ശസ്ത്രക്രിയ ഭയന്ന് ജനൽച്ചില്ല് തകർത്ത് രക്ഷപ്പെട്ടു; ആശുപത്രിയിൽ നിന്ന് മുങ്ങിയ 68-കാരനെ രക്തം വാർന്ന നിലയിൽ കണ്ടെത്തി

പാറശ്ശാല: (KVARTHA) പൈല്‍സ് നീക്കം ചെയ്യുന്നതിനായി ആശുപത്രിയില്‍ പ്രവേശിപ്പിച്ച 68-കാരൻ ശസ്ത്രക്രിയ ഭയന്ന് ജനല്‍ച്ചില്ല് തകര്‍ത്ത് രക്ഷപ്പെട്ടു. തിരുവനന്തപുരം പാറശ്ശാലയിലാണ് സംഭവം. പാറശ്ശാല താലൂക്ക് ആശുപത്രിയില്‍ ശസ്ത്രക്രിയക്കായി പ്രവേശിപ്പിച്ച മാത്യു ആണ് ജീവനക്കാരുടെ കണ്ണുവെട്ടിച്ച് ആശുപത്രിയില്‍ നിന്നും ഒളിച്ചോടിയത്.

ആശുപത്രിയിൽ സംഭവിച്ചത്

തിങ്കളാഴ്ചയായിരുന്നു മാത്യുവിന് ശസ്ത്രക്രിയ തീരുമാനിച്ചിരുന്നത്. ഇതിനായി ശനിയാഴ്ച ഇയാളെ ആശുപത്രിയില്‍ പ്രവേശിപ്പിച്ചു. എന്നാൽ ഞായറാഴ്ച പുലര്‍ച്ചെ മൂന്ന് മണിയോടെ ആശുപത്രിയുടെ ജനല്‍ച്ചില്ല് തകര്‍ത്ത് മാത്യു രക്ഷപ്പെടുകയായിരുന്നു. 

ചില്ല് തകർന്നുവീഴുന്ന ശബ്ദം കേട്ട് ആശുപത്രി ജീവനക്കാര്‍ എത്തിയെങ്കിലും ഇയാളെ കണ്ടെത്താനായില്ല. തുടർന്ന് ആശുപത്രി അധികൃതര്‍ പാറശ്ശാല പോലീസ് സ്റ്റേഷനില്‍ പരാതി നല്‍കി. പോലീസ് എത്തി ആശുപത്രി പരിസരത്ത് പരിശോധന നടത്തിയെങ്കിലും മാത്യുവിനെ കണ്ടെത്താന്‍ സാധിച്ചില്ല. ഇതോടെ ഇയാൾ ആശുപത്രിക്ക് പുറത്തേക്ക് കടന്നതായി പോലീസിന് വ്യക്തമായി.

ടെറസിൽ രക്തം വാർന്ന നിലയിൽ

തിങ്കളാഴ്ച രാവിലെ കുറുങ്കൂട്ടിക്ക് സമീപത്തെ ഒരു വീടിൻ്റെ മുകളിലേക്കുള്ള പടിക്കെട്ടില്‍ വെച്ചിരുന്ന വിറകുകൊള്ളികള്‍ സ്ഥാനം മാറിക്കിടക്കുന്നത് വീട്ടുകാരുടെ ശ്രദ്ധയില്‍പ്പെട്ടു. തുടർന്ന് വീട്ടുകാര്‍ ടെറസില്‍ കയറി നോക്കുമ്പോഴാണ് രക്തം വാര്‍ന്ന നിലയില്‍ മാത്യുവിനെ കണ്ടെത്തിയത്. ഉടൻ തന്നെ വീട്ടുകാര്‍ പാറശ്ശാല പോലീസ് സ്റ്റേഷനില്‍ വിവരം അറിയിച്ചു. പോലീസ് എത്തി മാത്യുവിനെ സ്റ്റേഷനിലേക്ക് കൊണ്ടുപോയി. തുടര്‍ന്ന് നടത്തിയ അന്വേഷണത്തിലാണ് ആശുപത്രിയില്‍ നിന്നും രക്ഷപ്പെട്ടയാളാണ് ഇതെന്ന് വ്യക്തമായത്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. കൂടുതൽ വാർത്തകൾ അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക.

Article Summary: A 68-year-old man admitted for piles surgery at Parassala Taluk Hospital escaped by breaking a window out of fear, and was later found bleeding on the terrace of a nearby house in Kurungkutty.

#ParassalaNews #Thiruvananthapuram #KeralaPolice #KeralaNews #MalayalamNews