കണ്ണൂർ(KVARTHA): മാട്ടൂലിൽ പെയിൻ്റിങ് തൊഴിലാളി വാഹനമിടിച്ച് മരിച്ച സംഭവത്തിൽ, നിർത്താതെ പോയ ടിപ്പർ ലോറി പോലീസ് പിടികൂടി. നിർത്തിയിട്ട ബസിന് സമീപം രക്തത്തിൽ കുളിച്ച് മരിച്ച നിലയിൽ കണ്ടെത്തിയ കല്ലേൻ മണിയുടെ മരണവുമായി ബന്ധപ്പെട്ട പോലീസ് അന്വേഷണം പൂർത്തിയായിരിക്കുകയാണ്.

തൊഴിലാളിയെ ഇടിച്ചിട്ട് വാഹനം കയറ്റി അപായപ്പെടുത്തിയ ശേഷം നിർത്താതെ പോയ മണൽ ലോറി ഒളിപ്പിച്ചു വെച്ച നിലയിൽ കണ്ണപുരം ഇൻസ്പെക്ടർ പി.ബാബു മോനും സംഘവും കണ്ടെത്തി. തിങ്കളാഴ്ച രാത്രിയോടെ മടക്കര ഡാമിന് സമീപത്തെ ഒരു വീട്ടിൽ നിന്നാണ് ടിപ്പർ ലോറി പിടികൂടിയത്. ലോറി ഓടിച്ച മാട്ടൂൽ സ്വദേശിയെ പോലീസ് കസ്റ്റഡിയിലെടുത്തിട്ടുണ്ട്.

ചൊവ്വാഴ്ച രാവിലെ ഫോറൻസിക് വിദഗ്ധർ നടത്തിയ പരിശോധനയിലാണ് അപകടം വരുത്തിയ വാഹനം ശാസ്ത്രീയമായി തിരിച്ചറിഞ്ഞത്. പ്രദേശത്ത് നിരീക്ഷണ ക്യാമറകൾ ഇല്ലാതിരുന്നത് ഡ്രൈവർക്ക് രക്ഷപ്പെടാൻ സാഹചര്യമൊരുക്കിയെങ്കിലും, പോലീസിൻ്റെ തന്ത്രപരമായ അന്വേഷണം പ്രതിയെ പിടികൂടാൻ സഹായിച്ചു. സംഭവത്തിൽ മനപ്പൂർവ്വമല്ലാത്ത നരഹത്യക്ക് കണ്ണപുരം പോലീസ് കേസെടുത്തിട്ടുണ്ട്.

ഞായറാഴ്ച പുലർച്ചെയാണ് മാട്ടൂൽ മടക്കരയിലെ ബസ്റ്റോപ്പിന് സമീപം കല്ലേൻ മണി (49) മരിച്ച നിലയിൽ കാണപ്പെട്ടത്. ഈ സംഭവത്തിൽ ദുരൂഹത തോന്നിയതിനെ തുടർന്ന് മണിയുടെ സഹോദരൻ പോലീസിൽ പരാതി നൽകുകയായിരുന്നു.

ഈ വാർത്തയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക! കൂടുതൽ പേരിലേക്ക് എത്തിക്കാൻ ഷെയർ ചെയ്യുക. 

Article Summary: Police in Kannur, Kerala, have arrested a tipper lorry and its driver in connection with the death of a painting worker in Mattool. The lorry, which fled the scene after hitting the worker, was found hidden near Madakkara dam. A case of non-intentional homicide has been registered.

#MattoolDeath, #KannurNews, #HitAndRun, #KeralaPolice, #CrimeNews, #Arrest