നാടിനെ നടുക്കി കൊട്ടാരക്കര അപകടം; രണ്ട് യുവതികൾ മരിച്ചു, പരിക്കേറ്റത് മൂന്നുപേർക്ക്

കൊല്ലം: (KVARTHA) കൊട്ടാരക്കര പനവേലിയിൽ ബസ് കാത്ത് നിൽക്കുകയായിരുന്ന രണ്ട് യുവതികളെ നിയന്ത്രണം വിട്ട പിക്കപ്പ് വാൻ ഇടിച്ച് തെറിപ്പിച്ചു. അപകടത്തിൽ പനവേലി സ്വദേശിനികളായ സോണിയ, ശ്രീക്കുട്ടി എന്നിവർ മരിച്ചു. 

സ്വകാര്യ ആശുപത്രിയിലെ നഴ്സായ സോണിയ സംഭവസ്ഥലത്തുവെച്ചുതന്നെ മരിച്ചിരുന്നു. ഗുരുതരമായി പരിക്കേറ്റ ശ്രീക്കുട്ടിയെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. വ്യാഴാഴ്ച രാവിലെ 6:45-ഓടെയാണ് നാടിനെ നടുക്കിയ അപകടമുണ്ടായത്.

ജോലിക്ക് പോകാനായി ബസ് സ്റ്റോപ്പിൽ നിൽക്കുകയായിരുന്ന യുവതികളെ പിന്നിൽനിന്ന് അമിതവേഗത്തിലെത്തിയ പിക്കപ്പ് വാൻ ഇടിച്ചുതെറിപ്പിക്കുകയായിരുന്നു. വാനിന്റെ ഡ്രൈവർ ഉറങ്ങിപ്പോയതാണ് അപകടകാരണമെന്നാണ് പ്രാഥമിക നിഗമനം. 

യുവതികളെ ഇടിച്ചശേഷം പിക്കപ്പ് വാൻ മുന്നിൽ നിർത്തിയിട്ടിരുന്ന ഓട്ടോറിക്ഷയിലും ഇടിച്ചു. ഓട്ടോ ഡ്രൈവറായ വിജയൻ അടക്കം മൂന്നുപേർക്ക് പരിക്കേറ്റു. ഇവരെ കൊട്ടാരക്കരയിലെ സ്വകാര്യ ആശുപത്രിയിൽ പ്രവേശിപ്പിച്ചു.

അപകടത്തിന് ശേഷം നിർത്താതെ പോയ വാനിന്റെ ഡ്രൈവർ, ഓടി രക്ഷപ്പെടാൻ ശ്രമിക്കുന്നതിനിടെ നാട്ടുകാരുടെ സഹായത്തോടെ പോലീസ് കസ്റ്റഡിയിലെടുത്തു. അപകടത്തിന്റെ സിസിടിവി ദൃശ്യങ്ങൾ സാമൂഹ്യമാധ്യമങ്ങളിൽ പ്രചരിക്കുന്നുണ്ട്. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചു.
 

ഈ ദുരന്തത്തെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Two young women were killed in an accident in Kollam.

#Kollam, #Kottarakkara, #Accident, #KeralaNews, #RoadSafety, #PickupVan