0.6 ഗ്രാം ലഹരിയിൽ തുടങ്ങി വിദേശവനിതകളുടെ ലഹരി ഫാക്ടറി വരെ; സിനിമയെ വെല്ലുന്ന അന്വേഷണ മികവുമായി കണ്ണൂർ ഡാൻസാഫ്

കണ്ണൂർ: (KVARTHA) ന്യൂമാഹിയിൽ നിന്ന് ലഭിച്ച ചെറിയൊരു സൂചനയിൽ പിടിച്ച് അന്താരാഷ്ട്ര ലഹരി സംഘത്തിന്റെ വൻ ശൃംഖല തകർത്ത് കണ്ണൂർ സിറ്റി പൊലീസ്. ഡൽഹി കേന്ദ്രീകരിച്ച് മാരക ലഹരിവസ്തുവായ എംഡിഎംഎ നിർമിച്ചുനൽകിയിരുന്ന രണ്ട് വിദേശ വനിതകളെ കണ്ണൂർ സിറ്റി പൊലീസ് സ്ക്വാഡ് ഡൽഹി ബുരാരിയിൽ വെച്ച് സാഹസികമായി പിടികൂടി.

നൈജീരിയൻ സ്വദേശിനിയായ ചിനെലോ ലിലിയൻ (36), ക്യാമറൂണിയൻ സ്വദേശിനിയായ ഫിലോമെനെ ചാൻസെലിൻ (30) എന്നിവരാണ് പിടിയിലായത്. കേരളത്തിലേക്ക് വ്യാപകമായി രാസലഹരി ഒഴുകിയെത്തുന്നതിന്റെ പ്രധാന സ്രോതസുകളിലൊന്നാണ് ഈ അറസ്റ്റോടെ അടഞ്ഞിരിക്കുന്നത്.   

0.6 ഗ്രാമിൽ നിന്ന് തുടങ്ങിയ അന്വേഷണം

ന്യൂമാഹിയിൽ വെച്ച് 0.6 ഗ്രാം എംഡിഎംഎയുമായി രജിനാസ് എന്നയാൾ പിടിയിലായതാണ് കേസിൽ നിർണായക വഴിത്തിരിവായത്. ഇയാളെ ചോദ്യം ചെയ്തതിൽ നിന്ന് ലഹരി എത്തിച്ചത് സാമ്പത്തിക ഇടപാടുകൾ നിയന്ത്രിച്ചിരുന്ന മുഹമ്മദ് സമീലാണെന്ന് വ്യക്തമായി. തുടർന്ന് സമീലിന്റെ വീട്ടിൽ നിന്നും വാഹനത്തിൽ നിന്നുമായി 185 ഗ്രാം എംഡിഎംഎ പൊലീസ് പിടിച്ചെടുത്തു.

സമീലിന്റെ ഫോൺ-ബാങ്ക് രേഖകൾ വിശദമായി പരിശോധിച്ചതോടെയാണ് 'തബു' എന്നറിയപ്പെടുന്ന മുജിതാബയെക്കുറിച്ചുള്ള വിവരങ്ങൾ പുറത്തുവരുന്നത്. ലഹരി ഇടനിലക്കാർ വഴി ആളൊഴിഞ്ഞ കേന്ദ്രങ്ങളിൽ എംഡിഎംഎ ഒളിപ്പിച്ചുവെച്ച ശേഷം ഗൂഗിൾ ലൊക്കേഷൻ മാത്രം കൈമാറുന്ന ഹൈടെക് രീതിയാണ് തബു അനുവർത്തിച്ചിരുന്നത്. ശാസ്ത്രീയ അന്വേഷണത്തിനൊടുവിൽ ബെംഗളൂരുവിൽ വെച്ച് തബുവിനെയും പൊലീസ് കസ്റ്റഡിയിലെടുത്തു. ലഹരി വാങ്ങുന്നവരുമായി നേരിട്ട് ബന്ധപ്പെടാതെ ലൊക്കേഷൻ ഡ്രോപ്പിംഗ് വഴി വിൽപന നടത്തുന്ന ശൈലിയാണ് ഇവർ സ്വീകരിച്ചിരുന്നത്.

ഹരിയാന മുതൽ ഡൽഹി വരെ നീണ്ട കണ്ണികൾ

ഡൽഹിയിൽ നിന്ന് കൊറിയർ പാർസൽ വഴിയാണ് ഇവർ കേരളത്തിലേക്ക് ലഹരി കടത്തിയിരുന്നത്. കേരള പൊലീസിന്റെ കൃത്യമായ വിവരകൈമാറ്റത്തെ തുടർന്ന് തബുവിന്റെ കൂട്ടാളിയായ അർഷാദ് അലിയെ 800 ഗ്രാം എംഡിഎംഎയുമായി ഹരിയാന പൊലീസ് ഗുരുഗ്രാമിൽ വെച്ച് പിടികൂടുകയും ചെയ്തിരുന്നു.

പിന്നാലെ ലഹരി വ്യാപാരത്തിന് വ്യാജ രേഖകളും സിം കാർഡുകളും മ്യൂൽ അക്കൗണ്ടുകളും ഒരുക്കി നൽകിയ അബ്ദുൾ റഹ്മാൻ, എറണാകുളം സ്വദേശി റിഷാദ് എന്നിവരെയും പൊലീസ് പിടികൂടി. ദേശീയ തലത്തിൽ ശൃംഖലയുള്ള വൻ സംഘമാണ് ഇതിന് പിന്നിൽ പ്രവർത്തിച്ചിരുന്നതെന്ന് ഈ തിടുക്കത്തിലുള്ള അറസ്റ്റുകളോടെ വ്യക്തമായി.

10 ദിവസം ഡൽഹിയിൽ; സാഹസികമായി പിടിയിൽ   

ഈ കണ്ണിയിലൂടെ ലഭിച്ച ഡിജിറ്റൽ തെളിവുകളാണ് ഡൽഹിയിലിരുന്ന് മാരക എംഡിഎംഎ നിർമിച്ചുനൽകിയിരുന്ന വിദേശ വനിതകളിലേക്ക് പൊലീസിനെ എത്തിച്ചത്. പ്രതികൾ സിമ്മുകൾ നിരന്തരം മാറ്റിയും 20 ഓളം ബിനാമി ബാങ്ക് അക്കൗണ്ടുകൾ വഴിയും കോടികളുടെ ഇടപാടുകളാണ് നടത്തിയിരുന്നത്.   

കണ്ണൂർ സിറ്റി പോലീസിന്റെ സ്‌ക്വാഡ് അംഗങ്ങൾ 10 ദിവസത്തോളം ഡൽഹിയിൽ താമസിച്ച് അതിസാഹസികമായാണ് പ്രതികളെ വലയിലാക്കിയത്. പ്രദേശവാസികളിൽ നിന്നും തട്ടിപ്പുകാരിൽ നിന്നും രക്ഷപ്പെടാൻ പ്രദേശത്ത് വേഷപ്രച്ഛന്നരായാണ് പൊലീസ് സംഘം ബുരാരിയിൽ നിരീക്ഷണം നടത്തിയത്.

കണ്ണൂർ റേഞ്ച് ഡിഐജി കെ. കാർത്തിക് ഐപിഎസ്, കണ്ണൂർ സിറ്റി പോലീസ് കമീഷണർ ബി.വി. വിജയ ഭരത് റെഡ്ഡി ഐപിഎസ് എന്നിവരുടെ കർശന നിർദേശപ്രകാരം തലശ്ശേരി എഎസ്പി ഡോ. എം. നന്ദഗോപൻ ഐപിഎസിന്റെ നേതൃത്വത്തിലാണ് അന്വേഷണം നടന്നത്. കണ്ണൂർ ഡാൻസാഫ് സ്ക്വാഡ്, തലശ്ശേരി എഎസ്പി സ്ക്വാഡ്, തലശ്ശേരി പൊലീസ് എന്നിവർ ഉൾപ്പെട്ട പ്രത്യേക അന്വേഷണ സംഘമാണ് കേസിലെ എല്ലാ പ്രതികളെയും പിടികൂടിയത്. ലഹരി മാഫിയക്കെതിരെയുള്ള വിട്ടുവീഴ്ചയില്ലാത്ത നടപടികൾ തുടരുമെന്ന് സിറ്റി പോലീസ് കമീഷണർ അറിയിച്ചു.   

കൂടുതൽ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമന്റായി രേഖപ്പെടുത്താൻ മറക്കരുത്.

Article Summary: Kannur Police arrest two foreign women in Delhi for MDMA synthesis.

#KannurPolice #MDMABust #DrugRacket #DelhiArrest #DANSAF #KeralaNews #AnjanaNews