കണ്ണൂർ വനിതാ ഹോസ്റ്റലിന്റെ മതിൽ ചാടിയ യുവാവ് പിടിയിൽ

കണ്ണൂർ: (KVARTHA) കണ്ണൂർ നഗരത്തിലെ വനിതാ ഹോസ്റ്റലിൽ അതിക്രമിച്ചു കയറാൻ ശ്രമിച്ച യുവാവ് പിടിയിലായി. തിങ്കളാഴ്ച രാത്രി പത്തു മണിയോടെ താവക്കരയിലുള്ള ഹോസ്റ്റലിലാണ് സംഭവം നടന്നത്. മതിൽ ചാടിക്കടക്കാൻ ശ്രമിച്ച യുവാവിനെ ഹോസ്റ്റൽ ജീവനക്കാരാണ് പിടികൂടി പോലീസിന് കൈമാറിയത്.

ജീപ്പിലാണ് പ്രതി ഹോസ്റ്റലിന് അടുത്തേക്ക് വന്നത്. ജീപ്പ് പുറത്ത് നിർത്തിയ ശേഷം ഇയാൾ ഹോസ്റ്റലിന്റെ മതിൽ ചാടിക്കടക്കുന്നത് താമസക്കാരായ ചില പെൺകുട്ടികളുടെ ശ്രദ്ധയിൽപ്പെട്ടു. ഉടൻ തന്നെ ഇവർ വാർഡനെ വിവരം അറിയിച്ചു.

തുടർന്ന് സെക്യൂരിറ്റി ജീവനക്കാർ സ്ഥലത്ത് പരിശോധന നടത്താനായി ഇറങ്ങി. ജീവനക്കാർ വരുന്നത് കണ്ടതോടെ യുവാവ് ഓടി രക്ഷപ്പെടാൻ ശ്രമിച്ചു. എന്നാൽ, ജീവനക്കാർ ചേർന്ന് ഇയാളെ പിന്തുടർന്ന് പിടികൂടി തടഞ്ഞുവെക്കുകയായിരുന്നു. പിന്നീട് പോലീസിനെ വിളിച്ചു വരുത്തി യുവാവിനെ കൈമാറി.

പിടിയിലായ യുവാവ് മദ്യ ലഹരിയിലായിരുന്നുവെന്ന് പോലീസ് അറിയിച്ചു. കണ്ണൂർ നഗരത്തിൽ താമസിക്കുന്നയാളാണ് പ്രതിയെന്നാണ് സൂചന. ഇയാളെ ചോദ്യം ചെയ്തതിനു ശേഷം ചൊവ്വാഴ്ച  അറസ്റ്റ് രേഖപ്പെടുത്തുമെന്ന് പോലീസ് അറിയിച്ചു.

ഈ വാർത്തയെക്കുറിച്ച് നിങ്ങളുടെ അഭിപ്രായം പങ്കുവെക്കുക. 

Article Summary: Man arrested for trespassing into women's hostel in Kannur.

#Kannur #WomensHostel #Trespassing #Arrest #Police #Security