'കാശിയിലേക്ക് പോകുന്നു, ഇനി ദൈവത്തോട് അലിയും'; വീടുവിട്ടിറങ്ങിയ പ്ലസ് ടു വിദ്യാർഥിയെ 9 ദിവസമായിട്ടും കണ്ടെത്തിയില്ല, അന്വേഷണം സംസ്ഥാനത്തിന് പുറത്തേക്ക് 

പാനൂർ: (KVARTHA) പെരിങ്ങത്തൂരിൽ നിന്ന് കാണാതായ പ്ലസ് ടു വിദ്യാർഥി ശിവസൂര്യയെ കണ്ടെത്താൻ പൊലീസ് പ്രത്യേക അന്വേഷണ സംഘം രൂപീകരിച്ചു. ശിവസൂര്യയെ കാണാതായിട്ട് ഞായറാഴ്ചയോടെ 9 ദിവസമാവുകയാണ്. കണ്ണൂർ സിറ്റി പൊലീസ് കമീഷണറുടെ മേൽനോട്ടത്തിൽ നടക്കുന്ന അന്വേഷണം നിലവിൽ സംസ്ഥാനത്തിന് പുറത്തേക്കും വ്യാപിപ്പിച്ചിട്ടുണ്ട്. രക്ഷിതാവിൻ്റെ പരാതിയിൽ അടിയന്തര നടപടികൾ സ്വീകരിക്കണമെന്ന് ബാലാവകാശ കമീഷൻ പൊലീസിനോട് ആവശ്യപ്പെട്ടിട്ടുണ്ട്.

തുമ്പില്ലാതെ സിസിടിവി ദൃശ്യങ്ങൾ

വീടിനടുത്തുള്ള സിസിടിവി ക്യാമറകൾ എല്ലാം പൊലീസ് പല തവണ പരിശോധിച്ചു കഴിഞ്ഞു. ഉച്ചയ്ക്ക് 1 മണിക്കാണ് കുട്ടി വീടുവിട്ടത്. ഇതിന് അടുത്തുള്ള സമയങ്ങളിലെ ദൃശ്യമാണ് പൊലീസ് പ്രധാനമായും പരിശോധിച്ചത്. പരിശോധനയിൽ ഒന്നും കണ്ടെത്താൻ കഴിയാത്തതിനാൽ ഇതിനുശേഷമുള്ള മണിക്കൂറുകളിലെ ദൃശ്യങ്ങളും പരിശോധിച്ചു തുടങ്ങി. തലശ്ശേരി റെയിൽവേ സ്റ്റേഷനിലെ ദൃശ്യങ്ങളും പല തവണ പരിശോധിച്ചിട്ടും അന്വേഷണ സംഘത്തിന് യാതൊരു തുമ്പും ലഭിച്ചിട്ടില്ല.

കാശിക്ക് പോകുന്നുവെന്ന് കുറിപ്പ്

കുട്ടി അമിതമായി മൊബൈൽ ഗെയിം കളിക്കുന്നത് രക്ഷിതാക്കൾ തടഞ്ഞതിനെ തുടർന്നാണ് വീട്ടിൽ നിന്നും ഇറങ്ങിപ്പോയത്. വീട്ടിൽ നിന്നും 3000 രൂപയും രണ്ട് ജോഡി വസ്ത്രങ്ങളുമെടുത്താണ് പോയത്. 'താൻ കാശിയിലേക്ക് പോകുന്നു, ഇനിയുള്ള ജീവിതം അവിടെ ജീവിച്ച് ദൈവത്തോട് അലിയും' എന്ന കുറിപ്പ് എഴുതിവെച്ചാണ് കുട്ടി സ്ഥലം വിട്ടത്.

ബാലാവകാശ കമീഷൻ്റെ ഇടപെടൽ

ബാലാവകാശ സംരക്ഷണ കമീഷൻ ചെയർപേഴ്സൺ അഡ്വ. കെ വി മനോജ് കുമാർ ചൊക്ളി പൊലീസ് സ്റ്റേഷനിലും കാണാതായ കുട്ടിയുടെ വീട്ടിലും സന്ദർശനം നടത്തി സ്ഥിതിഗതികൾ വിലയിരുത്തിയിരുന്നു. വിദ്യാർഥിയെ കണ്ടെത്താനായി ഊർജിതമായ അന്വേഷണമാണ് പൊലീസ് നടത്തുന്നത്.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: Police expanded the search for the missing Plus Two student from Peringathur.

#Kvartha #MissingStudent #Peringathur #KannurPolice #KeralaNews #MalayalamNews #AmmuNews