പീഡനവിവരം പെൺകുട്ടി സമൂഹമാധ്യമങ്ങളിൽ പങ്കുവെച്ചതോടെ കേസ്: മൂന്ന് യുവാക്കൾ അറസ്റ്റിൽ

കണ്ണൂർ: (KVARTHA) നഗരത്തിലെ താഴെ ചൊവ്വയിൽ പ്രായപൂർത്തിയാകാത്ത പെൺകുട്ടിയെ കൂട്ടബലാത്സംഗം ചെയ്ത പോക്സോ കേസിൽ മൂന്ന് യുവാക്കൾ റിമാൻഡിൽ. 20 വയസ്സുള്ള ഈ യുവാക്കൾ പ്രണയം നടിച്ച് 15 വയസ്സുകാരിയായ പെൺകുട്ടിയെ വലയിൽ വീഴ്ത്തി പീഡിപ്പിക്കുകയായിരുന്നു.

വി.വി. സംഗീത്, കെ. അഭിഷേക്, പി. ആകാശ് എന്നിവരെയാണ് കണ്ണൂർ ടൗൺ പോലീസ് ഇൻസ്പെക്ടർ ശ്രീജിത്ത് കൊടേരി അറസ്റ്റ് ചെയ്ത് കണ്ണൂർ കോടതിയിൽ ഹാജരാക്കി റിമാൻഡ് ചെയ്തത്.

15 വയസ്സുകാരിയായ പെൺകുട്ടിയുടെ പരാതിയിൽ പോക്സോ വകുപ്പ് പ്രകാരമാണ് പ്രതികളെ കണ്ണൂർ ടൗൺ പോലീസ് അറസ്റ്റ് ചെയ്തത്. ആറു മാസം മുൻപാണ് സംഭവം. ഉത്സവപ്പറമ്പിൽവെച്ച് പരിചയപ്പെട്ട പെൺകുട്ടിയുമായി സാമൂഹിക മാധ്യമങ്ങളിലൂടെ അടുപ്പം സ്ഥാപിച്ച പ്രതികൾ പ്രണയം നടിച്ച് ലോഡ്ജിൽ എത്തിച്ച് ബലപ്രയോഗത്തിലൂടെ മയക്കുമരുന്ന് കലർത്തിയ ശീതളപാനീയം കുടിപ്പിച്ച് പീഡിപ്പിച്ചു എന്നാണ് പരാതി.

ഈ കേസിൽ പത്തോളം പ്രതികളുണ്ടെന്നാണ് പോലീസ് പറയുന്നത്. താൻ പീഡിപ്പിക്കപ്പെട്ട വിവരം പെൺകുട്ടി സാമൂഹിക മാധ്യമങ്ങളിൽ പങ്കുവെച്ചിരുന്നു. ഇതേത്തുടർന്ന് എടക്കാട് പോലീസ് സ്വമേധയാ അന്വേഷണം ആരംഭിച്ച കേസ്, സംഭവം നടന്നത് കണ്ണൂർ ടൗൺ പരിധിയിലായതിനാൽ കണ്ണൂർ ടൗൺ പോലീസിന് കൈമാറുകയായിരുന്നു. 

ഇരയായ പെൺകുട്ടിയുടെ മൊഴിയെടുത്ത ശേഷമാണ് കണ്ണൂർ ടൗൺ പോലീസ് അന്വേഷണം ആരംഭിച്ചത്. മറ്റ് പ്രതികൾ സംഭവത്തിനുശേഷം ഒളിവിൽ പോയിരിക്കുകയാണ്. ഇവർക്കായി അന്വേഷണം ഊർജ്ജിതമാക്കിയതായി കണ്ണൂർ ടൗൺ പോലീസ് അറിയിച്ചു.

പീഡനത്തിനുശേഷം അവശയായ പെൺകുട്ടിയെ ഉപേക്ഷിച്ച് കടന്നുകളയുകയായിരുന്നു. പീഡനത്തിന്റെ ആഘാതത്തിൽ മനോനില തകർന്ന പെൺകുട്ടിയുടെ സ്വഭാവവ്യത്യാസം കണ്ട് വീട്ടുകാർ ചോദിച്ചപ്പോഴാണ് സംഭവം പുറത്തറിയുന്നത്. ഇതേത്തുടർന്ന് രക്ഷിതാക്കൾ പോലീസിൽ പരാതി നൽകുകയായിരുന്നു.

കണ്ണൂരിലെ ഈ സംഭവത്തെക്കുറിച്ച് നിങ്ങളുടെ അഭിപ്രായം എന്താണ്? ഈ വാർത്ത സുഹൃത്തുക്കളുമായി പങ്കുവെയ്ക്കൂ.

Article Summary: Three young men arrested in Kannur for minor's abuse.

#Kannur #POCSO #Arrest #Crime #Kerala #Justice