ജയിലിൽ അക്രമം തുടർക്കഥ: അസി. സൂപ്രണ്ടിന് മർദ്ദനമേറ്റ സംഭവത്തിൽ അന്വേഷണം

കണ്ണൂർ: (KVARTHA) സെൽ മാറ്റാൻ വിസമ്മതിച്ചതിൻ്റെ പേരിൽ കണ്ണൂർ സെൻട്രൽ ജയിലിൽ അസിസ്റ്റൻ്റ് സൂപ്രണ്ടിന് മർദ്ദനമേറ്റതായി പരാതി. ജില്ലാ ജയിൽ അസി. സൂപ്രണ്ട് അനസിനാണ് മർദ്ദനമേറ്റത്. സംഭവത്തിൽ പോക്സോ കേസിലെ തടവുകാരനെതിരെ കണ്ണൂർ ടൗൺ പൊലീസ് കേസെടുത്തതായി ജയിൽ അധികൃതർ അറിയിച്ചു.

ജയിൽ സൂപ്രണ്ട് നൽകിയ പരാതിയുടെ അടിസ്ഥാനത്തിലാണ് പോലീസ് കേസ് രജിസ്റ്റർ ചെയ്തത്. കഴിഞ്ഞ ബുധനാഴ്ചയാണ് കേസിനാസ്പദമായ സംഭവം നടന്നതെന്നാണ് പരാതിയിൽ പറയുന്നത്. ജയിലിലെ കോൺഫറൻസ് ഹാളിൽ വെച്ച് പോക്സോ കേസിലെ പ്രതിയായ രാഹുൽ, അസിസ്റ്റൻ്റ് സൂപ്രണ്ട് അനസിനെ അസഭ്യം പറയുകയും മർദ്ദിക്കുകയും ചെയ്തു എന്നാണ് ജയിൽ അധികൃതർ പൊലീസിനെ അറിയിച്ചത്.

മർദ്ദനത്തിൽ പരുക്കേറ്റ അസി. സൂപ്രണ്ട് അനസ് കണ്ണൂർ ജില്ലാ ആശുപത്രിയിൽ ചികിത്സ തേടിയതായും റിപ്പോർട്ടുകളുണ്ട്. നിലവിൽ ഒന്നാം ബ്ലോക്കിലെ സെല്ലിൽ കഴിയുന്ന രാഹുൽ, തന്നെ മറ്റൊരു സെല്ലിലേക്ക് മാറ്റണമെന്ന് നിരന്തരമായി അപേക്ഷിച്ചിരുന്നുവത്രേ. എന്നാൽ, ഈ ആവശ്യം അംഗീകരിക്കാത്തതിനെ തുടർന്നാണ് തടവുകാരൻ പ്രകോപിതനായതെന്നും ഇത് മർദ്ദനത്തിൽ കലാശിച്ചതായുമാണ് പരാതിയിൽ വ്യക്തമാക്കുന്നത്.

നേരത്തെ ഗോവിന്ദച്ചാമി ജയിൽ ചാടിയതിനു ശേഷം കണ്ണൂർ സെൻട്രൽ ജയിലിലെ തടവുകാരുടെ സുരക്ഷ കൂടുതൽ ശക്തമാക്കിയിരുന്നു. എന്നാൽ, ജയിലിലെ സുരക്ഷാ വീഴ്ചകൾ ഇപ്പോഴും തുടരുകയാണെന്ന ആശങ്കയിലാണ് അധികൃതർ. 

അടുത്തിടെ ജയിലിനുള്ളിലേക്ക് മദ്യവും കഞ്ചാവും ഉൾപ്പെടെയുള്ള ലഹരി വസ്തുക്കൾ എറിഞ്ഞു കൊടുത്ത സംഭവത്തിൽ മുൻ തടവുകാരൻ ഉൾപ്പെടെ മൂന്നുപേരെ അറസ്റ്റു ചെയ്തിരുന്നു. ഇതിനു പിന്നാലെ കഴിഞ്ഞ ദിവസവും ജയിലിലേക്ക് ലഹരി വസ്തുകൾ എറിഞ്ഞു കൊടുക്കുന്ന സംഭവങ്ങളുണ്ടായിട്ടുണ്ടെന്നും റിപ്പോർട്ടുകളുണ്ട്.

ജയിലിലെ സുരക്ഷാ വീഴ്ചകൾ തുടരുകയാണോ? നിങ്ങളുടെ അഭിപ്രായം കമന്റ് ചെയ്യുക. ഈ വാർത്ത കൂട്ടുകാർക്ക് ഷെയർ ചെയ്യൂ.

Article Summary: Assistant Superintendent in Kannur Central Jail attacked by Pocso case accused over cell change.

#KannurJail #JailAttack #SecurityBreach #PocsoAccused #KeralaNews