വിശ്വസിച്ചവർക്ക് നഷ്ടക്കണക്ക് മാത്രം; കായിക സംഘടനാ നേതാവിനെതിരെ കോടികളുടെ നിക്ഷേപത്തട്ടിപ്പ് പരാതി

കണ്ണൂർ: (KVARTHA) പ്രവാസി പുനരധിവാസ പദ്ധതിയുടെ പേരിൽ പ്രവാസികളിൽ നിന്ന് കോടികൾ നിക്ഷേപം സ്വീകരിച്ച് തട്ടിപ്പ് നടത്തിയതായി പരാതി. ഗ്ലോബൽ കേരള പ്രവാസി വെൽഫെയർ അസോസിയേഷന്റെ സംസ്ഥാന സെക്രട്ടറിയും കേരള സ്റ്റേറ്റ് റെസ്ലിംഗ് അസോസിയേഷന്റെ പ്രസിഡന്റുമായ കണ്ണൂർ തയ്യിൽ കുറുവയിലെ മൂരിയന്റ കത്ത് നിസാമുദ്ദീനെതിരെയാണ് നിക്ഷേപകരായ പ്രവാസികൾ വാർത്താ സമ്മേളനത്തിൽ ആരോപണം ഉന്നയിച്ചത്. മൂന്ന് കോടിയിലധികം രൂപ തട്ടിയെടുത്തതായാണ് പരാതി.

2017-ൽ ഗൾഫ് രാജ്യങ്ങളിൽ വെച്ചാണ് നിസാമുദ്ദീൻ ഉയർന്ന ലാഭവിഹിതവും നാട്ടിലെത്തിയാൽ സ്ഥിരം ജോലിയും വാഗ്ദാനം ചെയ്ത് പ്രവാസികളിൽ നിന്ന് നിക്ഷേപം സ്വീകരിച്ചതെന്നാണ് പരാതിയിൽ പറയുന്നത്. ചെറിയ ജോലികൾ ചെയ്ത് ജീവിച്ചിരുന്ന പ്രവാസികളെയാണ് ഇത്തരത്തിൽ വഞ്ചിച്ചതെന്നും പരാതിക്കാർ ആരോപിക്കുന്നു.

നിക്ഷേപം സ്വീകരിച്ച ശേഷം ചെറുവത്തൂരിലും കണ്ണൂർ പള്ളിക്കുന്നിലുമായി വിവിധ സ്ഥാപനങ്ങൾ തുടങ്ങിയിരുന്നു. എന്നാൽ, പിന്നീട് ഇവയെല്ലാം നഷ്ടത്തിലാണെന്ന് കാണിച്ച് അടച്ചുപൂട്ടിയെന്നും പരാതിക്കാർ പറയുന്നു. ചെറുവത്തൂരിലെ വ്യവസായ സംരംഭം അന്നത്തെ വ്യവസായ വകുപ്പ് മന്ത്രിയായിരുന്ന ഇ പി ജയരാജനായിരുന്നു ഉദ്ഘാടനം ചെയ്തത്. 

നിലവിൽ തളിപ്പറമ്പ് നാടുകാണിയിൽ ചപ്പാത്തി, പെറോട്ട തുടങ്ങിയവ ഉത്പാദിപ്പിക്കുന്ന ഫാക്ടറി പ്രവർത്തിക്കുന്നുണ്ട്. എന്നാൽ, ഈ സംരംഭവും നഷ്ടത്തിലാണെന്ന ഓഡിറ്റ് റിപ്പോർട്ടാണ് നിക്ഷേപകർക്ക് നൽകിയിരിക്കുന്നതെന്നും പരാതിയിലുണ്ട്.

കഴിഞ്ഞ അഞ്ച് വർഷമായി നടത്തുന്ന ഈ വ്യവസായ സംരംഭത്തിൽ മുതൽമുടക്കിയ പ്രവാസികൾക്ക് ഇതുവരെ വാഗ്ദാനം ചെയ്ത ലാഭവിഹിതമോ മുതൽമുടക്കിയ തുകയോ തിരികെ ലഭിച്ചിട്ടില്ലെന്നും പരാതിക്കാർ വാർത്താ സമ്മേളനത്തിൽ അറിയിച്ചു. നിസാമുദ്ദീനും അദ്ദേഹത്തിന്റെ ഭാര്യയും സുഹൃത്തും ചേർന്നാണ് കമ്പനിയുടെ കാര്യങ്ങൾ നോക്കിനടത്തുന്നതെന്നും പരാതിയിലുണ്ട്. 

പല നിക്ഷേപകരിൽ നിന്നും അര ലക്ഷം മുതൽ പത്ത് ലക്ഷം രൂപ വരെ ബാങ്ക് അക്കൗണ്ടുകൾ വഴി സ്വീകരിച്ചെങ്കിലും, ഈ തുകകളൊന്നും കമ്പനിയുടെ നിക്ഷേപമായി രേഖപ്പെടുത്തിയിട്ടില്ലെന്നും ആരോപണമുയർന്നിട്ടുണ്ട്.

110 പേരിൽ നിന്നായി മൂന്ന് കോടിയിലധികം രൂപ സ്വീകരിച്ചിട്ടുണ്ടെന്നാണ് നിക്ഷേപകർ ആരോപിക്കുന്നത്. ഇതിന് പുറമെ പലരിൽ നിന്നും പണം വാങ്ങി കമ്പനിയുടെ കണക്കുകളിൽ ചേർക്കാതെ വഞ്ചിച്ചിട്ടുണ്ടെന്നും പരാതിക്കാർ പറഞ്ഞു. 

പള്ളിക്കുന്നിൽ വാടകയ്ക്ക് എടുത്ത ബഹുനില കെട്ടിടം നിജാം ഇന്റർനാഷണൽ പ്രൈവറ്റ് ലിമിറ്റഡിന്റെ ഓഫീസ് സമുച്ചയമാണെന്ന് തെറ്റിദ്ധരിപ്പിച്ച് സംഘടനയിലൂടെ ക്യാമ്പയിൻ നടത്തിയാണ് പണം സ്വീകരിച്ചതെന്നും പരാതിയിൽ പറയുന്നു.

സംഭവത്തിൽ പോലീസിൽ പരാതി നൽകിയിട്ടുണ്ടെന്ന് നിക്ഷേപക കൂട്ടായ്മയുടെ കൺവീനർ കെ എൻ അബ്ദുൾ നാസർ, ചെയർമാൻ ഉമ്മർ കുട്ടി, രാഗേഷ് മാവില, ഷരീഫ് കളത്തിങ്ങൽ, ഫാത്തിമ കളത്തിങ്ങൽ എന്നിവർ അറിയിച്ചു.

ഈ തട്ടിപ്പിനെക്കുറിച്ച് നിങ്ങളുടെ അഭിപ്രായം എന്താണ്? ഈ വാർത്ത കൂടുതൽ ആളുകളിലേക്ക് ഷെയർ ചെയ്യൂ.

Article Summary: Sports association leader accused of multi-crore investment fraud against NRIs.

#KeralaNews #InvestmentFraud #Kannur #NRIscam #FinancialCrime #PoliceComplaint