ക്ലാസിൽ തലകറങ്ങി വീണ വിദ്യാർത്ഥിനിയോട് മനുഷ്യത്വരഹിത പെരുമാറ്റം; അധ്യാപികയെ ചുമതലകളിൽ നിന്നും മാറ്റി

കണ്ണൂർ: (KVARTHA) ക്ലാസ് മുറിയിൽ തലകറങ്ങി കുഴഞ്ഞുവീണ ആറാം ക്ലാസ് വിദ്യാർത്ഥിനിയോട് കന്യാസ്ത്രീയായ അധ്യാപിക മനുഷ്യത്വരഹിതമായി പെരുമാറിയെന്ന പരാതിയിൽ അന്വേഷണം പ്രഖ്യാപിച്ചു. ഇരിട്ടി കുന്നോത്ത് സെന്റ് ജോസഫ്സ് യു.പി. സ്‌കൂൾ അധ്യാപിക സിസ്റ്റർ ലിന്റോ ജോസിനെതിരെയാണ് രക്ഷിതാക്കൾ പരാതി നൽകിയത്. സംഭവത്തെ തുടർന്ന് തലശ്ശേരി രൂപത കോർപ്പറേറ്റ് എജ്യുക്കേഷണൽ ഏജൻസി അധ്യാപികയെ സ്കൂളിന്റെ എല്ലാ ചുമതലകളിൽ നിന്നും താൽക്കാലികമായി മാറ്റിനിർത്തി.

അസുഖബാധിതയായ കുട്ടിയോട് ക്രൂരത

കഴിഞ്ഞ ബുധനാഴ്ച ഉച്ചയോടെയാണ് സ്കൂളിൽ വിവാദമായ സംഭവം ഉണ്ടായത്. രക്തത്തിലെ സോഡിയത്തിൽ വ്യതിയാനം വരുന്നതിനെ തുടർന്ന് സ്ഥിരമായി മരുന്ന് കഴിക്കുന്ന കുട്ടിയാണ് ക്ലാസിൽ തലകറങ്ങി വീണത്. ഈ വിവരം സ്കൂൾ അധികൃതർക്കും അറിയാമായിരുന്നു.

തലകറങ്ങി വീണ കുട്ടിയോട് അധ്യാപിക 'ചത്തില്ലേ' എന്ന് ചോദിച്ചതായും വീണുകിടന്ന കുട്ടിയെ ചവിട്ടിയതായും രക്ഷിതാക്കൾ നൽകിയ പരാതിയിൽ ആരോപിക്കുന്നു. സഹപാഠികൾ വിവരം പ്രധാനാധ്യാപകനെ അറിയിക്കാനായി മുറിയിലെത്തിയപ്പോൾ, കുട്ടി എന്തുകൊണ്ട് നേരിട്ട് തന്നോട് വിവരം അറിയിച്ചില്ല എന്ന മറുപടിയാണ് ക്ലാസ് ടീച്ചർ നൽകിയതെന്നും വിദ്യാർത്ഥികൾ പറഞ്ഞു. തുടർന്ന് ക്ലാസിലെത്തിയ അധ്യാപിക അപ്പോഴും നിലത്ത് തന്നെ കിടക്കുകയായിരുന്ന കുട്ടിയെ ചവിട്ടിയെന്നാണ് ആരോപണം.

രക്ഷിതാക്കളുടെ പ്രതിഷേധം

വിവരമറിഞ്ഞ രക്ഷിതാക്കൾ ഈ കാര്യം ചോദ്യം ചെയ്തപ്പോൾ ആദ്യം അധ്യാപിക ആരോപണം നിഷേധിക്കുകയായിരുന്നു. ഇതോടെ കഴിഞ്ഞ ദിവസം രക്ഷിതാക്കൾ സ്‌കൂളിൽ പ്രതിഷേധം സംഘടിപ്പിച്ചു. സിസ്റ്റർ ലിന്റോയെ സർവ്വീസിൽ നിന്നും പിരിച്ചുവിടണമെന്നാണ് പ്രതിഷേധക്കാർ ആവശ്യപ്പെട്ടത്. അധ്യാപിക കുട്ടിയെ ചവിട്ടുകയോ അധിക്ഷേപിക്കുകയോ ചെയ്തിട്ടില്ലെന്നാണ് സ്‌കൂൾ അധികൃതർ ആദ്യം പറഞ്ഞത്. എന്നാൽ കൃത്യമായ രീതിയിൽ കുട്ടിയെ പരിഗണിക്കാൻ തനിക്ക് കഴിഞ്ഞിട്ടില്ലെന്ന കുറ്റസമ്മതം അധ്യാപിക നടത്തിയതായാണ് ഒടുവിൽ ലഭിക്കുന്ന വിവരം.

മാനേജ്മെന്റിന്റെ ഇടപെടൽ

രക്ഷിതാക്കളുടെ പ്രതിഷേധം ശക്തമായതോടെയാണ് കോർപ്പറേറ്റ് എജ്യുക്കേഷണൽ ഏജൻസി വിഷയത്തിൽ ഇടപെട്ടത്. 30 ദിവസത്തെ താൽക്കാലിക അവധി ഒഴിവിലേക്ക് മാത്രം നിയമിതയായ വ്യക്തിയാണ് ഈ അധ്യാപികയെന്ന് മാനേജ്മെന്റ് വാർത്താക്കുറിപ്പിൽ വ്യക്തമാക്കി. വിഷയത്തിൽ സ്വതന്ത്രവും നീതിപൂർവ്വവുമായ അന്വേഷണം ഉറപ്പാക്കേണ്ടതിനാലാണ് ഇവരെ സ്കൂളിലെ ചുമതലകളിൽ നിന്ന് അന്വേഷണവിധേയമായി മാറ്റിനിർത്തിയതെന്നും മാനേജ്മെന്റ് അറിയിച്ചു.

സംഭവത്തിന്റെ യഥാർത്ഥ വസ്തുതകൾ സമഗ്രമായി പരിശോധിക്കുന്നതിനായി പ്രത്യേക അന്വേഷണ സമിതിയെ നിയോഗിച്ചിട്ടുണ്ട്. മൂന്ന് ദിവസത്തിനകം സമിതി പൂർണ്ണ റിപ്പോർട്ട് സമർപ്പിക്കുമെന്നും, ഇതിന്റെ അടിസ്ഥാനത്തിലാകും തുടർനടപടികൾ സ്വീകരിക്കുകയെന്നും അധികൃതർ അറിയിച്ചു.

കൂടുതൽ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമന്റായി രേഖപ്പെടുത്താൻ മറക്കരുത്.

Article Summary: Teacher suspended for allegedly mistreating fainted student.

#KannurNews #KeralaSchools #Iritty #ChildRights #KeralaNews #MalayalamNews #TeacherSuspended #EducationKerala #Kvartha #AnjanaNews