കണ്ണൂരിൽ പ്രായപൂർത്തിയാകാത്ത പെൺകുട്ടിയെ മദ്യം നൽകി കൂട്ടബലാത്സംഗം ചെയ്തു: 10 പേർക്കെതിരെ പോക്സോ കേസ്
● താഴെ ചൊവ്വയിൽ ലോഡ്ജ് മുറിയിലായിരുന്നു സംഭവം.
● നാല് പേരാണ് ആദ്യം പെൺകുട്ടിയെ കൊണ്ടുപോയത്.
● ലോഡ്ജിൽ മദ്യം നൽകി പീഡിപ്പിച്ചുവെന്ന് പരാതിയിൽ പറയുന്നു.
● പിന്നീട് മറ്റ് ആറുപേരെയും വരുത്തി പീഡനം തുടരുകയായിരുന്നു.
● പെൺകുട്ടി വീട്ടിലെത്തിയപ്പോൾ അവശ നിലയിലായിരുന്നു.
കണ്ണൂർ: (KVARTHA) നഗരത്തിലെ താഴെ ചൊവ്വയിൽ 15 വയസ്സുകാരിയെ ബൈക്കിൽ തട്ടിക്കൊണ്ടുപോയി മദ്യം നൽകി കൂട്ടബലാത്സംഗം ചെയ്ത കേസിൽ 10 യുവാക്കൾക്കെതിരെ പോക്സോ നിയമപ്രകാരം ടൗൺ പോലീസ് കേസെടുത്തു. ടൗൺ സ്റ്റേഷൻ പരിധിയിൽ താമസിക്കുന്ന പെൺകുട്ടിയുടെ പരാതിയിലാണ് നടപടി.
കഴിഞ്ഞ മാസം നാലാം തീയതിയാണ് സംഭവം നടന്നത്. പെൺകുട്ടിയെ വീട്ടിൽ നിന്ന് ബൈക്കിൽ കൂട്ടിക്കൊണ്ടുപോയ നാലംഗ സംഘം താഴെ ചൊവ്വയിലെ ഒരു ലോഡ്ജ് മുറിയിലെത്തിച്ച് നിർബന്ധിച്ച് മദ്യം കുടിപ്പിച്ച ശേഷം പീഡിപ്പിക്കുകയായിരുന്നു. പിന്നീട്, സംഘം സുഹൃത്തുക്കളായ ആറുപേരെക്കൂടി വിളിച്ചുവരുത്തി. ഇവരും പെൺകുട്ടിയെ ലൈംഗികമായി പീഡിപ്പിച്ചുവെന്ന് പരാതിയിൽ പറയുന്നു.
അഞ്ചാം തീയതി രാവിലെ അവശനിലയിൽ വീട്ടിലെത്തിയ പെൺകുട്ടി ബന്ധുക്കളോട് വിവരം വെളിപ്പെടുത്തുകയും, തുടർന്ന് ബന്ധുക്കളോടൊപ്പം പോലീസിൽ പരാതി നൽകുകയുമായിരുന്നു. പീഡനം നടന്നത് കണ്ണൂർ ടൗൺ സ്റ്റേഷൻ പരിധിയിലായതിനാൽ, പെൺകുട്ടിയുടെ മൊഴി രേഖപ്പെടുത്തിയ ടൗൺ പോലീസ് പോക്സോ നിയമപ്രകാരം കേസെടുത്ത് അന്വേഷണം ആരംഭിച്ചു.
ടൗൺ സ്റ്റേഷൻ ഇൻസ്പെക്ടർ ശ്രീജിത്ത് കൊടേരിയുടെ നേതൃത്വത്തിലാണ് അന്വേഷണം പുരോഗമിക്കുന്നത്. നേരത്തെ ഈ സംഭവം സമൂഹമാധ്യമങ്ങളിൽ പ്രചരിച്ചിരുന്നുവെങ്കിലും അന്ന് പോലീസ് കേസെടുത്തിരുന്നില്ല.
സംഭവത്തെക്കുറിച്ച് നിങ്ങളുടെ അഭിപ്രായം കമന്റായി പങ്കുവെക്കൂ
Article Summary: Kannur police book 10 youths under POCSO for assault on minor
#KannurNews #KeralaCrime #POCSO #ChildSafety #PoliceAction #KeralaNews
