വ്യവസായിയിൽ നിന്ന് സമ്മാനം കൈപ്പറ്റിയ ദൃശ്യങ്ങൾ റീൽസായി പുറത്ത്; ഉന്നത പോലീസ് ഉദ്യോഗസ്ഥർക്കെതിരെ ആഭ്യന്തര വകുപ്പ് അന്വേഷണം

കണ്ണൂർ: (KVARTHA) ടൗൺ സ്റ്റേഷൻ ഹൗസ് ഓഫീസർ (എസ്.എച്ച്.ഒ) ശ്രീജിത്ത് കൊടേരിയും അസിസ്റ്റന്റ് പോലീസ് കമ്മീഷണർ (എ.സി.പി) പ്രദീപ് കണ്ണിപ്പൊയിലും ഒരു വ്യവസായിയിൽ നിന്ന് ഉപഹാരം സ്വീകരിച്ചത് വിവാദമാകുന്നു. 

വ്യവസായിയുടെ കണ്ണൂർ കാൽടെക്സിലുള്ള സ്ഥാപനത്തിലെത്തിയാണ് എസ്.എച്ച്.ഒ വിലപിടിപ്പുള്ള സമ്മാനം കൈപ്പറ്റിയത്. ഈ ദൃശ്യങ്ങൾ വ്യവസായിയായ വ്ലോഗർ തന്നെ സാമൂഹ്യ മാധ്യമങ്ങളിൽ പങ്കുവെച്ചിട്ടുണ്ട്. എസ്.എച്ച്.ഒയുടെ ഈ പ്രവൃത്തി പോലീസ് ആക്ടിന്റെ ലംഘനമാണെന്നും നടപടി ആവശ്യമാണെന്നും ചൂണ്ടിക്കാട്ടി മുഖ്യമന്ത്രിക്ക് പരാതി ലഭിച്ചിട്ടുണ്ട്.

ഈ സംഭവത്തിൽ എസ്.എച്ച്.ഒക്കെതിരെ സ്പെഷ്യൽ ബ്രാഞ്ച് റിപ്പോർട്ട് സമർപ്പിച്ചിട്ടുണ്ട്. എ.സി.പി പ്രദീപ് കണ്ണിപ്പൊയിൽ യൂണിഫോമിലെത്തിയാണ് ഉപഹാരം വാങ്ങിയത്. ഇതിന്റെ ദൃശ്യങ്ങളും വ്യാപാരി റീൽസായി പങ്കുവെച്ചിട്ടുണ്ട്. എന്നാൽ, ഒരു ബന്ധുവിന്റെ ഗൃഹപ്രവേശനത്തിന് നൽകാനായി ഉരുളി വാങ്ങാൻ പോയപ്പോൾ കടയുടമ സൗജന്യമായി മുത്തപ്പൻ വിളക്ക് നൽകുകയായിരുന്നുവെന്നാണ് ശ്രീജിത്ത് കൊടേരിയുടെ വിശദീകരണം. 

ഒരാഴ്ച മുൻപ് മുഖ്യമന്ത്രിക്ക് പരാതി നൽകിയയാൾക്കെതിരെ ഉപഭോക്തൃ കോടതി ജീവനക്കാർ നൽകിയ പരാതിയിൽ കേസെടുത്തിരുന്നുവെന്നും, ഇതിന്റെ വൈരാഗ്യത്തിലാണ് മുഖ്യമന്ത്രിക്ക് പരാതി നൽകിയതെന്നുമാണ് ശ്രീജിത്ത് കൊടേരിയുടെ വാദം.

പോലീസ് ഉദ്യോഗസ്ഥർക്ക് സമ്മാനം നൽകിയ ദൃശ്യങ്ങൾ പുറത്ത്; ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Summary: Kerala police officers investigated for accepting gifts from businessman.

#KeralaPolice #GiftControversy #Kannur #PoliceAct #Investigation #Transparency