'എന്റെ മകന്റെ മരണത്തിന് ഉത്തരവാദികൾ അവരാണ്', ഒരു പിതാവിന്റെ നെഞ്ചുപിടയുന്ന കുറിപ്പ്; മിനികൂപ്പർ ഇടിച്ച് 3 പേരെ കൊന്നവന് സുഖവാസം ഒരുക്കുമ്പോൾ പാവപ്പെട്ടവന് മറ്റൊരു നിയമമോ? കേരളം മാപ്പ് പറയേണ്ട സത്യങ്ങൾ

റെജിൻ പോൾ 

(KVARTHA) കേരളത്തിന്റെ മനസാക്ഷിയെ ഞെട്ടിച്ചുകൊണ്ട് നെടുമ്പാശ്ശേരിയിൽ നടന്ന ദാരുണമായ വാഹനാപകടവും, അതേത്തുടർന്ന് പ്രതിക്ക് ഭരണകൂട സംവിധാനങ്ങളും പൊലീസും  നൽകുന്ന 'രാജകീയ' പരിഗണനകളും ഒരുഭാഗത്ത് ചർച്ചയാകുമ്പോൾ, മറ്റൊരു കോണിൽ പാവപ്പെട്ട ഒരു ടാക്സി ഡ്രൈവറുടെ കുടുംബം പൊലീസിന്റെ അതിക്രമങ്ങളാൽ തകർത്തെറിയപ്പെട്ടതിന്റെ ഞെട്ടിക്കുന്ന വിവരങ്ങളാണ് പുറത്തുവരുന്നത്. എറിയാട് പിഎസ്എൻ കവല പഴൂപറമ്പിൽ മുഹമ്മദ് അസ്‌ലം (18) ജീവനൊടുക്കിയ സംഭവത്തിൽ പൊലീസിനെതിരെ ഗുരുതര ആരോപണ പിതാവ് നൗഷാദ് സമൂഹമാധ്യമങ്ങളിൽ പങ്കുവച്ച കുറിപ്പിലാണ് പൊലീസിനെതിരെ ഗുരുതര ആരോപണം ഉള്ളത്. 

നെടുമ്പാശ്ശേരിയിൽ അമിതവേഗത്തിലും ലഹരിയുടെ  സ്വാധീനത്തിലും പാഞ്ഞെത്തിയ ആഡംബര മിനികൂപ്പർ കാർ ഇടിച്ചുതെറിപ്പിച്ചത് മൂന്ന് നിരപരാധികളുടെ ജീവനാണ്. സ്‌കൂട്ടർ യാത്രികരായ ദേവിക, ഗോപിക, ഇജാസ് എന്നിവർ സംഭവസ്ഥലത്ത് തന്നെ ദാരുണമായി മരണപ്പെട്ടു. എന്നാൽ ഇത്രയും ഭീകരമായ ഒരു നരഹത്യ നടത്തിയിട്ടും, പ്രതിയായ സുഹൈൽ സജീവിനെതിരെയും കൂട്ടാളികൾക്കെതിരെയും പ്രഥമ വിവര റിപ്പോർട്ടിൽ പോലും വെള്ളം ചേർക്കാനും പ്രതിയെ സംരക്ഷിക്കാനുമുള്ള വ്യഗ്രതയാണ് കേരള പൊലീസിന്റെ ഭാഗത്തുനിന്നും ഉണ്ടായത് എന്ന ആക്ഷേപം ശക്തമാണ്. 

ബാറുകളിൽ കയറി മദ്യപിച്ച്, മൊബൈലിൽ ദൃശ്യങ്ങൾ പകർത്തി, റോഡിലൂടെ മരണത്തിന്റെ ദൂതനായി പാഞ്ഞ ആഡംബര കാർ ഡ്രൈവർക്ക് സ്റ്റേഷനിൽ ലഭിക്കുന്ന പവറും പുഞ്ചിരിയും കാണുമ്പോൾ, ഒരു സാധാരണക്കാരന്റെ ജീവിതത്തിന് ഈ നാട്ടിൽ എന്ത് വിലയാണുള്ളതെന്ന ചോദ്യം ഉയരുകയാണ്. പണവും സ്വാധീനവുമുണ്ടെങ്കിൽ ഏത് കൊടുംകുറ്റവും നിഷ്പ്രയാസം തേച്ചുമായ്ച്ചുകളയാം എന്നതിന്റെ ഏറ്റവും പുതിയ ഉദാഹരണമായി ഈ സംഭവം മാറിക്കഴിഞ്ഞു.

പിതാവിന്റെ വേദന

പ്രായപൂർത്തിയാകാത്ത പെൺകുട്ടിയുമായി ഇൻസ്റ്റഗ്രാം വഴി പരിചയപ്പെടുകയും പിന്നീട് ഭീഷണിപ്പെടുത്തി 20 പവൻ സ്വർണം കവരുകയും ചെയ്തുവെന്ന കേസിലാണ് മുഹമ്മദ് അസ്‌ലം, സഹോദരൻ മുഹമ്മദ് സഹൽ (23) എന്നിവരെ പൊലീസ് അറസ്റ്റ് ചെയ്തത്. ജാമ്യം കിട്ടി പുറത്തിറങ്ങി ദിവസങ്ങൾ പിന്നിട്ടപ്പോഴാണ് അസ്‌ലമിനെ മരിച്ച നിലയിൽ കണ്ടെത്തിയത്.

ഈ നാടിന്റെ നീതിബോധത്തെ ചോദ്യം ചെയ്യുന്ന ഇത്തരം സംഭവങ്ങൾ നിലനിൽക്കുമ്പോഴാണ്, മറ്റൊരു കോണിൽ നിന്ന് ഒരു സാധാരണ ടാക്സി ഡ്രൈവറുടെ ഹൃദയം തകർക്കുന്ന അനുഭവം പുറത്തുവരുന്നത്. കഴിഞ്ഞ സെപ്റ്റംബർ 27-ാം തീയതി വൈകുന്നേരത്തോടെയാണ് കൊടുങ്ങല്ലൂർ ജനമൈത്രി പൊലീസ് സ്റ്റേഷനിൽ നിന്നും ആ ദുരന്ത കോൾ ആ പിതാവിനെ തേടിയെത്തുന്നത്. തന്റെ ഇളയ മകൻ അസ്‌ലം സ്റ്റേഷനിലാണെന്നും പെട്ടെന്ന് എത്തണമെന്നും ആവശ്യപ്പെട്ടുള്ള ആ വിളി ഒരു കുടുംബത്തിന്റെ മുഴുവൻ വെളിച്ചവും കെടുത്തുന്നതിന്റെ തുടക്കമായിരുന്നു. 

താനൊരു ടാക്സി ഡ്രൈവറാണെന്നും ഓട്ടം കഴിഞ്ഞ് ഉടൻ എത്താമെന്ന് പറഞ്ഞ ആ അച്ഛനോട് തികഞ്ഞ ധാർഷ്ട്യത്തോടെയാണ് സി ഐ ബൈജു പെരുമാറിയത് എന്നാണ് ആക്ഷേപം. സ്റ്റേഷനിൽ എത്തിയ ആ പിതാവ് കണ്ടത് സ്വന്തം മക്കളെ ക്രൂരമായി പീഡിപ്പിച്ച് അവശരാക്കിയ പൊലീസുകാരെയാണ്. 

പ്രായപൂർത്തിയാകാത്ത ഇളയ മകനെയും ഇരുപത്തിരണ്ടുകാരനായ മൂത്ത മകനെയും കള്ളക്കേസിൽ കുടുക്കി, പെൺകുട്ടിയുടെ കൈയിൽ നിന്നും സ്വർണവും പണവും തട്ടിയെടുത്തു എന്നാരോപിച്ച് വലിയൊരു മാധ്യമ വിചാരണയ്ക്കാണ് പോലീസ് കളമൊരുക്കിയത് എന്ന് പിതാവ് ഫേസ്ബുക്കിൽ കുറിക്കുന്നു. 

യാതൊരുവിധ ശാസ്ത്രീയ തെളിവുകളോ അന്വേഷണമോ നടത്താതെ, പ്രതികൾക്ക് പരവതാനി വിരിക്കുന്ന അതേ പൊലീസ് സംവിധാനം തന്നെയാണ് പാവപ്പെട്ട ഒരു കുടുംബത്തിലെ കുട്ടികളുടെ മേൽ ക്രൂരമായ മർദ്ദനമുറകൾ അഴിച്ചുവിട്ടത്.

നിയമത്തിന്റെ കാവൽ

കേരളത്തിലെ പല പോലീസ് സ്റ്റേഷനുകളിലും ഇപ്പോഴും അരങ്ങേറിക്കൊണ്ടിരിക്കുന്ന ഭീകരമായ അധികാര പ്രയോഗങ്ങളുടെ നേർക്കാഴ്ചയാണ് കൊടുങ്ങല്ലൂർ സ്റ്റേഷനിൽ കാണാൻ കഴിഞ്ഞത് എന്ന് ആരോപണമുണ്ട്. ഒരു പെൺകുട്ടിയുമായി ഇഷ്ടത്തിലായിരുന്നു എന്ന ഒറ്റക്കാരണത്താൽ, ആ കുട്ടിയുടെ വീട്ടുകാരുടെ പരാതിയുടെ അടിസ്ഥാനത്തിൽ മൂന്ന് ദിവസത്തോളമാണ് മക്കളെ സി ഐ ബൈജുവും എസ്ഐ അതുൽ മോഹനും ചേർന്ന് കസ്റ്റഡിയിൽ വെച്ച് ക്രൂരമായി മർദ്ദിച്ചത് എന്ന് പിതാവ് കുറിക്കുന്നുമ

'മകനെ രക്ഷിക്കാൻ വേണ്ടി മൂത്ത മകൻ താനാണ് കുറ്റം ചെയ്തതെന്ന് കരഞ്ഞുകൊണ്ട് ഏറ്റുപറയേണ്ടി വരുന്ന സാഹചര്യത്തിലേക്ക് കാര്യങ്ങൾ എത്തിക്കപ്പെട്ടു. സാങ്കേതികവിദ്യകളും തെളിവെടുപ്പ് സംവിധാനങ്ങളും ഇത്രയധികം വളർന്നിട്ടും, ഒരു ഇന്നോവ കാർ ആരുടെ പേരിലാണെന്ന് പോലും പരിശോധിക്കാൻ മെനക്കെടാതെ, കിട്ടിയ ഇരകളെ ക്രൂരമായി തല്ലിത്തകർക്കാനാണ് ഉദ്യോഗസ്ഥർ തുനിഞ്ഞത്. പ്രായപൂർത്തിയാകാത്ത പയ്യനെ ജുവനൈൽ ബോർഡിന് മുന്നിൽ ഹാജരാക്കിയപ്പോൾ അവിടെയും പോലീസിന്റെ സ്വാധീനം വ്യക്തമായി പ്രകടമായിരുന്നു. 

ജാമ്യം ലഭിക്കാതിരിക്കാൻ ബോർഡ് മെമ്പർമാർ മുൻവിധിയോടെ പെരുമാറുകയും, സ്റ്റേഷനിൽ നിന്നും സി ഐ വിളിച്ചിരുന്നുവെന്ന് അവർ തന്നെ തുറന്നുപറയുകയും ചെയ്തത് ഈ നിയമവിരുദ്ധ കൂട്ടുകെട്ടിന്റെ ആഴം വ്യക്തമാക്കുന്നു. പണക്കാരുടെ മക്കൾക്ക് കോടതിയിലും സ്റ്റേഷനിലും പരമാവധി ആനുകൂല്യങ്ങളും പദവികളും ലഭിക്കുമ്പോൾ, സാധാരണക്കാരുടെ മക്കൾക്ക് മുന്നിൽ കസ്റ്റഡി മുറികളും പീഡനങ്ങളും മാത്രമാണ് വിധിക്കപ്പെടുന്നത്', പിതാവിന്റെ വാക്കുകളിൽ വായിക്കാം.

ജീവന്റെ ദാരുണാന്ത്യം

പൊലീസിന്റെയും വ്യവസ്ഥിതിയുടെയും വേട്ടയാടലിനൊടുവിൽ ജാമ്യത്തിലിറങ്ങി വന്ന ആ പതിനെട്ടുകാരൻ അനുഭവിച്ച മാനസിക സംഘർഷം അളവറ്റതായിരുന്നു. സ്വന്തം ജ്യേഷ്ഠൻ കള്ളക്കേസിൽപ്പെട്ട് ജയിലിൽ കഴിയുന്നതും, തങ്ങൾ കാരണം കുടുംബത്തിന് ഉണ്ടായ കളങ്കവും ആ പിഞ്ചുമനസ്സിൽ ഉണ്ടാക്കിയ ആഘാതം ചെറുതല്ലായിരുന്നു. ജാമ്യം ലഭിച്ച് വീട്ടിലെത്തി രണ്ട് ദിവസങ്ങൾ കഴിഞ്ഞപ്പോൾ, സബ് ജയിലിൽ കഴിയുന്ന ചേട്ടനെ ഒന്നു കാണണമെന്ന് അവൻ ആഗ്രഹം പ്രകടിപ്പിച്ചു. അമ്മയോടൊപ്പം ജയിലിൽ പോയി ചേട്ടനെ കണ്ട് മടങ്ങിവരുന്ന വഴിയിൽ അവൻ കഴിക്കാൻ വാങ്ങിയ കുഴിമന്തി അവന്റെ അവസാനത്തെ ആഗ്രഹമായി മാറുമെന്ന് ആരും കരുതിയിരുന്നില്ല. 

രാത്രി കുടുംബത്തോടൊപ്പം സന്തോഷത്തോടെ സംസാരിച്ചിരുന്ന ആ കുട്ടി, നേരം വെളുത്തപ്പോൾ ഉണർന്നത് മരണത്തിന്റെ നിശബ്ദതയിലേക്കാണ്. സ്റ്റേഷനിലെ മർദ്ദനങ്ങളും അപമാനവും താങ്ങാനാവാതെ ആ പതിനെട്ടുകാരൻ തന്റെ ജീവിതം സ്വയം അവസാനിപ്പിക്കുകയായിരുന്നുവെന്ന് പിതാവ് ആരോപിക്കുന്നു. അടുത്ത ദിവസം ജയിലിൽ നിന്നും വിലങ്ങണിയിച്ചാണ് മൂത്ത മകനെ സഹോദരന്റെ ചേതനയറ്റ ശരീരം കാണാൻ പോലീസ് കൊണ്ടുവന്നത്. ആ ദൃശ്യം കണ്ടുനിന്ന നാടിന്റെ മുഴുവൻ കണ്ണുകളും ഈറനണിഞ്ഞു. സ്നേഹിച്ചതിന്റെ പേരിലും പൊലീസിന്റെ അതിക്രമങ്ങൾക്ക ഇരയായതിന്റെ പേരിലും പൊലിഞ്ഞുപോയത് ഒരു കുടുംബത്തിന്റെ മുഴുവൻ പ്രതീക്ഷകളാണ്.

പിതാവിന്റെ ചോദ്യങ്ങൾ

ഇന്ന് ഈ കേരള സമൂഹത്തിന്റെ മനസാക്ഷിയോട് ആ ദുഃഖിതനായ പിതാവിന് ചോദിക്കാനുള്ളത് ലളിതവും എന്നാൽ ശക്തവുമായ ചില ചോദ്യങ്ങളാണ്. ഒരു പരാതി ലഭിച്ചാൽ അതിന്റെ നിജസ്ഥിതി പരിശോധിക്കാതെയും യാതൊരുവിധ തെളിവുകളുമില്ലാതെയും പ്രായപൂർത്തിയാകാത്ത കുട്ടികളെ മൃഗീയമായി തല്ലിച്ചതക്കാൻ പൊലീസിന് ആരാണ് അധികാരം നൽകിയത്? നെടുമ്പാശ്ശേരിയിലെ മിനികൂപ്പർ അപകടത്തിലെ പ്രതികൾക്ക് കിട്ടുന്ന അതേ വേഗതയിലും താൽപ്പര്യത്തിലുമാണോ പാവപ്പെട്ടവരുടെ കാര്യത്തിൽ പൊലീസ് നിയമം നടപ്പിലാക്കുന്നത്? 

മോഷണക്കുറ്റവും ഭീഷണിയും ആരോചിച്ച പെൺകുട്ടിയുടെ പശ്ചാത്തലമോ അവളുടെ ഫോൺ രേഖകളോ കൃത്യമായി പരിശോധിക്കാൻ തയ്യാറാകാത്തത് ആരെ സംരക്ഷിക്കാനാണ്? സ്റ്റേഷനുകളിൽ പരാതിയുമായി എത്തുന്ന സാധാരണക്കാരായ രക്ഷിതാക്കളെ മാന്യമായി പോലും പരിഗണിക്കാത്ത ഈ ഉദ്യോഗസ്ഥ വൃന്ദം എന്ത് നീതിയാണ് ജനങ്ങൾക്ക് നൽകുന്നത്? സ്വന്തം മക്കളെ സ്നേഹിച്ചതിന്റെ പേരിൽ ഒരുവനെ കൊലയ്ക്ക് കൊടുക്കുകയും മറ്റേവനെ ജയിലിലാക്കുകയും ചെയ്ത കൊടുങ്ങല്ലൂർ സ്റ്റേഷനിലെ ഉദ്യോഗസ്ഥരെ നിയമത്തിന് മുന്നിൽ കൊണ്ടുവന്ന് അർഹമായ ശിക്ഷ വാങ്ങി നൽകാൻ ഈ സമൂഹം ഇനിയും തയ്യാറായില്ലെങ്കിൽ, നാളെ ഇത്തരം ദാരുണമായ അന്ത്യങ്ങൾ ആവർത്തിക്കപ്പെടുക തന്നെ ചെയ്യും.

'ഒരു കറുത്ത രാത്രിയുടെ ബാക്കിപത്രമായി എന്റെ മകൻ യാത്രയായി, പക്ഷേ അവനെ കൊന്നത് ഈ കാക്കിയണിഞ്ഞ നിയമമല്ലേ സാറെ?' എന്ന് പൊട്ടിക്കരഞ്ഞുകൊണ്ട് ഒരു പിതാവ് ചോദിക്കുമ്പോൾ, കേരളത്തിലെ ഓരോ മനസാക്ഷിയുള്ള മനുഷ്യനും തലകുനിക്കേണ്ടി വരുന്നുണ്ട്. തങ്ങൾ തെറ്റൊന്നും ചെയ്തിട്ടില്ലെന്നും വെറുമൊരു പ്രണയത്തിന്റെ പേരിലാണ് കള്ളക്കേസിൽ കുടുക്കി മക്കളെ ക്രൂരമായി മർദ്ദിച്ചതെന്നും ആ അച്ഛൻ വിറയാർന്ന ശബ്ദത്തിൽ ആവർത്തിക്കുമ്പോൾ, പണത്തിന്റെയും അധികാരത്തിന്റെയും സ്വാധീനത്തിൽ നീതി ചവിട്ടി അരയ്ക്കപ്പെടുന്ന ഒരു വ്യവസ്ഥിതിയുടെ നേർക്കാഴ്ചയാണ് നമുക്ക് മുന്നിൽ തെളിയുന്നത്. നെടുമ്പാശ്ശേരിയിൽ നിരപരാധികളുടെ ജീവനെടുത്ത ആഡംബര കാർ ഡ്രൈവർമാർക്ക് സ്റ്റേഷനിൽ രാജകീയ സ്വീകരണവും സംരക്ഷണവും കിട്ടുമ്പോൾ, വിയർപ്പൊഴുക്കി ജീവിക്കുന്ന ഒരു ടാക്സി ഡ്രൈവറുടെ മക്കൾക്ക് സ്റ്റേഷനിൽ കിട്ടിയത്, ആരോപണങ്ങൾ ശരിയാണെങ്കിൽ കസ്റ്റഡി മർദനവും ലോക്കപ്പ് പീഡനവുമാണ്. 'എന്റെ മോൻ ജീവനോടെ തിരിച്ചുവരില്ലെന്ന് എനിക്കറിയാം, എങ്കിലും മറ്റൊരു അച്ഛനും ഈ ഗതി വരാതിരിക്കാൻ എന്റെ മക്കൾക്ക് നീതി കിട്ടണ്ടേ?' എന്ന ആ പിതാവിന്റെ ചോരതുളുമ്പുന്ന വാക്കുകൾ ഭരണകൂടത്തിന്റെ കണ്ണ് തുറപ്പിക്കേണ്ടതാണ്.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. 

Article Summary: Naushad, a taxi driver from Eriyad, has raised serious allegations against the police following the suicide of his 18-year-old son, Muhammad Aslam, alleging that Aslam and his elder brother were brutally beaten and falsely implicated in a case at the Kodungallur police station.

#Kvartha #Kodungallur #PoliceCustodyDeath #KeralaPolice #NaushadAllegations #WayanadNews #KeralaNews #MalayalamNews #AmmuNews