പോലീസ്‌ ആസ്ഥാനത്ത് അതിക്രമിച്ച്‌ കയറി പിറന്നാൾ ആഘോഷം: യുവതിയടക്കം അഞ്ച് പേർക്കെതിരെ കേസ്
 

കണ്ണൂർ: (KVARTHA) പോലീസ്‌ ആസ്ഥാനത്ത് അതിക്രമിച്ച്‌ കയറി പിറന്നാൾ ആഘോഷം നടത്തിയ സംഭവത്തിൽ യുവതി ഉൾപ്പെടെ അഞ്ച് പേർക്കെതിരെ ടൗൺ പോലീസ്‌ കേസെടുത്തു. പോലീസ്‌ ഉദ്യോഗസ്ഥരെന്ന വ്യാജേനയാണ് ഇവർ കണ്ണൂർ സിറ്റി ജില്ലാ പോലീസ്‌ ഹെഡ്ക്വാർട്ടേഴ്സ് ക്യാമ്പ് പരിസരത്ത് അതിക്രമിച്ച്‌ കടന്നത്. ആഘോഷം നടത്തിയശേഷം റീൽസ് ചിത്രീകരിച്ച് സാമൂഹിക മാധ്യമങ്ങളിൽ പ്രചരിപ്പിച്ചതോടെയാണ് സംഭവം പുറത്തായത്.

ടൗൺ പോലീസ്‌ സ്റ്റേഷനിൽനിന്നാണെന്ന വ്യാജേന ഫോണിൽ വിളിച്ചുവരുത്തിയാണ് സുഹൃത്തുക്കൾ യുവതിക്കായി അതിരുവിട്ട പിറന്നാൾ ആഘോഷം ഒരുക്കിയത്. യുവതിയുടെ വാഹനം ഇടിച്ച് ഒരാൾക്ക് മരണം സംഭവിച്ചെന്നും, അതുമായി ബന്ധപ്പെട്ട് സംസാരിക്കാൻ സ്റ്റേഷനിൽ എത്തണമെന്നുമാണ് ഫോൺ വഴി അറിയിച്ചത്.

സുഹൃത്തുക്കൾ ടൗൺ പോലീസ്‌ സ്റ്റേഷന് മുൻവശം വഴി വാഹനത്തിൽ എത്തുന്നതും ആഘോഷം നടത്തുന്നതുമായ ദൃശ്യങ്ങൾ പുറത്തുവന്നിരുന്നു. തുടർന്ന് ഇവർ പോലീസ്‌ ആസ്ഥാനത്തേക്ക് കടക്കുകയും അവിടെയുണ്ടായിരുന്ന പോലീസ്‌ ഉദ്യോഗസ്ഥനോട് സംസാരിച്ചശേഷം അകത്തേക്ക് പ്രവേശിക്കുകയുമായിരുന്നു.

പോലീസ്‌ കാന്റീനിന് മുൻവശത്തായിരുന്നു ആഘോഷങ്ങളുടെ തുടക്കം. അവിടെ നിർത്തിയിട്ടിരുന്ന പോലീസ്‌ വാഹനത്തിന് മുന്നിൽനിന്ന് ഫോട്ടോയെടുത്തും ആഘോഷം നടത്തി. തുടർന്ന് സംഘത്തിലെ രണ്ടുപേർ പോലീസ്‌ വാഹനത്തിന്റെ മറവിൽ ഒളിച്ചുനിന്ന ശേഷം മറ്റ് സുഹൃത്തുക്കൾക്കൊപ്പം നടന്നു വരികയായിരുന്ന യുവതിക്ക് പിറന്നാൾ സർപ്രൈസ് നൽകി. 

തുടർന്ന് അവിടെ വെച്ചുതന്നെ കേക്ക് മുറിച്ചശേഷം സംഘം മടങ്ങി. ഇതിനിടെ, യുവതിയെ വിളിച്ചുവരുത്തിയതിനെക്കുറിച്ച് പരസ്പരം സംസാരിച്ച് ആഹ്ലാദം പങ്കിടുന്നതും ദൃശ്യങ്ങളിൽ വ്യക്തമാണ്.

പോലീസ് ആസ്ഥാനത്ത് നടന്ന ഈ സംഭവത്തെക്കുറിച്ച് നിങ്ങളുടെ അഭിപ്രായം എന്താണ്? ഈ വാർത്ത സുഹൃത്തുക്കൾക്ക് ഷെയർ ചെയ്യൂ.

Article Summary: Case against 5 for trespassing at Kannur Police HQ.

#KannurPolice #BirthdayCelebration #Trespassing #KeralaPolice #Reels #CrimeNews