കൊൽക്കത്ത: (KVARTHA) ആർജി കർ മെഡിക്കൽ കോളേജ് ആശുപത്രിയിൽ ട്രെയിനി ഡോക്ടറെ ബലാത്സംഗം ചെയ്ത് കൊലപ്പെടുത്തിയ കേസിലെ പ്രതി സഞ്ജയ് റോയിക്ക് സിബിഐ കോടതി ജീവപര്യന്തം തടവ് ശിക്ഷ വിധിച്ചു.  കഴിഞ്ഞ വർഷം ഓഗസ്റ്റിൽ നടന്ന ഈ സംഭവം വലിയ പ്രതിഷേധങ്ങൾക്ക് വഴിവെച്ചിരുന്നു. കേസിൽ പ്രതി കുറ്റക്കാരനാണെന്ന് കോടതി നേരത്തെ കണ്ടെത്തിയിരുന്നു. സീൽദാ കോടതി ജഡ്ജി അനിർബൻ ദാസാണ് ശിക്ഷ വിധിച്ചത്. 50,000 രൂപ പിഴയും കോടതി വിധിച്ചിട്ടുണ്ട്.

പ്രതിക്ക് വധശിക്ഷ നൽകണമെന്ന് സിബിഐ അഭിഭാഷകൻ വാദിച്ചെങ്കിലും കോടതി അനുകൂലമായില്ല. 'ഇത് അപൂർവങ്ങളിൽ  അപൂർവമായ കേസുകളുടെ ഗണത്തിൽപ്പെടുന്നില്ല. അതുകൊണ്ടാണ് പ്രതിക്ക് ജീവപര്യന്തം തടവ് ശിക്ഷ വിധിക്കുന്നത്',  വിധി പ്രസ്താവിച്ചുകൊണ്ട് ജഡ്ജി അഭിപ്രായപ്പെട്ടു. ശിക്ഷയുടെ അളവിനെക്കുറിച്ച് എന്തെങ്കിലും പറയാനുണ്ടോ എന്ന് ജഡ്ജി ചോദിച്ചപ്പോൾ, സഞ്ജയ് റോയ് താൻ നിരപരാധിയാണെന്ന് വാദിച്ചു. 

'ഞാൻ ഒരു കാരണവുമില്ലാതെ കുടുങ്ങിപ്പോയതാണ്. ഞാൻ എപ്പോഴും ഒരു രുദ്രാക്ഷ മാല ധരിക്കാറുണ്ടെന്ന് ഞാൻ നേരത്തെ പറഞ്ഞിട്ടുണ്ട്. ഞാനാണ് കുറ്റം ചെയ്തതെങ്കിൽ, അത് കുറ്റകൃത്യം നടന്ന സ്ഥലത്ത് വെച്ച് പൊട്ടിയേനെ. എന്നെ സംസാരിക്കാൻ അനുവദിച്ചില്ല. പല രേഖകളിലും ഒപ്പിടാൻ എന്നെ നിർബന്ധിച്ചു. എനിക്ക് സംസാരിക്കാൻ ഒരവസരവും തന്നില്ല. ഇതെല്ലാം നിങ്ങൾ കണ്ടിട്ടുണ്ടല്ലോ സർ. ഞാനിത് നേരത്തെയും പറഞ്ഞിട്ടുണ്ട്', റോയ് കോടതിയിൽ പറഞ്ഞു. 

എന്നാൽ സിബിഐ അഭിഭാഷകൻ ഈ കേസ് അപൂർവങ്ങളിൽ  അപൂർവമായ കേസാണെന്നും പ്രതിക്ക് വധശിക്ഷ നൽകണമെന്നും ശക്തമായി വാദിച്ചു. 'ഇര ഒരു മികച്ച വിദ്യാർത്ഥിനിയും സമൂഹത്തിന് മുതൽക്കൂട്ടുമായിരുന്നു. ഈ സംഭവം സമൂഹത്തെ ഒന്നടങ്കം ഞെട്ടിച്ചു. മാതാപിതാക്കൾക്ക് അവരുടെ മകളെ നഷ്ടപ്പെട്ടു. ഡോക്ടർമാർക്ക് പോലും സുരക്ഷയില്ലെങ്കിൽ പിന്നെ എന്ത് പറയാനാണ്? വധശിക്ഷക്ക് മാത്രമേ സമൂഹത്തിന്റെ വിശ്വാസം പുനഃസ്ഥാപിക്കാൻ കഴിയൂ. നീതിന്യായ വ്യവസ്ഥയിലുള്ള സമൂഹത്തിന്റെ വിശ്വാസം നമ്മൾ വീണ്ടെടുക്കണം', സിബിഐ അഭിഭാഷകൻ വാദിച്ചു.

കഴിഞ്ഞ വർഷം ഓഗസ്റ്റ് ഒമ്പതിനാണ് 31 കാരിയായ ട്രെയിനി ഡോക്ടറെ ആശുപത്രിയിലെ കോൺഫറൻസ് റൂമിൽ മരിച്ച നിലയിൽ കണ്ടെത്തിയത്. രാത്രി മൂന്നിനും ആറിനുമിടയിലാണ് ബലാത്സംഗവും കൊലപാതകവും നടന്നതെന്ന് പൊലീസ് കണ്ടെത്തി. സംഭവത്തെ തുടർന്ന് ഡോക്ടർമാർ വലിയ പ്രതിഷേധം ആരംഭിച്ചിരുന്നു. ഓഗസ്റ്റ് 10 ന് പോലീസ് ടാസ്‌ക് ഫോഴ്സ് രൂപീകരിക്കുകയും അന്വേഷണം ആരംഭിച്ച് ആറ് മണിക്കൂറിനുള്ളിൽ പ്രതി സഞ്ജയ് റോയിയെ അറസ്റ്റ് ചെയ്യുകയും ചെയ്തു. സിസിടിവി ദൃശ്യങ്ങൾക്ക് പുറമേ, സെമിനാർ ഹാളിൽ നിന്ന് പൊട്ടിയ ബ്ലൂടൂത്ത് ഇയർഫോൺ കണ്ടെത്തിയിരുന്നു. ഇത് പ്രതിയുടെ ഫോണുമായി ബന്ധിപ്പിച്ചിരുന്നു. ഈ തെളിവാണ് പ്രതിയെ പിടികൂടാൻ പൊലീസിനെ സഹായിച്ചത്.

#KolkataCase #RGKar #AssaultMurder #JusticeForVictim #CBICourt