കണ്ണൂരിൽ ലഹരിവേട്ട തുടരുന്നു; പാനൂരിൽ വ്യാവസായിക അളവിൽ എംഡിഎംഎയും നഗരത്തിൽ വൻ ഇ സിഗരറ്റ് ശേഖരവും പിടികൂടി

കണ്ണൂർ: (KVARTHA) ലഹരിമാഫിയക്കെതിരെ ആരംഭിച്ച 'ഓപ്പറേഷൻ തൂഫാൻ' ഡ്രൈവിൻ്റെ ഭാഗമായി പോലീസും ഡാൻസാഫ് സംഘവും നടത്തിയ പരിശോധനകളിൽ വൻ മയക്കുമരുന്ന് വേട്ട. പാനൂരിൽ വ്യാവസായിക അളവിൽ എംഡിഎംഎയും കണ്ണൂർ നഗരത്തിൽ വിദേശ സിഗരറ്റുകളും നിരോധിത ഇ സിഗരറ്റുകളുമാണ് പോലീസ് പിടിച്ചെടുത്തത്. രണ്ട് വ്യത്യസ്ത സംഭവങ്ങളിലായി രണ്ട് പേർ അറസ്റ്റിലായിട്ടുണ്ട്.

പാനൂരിൽ എംഡിഎംഎ വേട്ട

പാനൂർ പോലീസ് സ്റ്റേഷൻ പരിധിയിൽ വ്യാവസായിക അളവിൽ എംഡിഎംഎ പിടികൂടി. എം കെ ഗഫൂറിനെയാണ് (47) പോലീസ് അറസ്റ്റ് ചെയ്തത്. രഹസ്യ വിവരത്തിൻ്റെ അടിസ്ഥാനത്തിൽ ഇയാൾ താമസിക്കുന്ന വീട്ടിൽ നടത്തിയ പരിശോധനയിലാണ് 337.74 ഗ്രാം എംഡിഎംഎ പോലീസ് കണ്ടെടുത്തത്. മയക്കുമരുന്ന് വിൽക്കാൻ ഉപയോഗിക്കുന്ന ചെറിയ ഡിജിറ്റൽ ത്രാസും കുറ്റാരോപിതനിൽ നിന്നും കണ്ടെടുത്തിട്ടുണ്ട്.

കണ്ണൂർ സിറ്റി പോലീസ് കമ്മീഷണർ നിധിൻരാജ് പി ഐപിഎസ്, കൂത്തുപറമ്പ് എസിപി സിബി ടോം, പാനൂർ പോലീസ് സ്റ്റേഷൻ ഇൻസ്പെക്ടർ ജിതേഷ് പി കെ എന്നിവരുടെ നിർദേശപ്രകാരം സബ് ഇൻസ്പെക്ടർ മുഹമ്മദ് ഷജീർ വി പിയുടെ നേതൃത്വത്തിൽ എസ്ഐ പ്രശോഭ്, എഎസ്ഐ ബൈജു, സിപിഒ ഷിനിത എന്നിവരടങ്ങിയ സംഘമാണ് കുറ്റാരോപിതനെ പിടികൂടിയത്. പാനൂർ പോലീസ് സ്റ്റേഷനിൽ കേസ് രജിസ്റ്റർ ചെയ്ത് അന്വേഷണം ആരംഭിച്ചു.

കണ്ണൂർ നഗരത്തിൽ ഇ സിഗരറ്റ് ശേഖരം

നഗരത്തിലെ പ്രഭാത് ജങ്ക്ഷൻ പരിസരത്ത് സ്കൂൾ വിദ്യാർഥികൾക്ക് വിൽപ്പന നടത്താൻ സൂക്ഷിച്ച നിരോധിത ഇ സിഗരറ്റുകളും വിദേശ പുകയില ഉൽപ്പന്നങ്ങളും പോലീസ് റെയ്ഡിൽ പിടികൂടി. സംഭവത്തിൽ എൻ അബൂട്ടിക്കെതിരെ (68) കണ്ണൂർ ടൗൺ പോലീസ് കേസെടുത്തിട്ടുണ്ട്. 

ഇവിടെ ലഹരിവസ്തുക്കൾ വിൽപ്പന നടത്തുന്നുണ്ടെന്ന രഹസ്യ വിവരത്തെ തുടർന്ന് ടൗൺ സബ് ഇൻസ്പെക്ടർ ടി എം വിപിൻ്റെ നേതൃത്വത്തിലുള്ള പോലീസ് സംഘമാണ് പരിശോധന നടത്തിയത്. കടയ്ക്കുള്ളിൽ ഒളിപ്പിച്ച നിലയിലായിരുന്നു വിദേശ സിഗരറ്റുകളുടെ പാക്കറ്റുകളും വിവിധ ഇനം ഇ സിഗരറ്റുകളും.

സിപിഒമാരായ കിരൺ, രേഷ്മ, ഡാൻസാഫ് അംഗങ്ങൾ എന്നിവരും പരിശോധനാ സംഘത്തിലുണ്ടായിരുന്നു. കഴിഞ്ഞ ദിവസങ്ങളിൽ മട്ടന്നൂർ നഗരത്തിൽ നിന്നും സമാനമായ രീതിയിൽ ഇ സിഗരറ്റ് ശേഖരം പിടികൂടിയതിന് പിന്നാലെയാണ് ജില്ലയിൽ വീണ്ടും റെയ്ഡ് ശക്തമാക്കിയത്.

കൂടതൽ വാർത്ത അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. വിവരങ്ങൾ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. 

Article Summary: Under 'Operation Toofan', Kannur police seized 337.74 grams of MDMA in Panoor arresting a 47-year-old man, and confiscated a large stash of banned e-cigarettes intended for school students from a shop in Kannur town, registering a case against its 68-year-old owner.

#OperationToofan #KannurPolice #KeralaPolice #DrugSeizure #MDMA #MalayalamNews