുകൾ വർദ്ധിക്കുന്നതായി പരാതി. ട്രാഫിക് നിയമലംഘനത്തിന് പിഴയടക്കാനാവശ്യപ്പെട്ട് വാട്‌സാപ്പ് വഴിയുള്ള വ്യാജ സന്ദേശങ്ങളിൽ കുടുങ്ങി നിരവധിപ്പേർക്കാണ് പണം നഷ്ടമായത്. തിരുവനന്തപുരത്ത് നിരവധി ആളുകൾ തട്ടിപ്പിനിരയായതായി തിരുവനന്തപുരം റൂറൽ സൈബർ ക്രൈം പൊലീസ് അറിയിച്ചു.

തട്ടിപ്പ് രീതി ഇങ്ങനെ 

ട്രാഫിക് നിയമലംഘനം നടത്തിയതിന് പിഴ അടയ്ക്കണമെന്ന് ആവശ്യപ്പെട്ടാണ് തട്ടിപ്പുകാർ വാട്‌സാപ്പിലൂടെ സന്ദേശം അയക്കുന്നത്. ഔദ്യോഗികമെന്ന് തോന്നിപ്പിക്കുന്ന വിധത്തിലാണ് സന്ദേശങ്ങൾ. ഇതിനൊപ്പമുള്ള 'എപികെ' (APK) ഫയൽ ഡൗൺലോഡ് ചെയ്ത് പിഴത്തുക അടയ്ക്കണമെന്നാണ് തട്ടിപ്പുകാർ ആവശ്യപ്പെടുന്നത്.

ഈ ഫയൽ ഡൗൺലോഡ് ചെയ്യുന്നതോടെ ഫോണിന്റെ നിയന്ത്രണം തട്ടിപ്പുകാരുടെ കൈകളിലാകും. തുടർന്ന് ഫോണിലെ ഗൂഗിൾപേ, ഫോൺപേ തുടങ്ങിയ ബാങ്കിംഗ് ആപ്പുകളിൽ കയറി സൈബർ തട്ടിപ്പുകാർ പണം പിൻവലിക്കുകയാണ് ചെയ്യുന്നത്.

തിരുവനന്തപുരത്ത് വ്യാപക തട്ടിപ്പ് 

തിരുവനന്തപുരത്ത് ശനിയാഴ്ച മാത്രം ഇത്തരത്തിലുള്ള ആറ് കേസുകൾ റിപ്പോർട്ട് ചെയ്തിട്ടുണ്ട്. തട്ടിപ്പിനിരയായവർക്ക് 12,000 രൂപ മുതൽ ഒരു ലക്ഷം രൂപ വരെ നഷ്ടപ്പെട്ടതായി സൈബർ ക്രൈം വിഭാഗം അറിയിച്ചു.

ജാഗ്രത പാലിക്കണം 

ഗതാഗതനിയമലംഘനത്തിന് മോട്ടോർ വാഹന വകുപ്പ് (MVD) എസ്എംഎസ് വഴി മാത്രമേ സന്ദേശം അയക്കുകയുള്ളൂ എന്ന് അധികൃതർ വ്യക്തമാക്കി. വാട്‌സാപ്പിലൂടെ ഒരിക്കലും പിഴയടക്കാൻ ആവശ്യപ്പെട്ടുള്ള ഔദ്യോഗിക അറിയിപ്പ് അയക്കില്ല. 

അതിനാൽ, എം പരിവാഹന്റെ പേരിൽ വാട്‌സാപ്പ് വഴി വരുന്ന മുഴുവൻ സന്ദേശങ്ങളും വ്യാജമാണ്. ഇത്തരം സന്ദേശങ്ങളോട് പ്രതികരിക്കരുതെന്നും സംശയാസ്പദമായ ലിങ്കുകളിൽ ക്ലിക്ക് ചെയ്യരുതെന്നും പൊലീസ് മുന്നറിയിപ്പ് നൽകുന്നു.

പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Cyber criminals use fake mParivahan WhatsApp messages and APK files to steal money in Trivandrum.

#CyberCrime #mParivahan #WhatsAppFraud #TrafficFine #Trivandrum #KeralaPolice #SafeBanking