തുറന്ന ജീപ്പിൽ 'അടിച്ചുപൊളിക്കാനിറങ്ങിയ' ജെൻസി പിള്ളേർ പുഴയിൽ; ഡ്രൈവിംഗ് പരീക്ഷിക്കാൻ പോയി ഒടുവിൽ വെള്ളത്തിലായി; മമ്പറത്ത് നാട്ടുകാർക്ക് കിട്ടിയത് 'എട്ടിന്റെ പണി'

കണ്ണൂർ: (KVARTHA) മമ്പറത്ത് തുറന്ന ജീപ്പിൽ സായാഹ്ന സവാരിക്കിറങ്ങിയ ജെൻ സി പിള്ളേരുടെ ഉല്ലാസയാത്ര ഒടുവിൽ അവസാനിച്ചത് പുഴയിൽ. 2026 ഏപ്രിൽ 21 ചൊവ്വാഴ്ച വൈകുന്നേരമാണ് മമ്പറം ബോട്ട് ജെട്ടിക്ക് സമീപം നാടകീയ സംഭവങ്ങൾ അരങ്ങേറിയത്. കണ്ണൂരിലെ ഒരു വിദ്യാഭ്യാസ സ്ഥാപനത്തിലെ വിദ്യാർത്ഥിനിയും ആൺസുഹൃത്തുമാണ് മോഡിഫൈ ചെയ്ത ജീപ്പുമായി പുഴയിൽ വീണത്. വിഷുവിന് ശേഷം ഉല്ലസിക്കാനായി തലശ്ശേരിയിൽ പോയി മടങ്ങുന്നതിനിടെയാണ് ഇവർ മമ്പറത്ത് എത്തിയത്.

ആക്സിലറേറ്ററിൽ ചവിട്ടി; പിന്നാലെ പുഴയിലേക്ക്

മമ്പറം ബോട്ട് ജെട്ടിക്ക് സമീപം പ്രകൃതിഭംഗി ആസ്വദിക്കാനിറങ്ങിയ ഇവർ മടങ്ങാൻ തുടങ്ങുമ്പോഴാണ് അപകടമുണ്ടായത്. തനിക്ക് തന്നെ വണ്ടി ഓടിക്കണമെന്ന് യുവതി വാശിപിടിച്ചതോടെ സുഹൃത്ത് ഡ്രൈവിംഗ് സീറ്റ് കൈമാറുകയായിരുന്നു. എന്നാൽ ജീപ്പ് സ്റ്റാർട്ട് ചെയ്ത യുവതി അറിയാതെ ആക്സിലറേറ്ററിൽ ആഞ്ഞു ചവിട്ടുകയായിരുന്നു. 

ഇതോടെ നിയന്ത്രണം വിട്ട ജീപ്പ് നേരെ പുഴയിലേക്ക് കുതിച്ചു. ഇതിനിടെ യുവാവ് ജീപ്പിൽ നിന്നും പുറത്തേക്ക് ചാടി രക്ഷപ്പെട്ടു. യുവതിയും ജീപ്പും പുഴയിൽ മുങ്ങിയെങ്കിലും ഭാഗ്യവശാൽ ഒരാൾ പൊക്കത്തിൽ പോലും വെള്ളമില്ലാതിരുന്നത് വലിയ ദുരന്തം ഒഴിവാക്കി. യുവതി തനിയെ വെള്ളത്തിൽ നിന്നും കരയ്ക്ക് കയറി വരികയായിരുന്നു.

ഹോസ്റ്റലിൽ നിന്നും ചാടിയിറങ്ങിയ സാഹസം

നാട്ടുകാർ വിവരമറിയിച്ചതിനെത്തുടർന്ന് പിണറായി എസ്ഐയും (SI) സംഘവും സ്ഥലത്തെത്തി. പോലീസിന്റെ നിർദ്ദേശപ്രകാരം നാട്ടുകാർ വടം കെട്ടിയാണ് പുഴയിൽ വീണ ജീപ്പ് കരയ്ക്കെടുത്തത്. പോലീസ് ചോദ്യം ചെയ്തപ്പോഴാണ് വിദ്യാർത്ഥിനി കോളേജ് ഹോസ്റ്റലിൽ നിന്നും അധികൃതർ അറിയാതെ ചാടിയിറങ്ങിയതാണെന്ന് മനസ്സിലായത്. 

വീട്ടിൽ വിവരം അറിയിക്കരുതെന്ന് യുവതി പോലീസിനോട് അപേക്ഷിച്ചു. വീട്ടിൽ കസിൻ മാത്രമേയുള്ളൂവെന്നും മറ്റുള്ളവർ പുറത്താണെന്നുമായിരുന്നു യുവതിയുടെ വിശദീകരണം. എന്നാൽ വലിയ അപകടം സംഭവിച്ചിരുന്നുവെങ്കിൽ എന്ത് ചെയ്യുമായിരുന്നു എന്ന പലീസിന്റെ ചോദ്യത്തിന് മുന്നിൽ യുവതി നിശബ്ദയായി.

യുവാവ് കസ്റ്റഡിയിൽ; ബന്ധുക്കളെത്തി

തുടർന്ന് പോലീസ് യുവതിയുടെ ബന്ധുവിനെ വിളിച്ചുവരുത്തി കാര്യങ്ങൾ ബോധ്യപ്പെടുത്തിയ ശേഷം യുവതിയെ വിട്ടയച്ചു. യുവതിക്കൊപ്പം ഉണ്ടായിരുന്ന യുവാവിനെ പോലീസ് കസ്റ്റഡിയിലെടുത്ത് സ്റ്റേഷനിലേക്ക് കൊണ്ടുപോയി. 

മോട്ടോർ വാഹന നിയമങ്ങൾ ലംഘിച്ച് രൂപമാറ്റം വരുത്തിയ ജീപ്പിലായിരുന്നു ഇവരുടെ യാത്രയെന്നും പോലീസ് കണ്ടെത്തിയിട്ടുണ്ട്. ഈ സംഭവം സോഷ്യൽ മീഡിയയിലും മാധ്യമങ്ങളിലും വലിയ ചർച്ചയായി മാറിയിരിക്കുകയാണ്.

ഇത്തരം സംഭവങ്ങൾ ഒഴിവാക്കാൻ രക്ഷിതാക്കളും അധികൃതരും കൂടുതൽ ജാഗ്രത പാലിക്കേണ്ടതുണ്ടോ? നിങ്ങളുടെ അഭിപ്രായം ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമന്റായി രേഖപ്പെടുത്താൻ മറക്കരുത്.  ഈ വാർത്ത ഷെയർ ചെയ്യൂ.

Article Summary: A young woman and her male friend ended up in a river at Mamparam, Kannur after the woman accidentally accelerated their modified Jeep into the water during an outing.

#KannurNews #Mamparam #JeepAccident #GenZ #KeralaPolice #RoadSafety #ViralNews #StudentStunt #Keralavibe #BreakingNews