‘കണ്ണൂർ ജയിലിൽ കാപ്പ കേസ് പ്രതി ഫോൺ വിളിച്ച് യുവതിയെ ഭീഷണിപ്പെടുത്തി’; മൊബൈൽ പിടികൂടി

കണ്ണൂർ: (KVARTHA) സെൻട്രൽ ജയിലിൽ കാപ്പ കേസ് പ്രതി മൊബൈൽ ഫോൺ ഉപയോഗിച്ച് യുവതിയെ വിളിച്ച് ഭീഷണിപ്പെടുത്തിയതായി പരാതി. സംഭവത്തിൽ ഗോപകുമാർ എന്ന പ്രതിയിൽ നിന്ന് ജയിൽ അധികൃതർ മൊബൈൽ ഫോൺ പിടിച്ചെടുത്തു. 

നിരന്തരമായ പരിശോധനകൾക്കിടയിലും കണ്ണൂർ സെൻട്രൽ ജയിലിലെ അന്തേവാസികളുടെ മൊബൈൽ ഫോൺ ഉപയോഗം തടസമില്ലാതെ തുടരുന്നുവെന്ന സൂചനയാണ് പുതിയ സംഭവത്തിലൂടെ പുറത്തുവരുന്നത്.

ഗോപകുമാർ ജയിലിനകത്ത് നിന്ന് ഒരു യുവതിയെ വിളിച്ച് ഭീഷണിപ്പെടുത്തിയെന്ന് തെളിവുകൾ സഹിതം പരാതി ലഭിച്ചതിനെ തുടർന്നായിരുന്നു ജയിൽ അധികൃതർ പരിശോധന നടത്തിയത്. ഭീഷണിപ്പെടുത്തുന്ന സംഭാഷണം യുവതി റെക്കോർഡ് ചെയ്ത് ജയിൽ സൂപ്രണ്ടിന് പരാതിയായി നൽകുകയായിരുന്നുവെന്ന് റിപ്പോർട്ടുകൾ പറയുന്നു. ഈ പരാതിയുടെ അടിസ്ഥാനത്തിൽ നടത്തിയ പരിശോധനയിലാണ് ഗോപകുമാർ ഉണ്ടായിരുന്ന ഒന്നാം ബ്ലോക്കിലെ 15-ാം സെല്ലിൽ നിന്ന് മൊബൈൽ ഫോൺ പിടിച്ചെടുത്തത്.

കഴിഞ്ഞ വ്യാഴാഴ്ച രാത്രി ഒൻപത് മണിയോടെയാണ് ഗോപകുമാർ യുവതിയെ വിളിച്ച് ഭീഷണിപ്പെടുത്തിയതെന്ന് പരാതിയിൽ പറയുന്നു. യുവതി പരാതി നൽകിയ ഉടൻ തന്നെ പ്രതിയുടെ സെല്ലിൽ പരിശോധന നടത്തുകയായിരുന്നു. സംഭവത്തിൽ കണ്ണൂർ ടൗൺ പോലീസ് കേസെടുത്തിട്ടുണ്ട്. ഫോൺ വിളിച്ച പ്രതിയെ നിലവിൽ പത്താം ബ്ലോക്കിലേക്ക് മാറ്റിയിരിക്കുകയാണ്.

ജയിലിനകത്തെ ലഹരി ഉപയോഗത്തിനായാണ് ഇയാൾ പണം ആവശ്യപ്പെട്ടതെന്നാണ് പോലീസിന്റെ പ്രാഥമിക കണ്ടെത്തൽ. പുറത്തുള്ള ആളുകൾക്ക് ഓൺലൈൻ വഴി പണം നൽകിയാൽ മാത്രമേ ജയിലിനകത്ത് ലഹരി ലഭിക്കുകയുള്ളൂ എന്നും, അതിനുവേണ്ടിയാണ് ഇയാൾ പണം ആവശ്യപ്പെട്ട് ഫോൺ വിളിക്കുന്നതെന്നും പോലീസ് പറയുന്നു.

പണം നൽകിയില്ലെങ്കിൽ ഭീഷണിപ്പെടുത്തുന്ന ഒരു രീതിയും ഇയാൾക്കുണ്ടായിരുന്നതായി വിവരമുണ്ട്. ആദ്യമായിട്ടല്ല ഗോപകുമാർ ജയിലിൽ നിന്ന് ഫോൺ വിളിക്കുന്നതെന്നും, മുമ്പും ഇയാൾ നിരവധി ആളുകളെ വിളിച്ച് പണം ആവശ്യപ്പെട്ടിട്ടുണ്ടെന്നും അധികൃതർ വ്യക്തമാക്കി.

ജയിലിനുള്ളിലെ ഫോൺ ഉപയോഗത്തെക്കുറിച്ച് നിങ്ങളുടെ അഭിപ്രായം കമന്റ് ചെയ്യുക! 

Article Summary: KAAPA accused threatened a woman from Kannur Jail for drug money.

#KannurJail #JailThreat #MobilePhoneSeizure #KappaCase #KeralaCrime #Drugsmoney