കണ്ണൂരിൽ വിനോദസഞ്ചാര കേന്ദ്രത്തിൽ ഗുണ്ടാ ആക്രമണം: അഞ്ച് പേർക്ക് പരിക്ക്; ഷുഹൈബ് വധക്കേസ് പ്രതി ഉൾപ്പെടെ 15 പേർക്കെതിരെ കേസ്

കണ്ണൂർ: (KVARTHA) ഇരിട്ടിയിലെ പ്രമുഖ വിനോദസഞ്ചാര കേന്ദ്രമായ എടക്കാനം റിവർ വ്യൂ പോയിന്റിൽ സായുധ സംഘത്തിന്റെ ആക്രമണം. സമീപവാസികളായ അഞ്ച് പേർക്ക് പരിക്കേറ്റു. മൂന്ന് വാഹനങ്ങളിലായി ആയുധങ്ങളുമായെത്തിയ സംഘമാണ് ആക്രമണം നടത്തിയത്. പരിക്കേറ്റ ഷാജി കുറ്റിയാടൻ (47), കെ.കെ. സുജിത്ത് (38), ആർ.വി. സതീശൻ (42), കെ. ജിതേഷ് (40), പി. രഞ്ജിത്ത് (29) എന്നിവരെ ഇരിട്ടി താലൂക്ക് ആശുപത്രിയിൽ പ്രാഥമിക ചികിത്സ നൽകിയ ശേഷം തലശ്ശേരിയിലെയും കണ്ണൂരിലെയും വിവിധ ആശുപത്രികളിൽ വിദഗ്ദ്ധ ചികിത്സയ്ക്കായി പ്രവേശിപ്പിച്ചു.

ഞായറാഴ്ച വൈകുന്നേരം ഏഴ് മണിയോടെയായിരുന്നു ആക്രമണം. ഒഴിവു ദിവസങ്ങളിൽ ജില്ലയുടെ വിവിധ ഭാഗങ്ങളിൽ നിന്ന് നൂറുകണക്കിന് ആളുകൾ എത്തുന്ന പ്രദേശമാണ് എടക്കാനം റിവർ വ്യൂ പോയിന്റ്. ഇന്നലെ (13.07.2025) ഞായറാഴ്ചയായതിനാൽ പതിവിലും കൂടുതൽ ആളുകൾ ഇവിടെയുണ്ടായിരുന്നു. വൈകുന്നേരം എത്തിയ ഒരു സംഘം സ്ഥലത്തുണ്ടായിരുന്ന ചിലരുമായി തർക്കങ്ങളിൽ ഏർപ്പെട്ടിരുന്നതായി പറയുന്നു. ഇതിന്റെ തുടർച്ചയായുള്ള പ്രത്യാക്രമണമാണ് ഇതെന്നാണ് പ്രാഥമിക നിഗമനം. ആക്രമണം നടത്തിയ ശേഷം മടങ്ങുകയായിരുന്ന വാഹനം നാട്ടുകാരെ ഇടിച്ചിട്ട് നീങ്ങുകയും ഇതിലൊരു വാഹനം എടക്കാനത്തെ പുഴയിലേക്ക് മറിയുകയും ചെയ്തു.

ആക്രമണം നടത്തിയത് ക്വട്ടേഷൻ സംഘമാണെന്നാണ് നാട്ടുകാർ ആരോപിക്കുന്നത്. ഇരിട്ടി പോലീസ് സംഭവസ്ഥലത്തെത്തി അന്വേഷണം ആരംഭിച്ചിട്ടുണ്ട്. പുഴയിൽ മറിഞ്ഞുകിടക്കുന്ന വാഹനത്തിന് പോലീസ് കാവൽ ഏർപ്പെടുത്തിയിട്ടുണ്ട്. സംഭവവുമായി ബന്ധപ്പെട്ട് യൂത്ത് കോൺഗ്രസ് നേതാവ് ഷുഹൈബ് വധക്കേസിലെ പ്രതി ദീപ് ചന്തുൾപ്പെടെ 15 പേർക്കെതിരെ ഇരിട്ടി പോലീസ് കേസെടുത്തിട്ടുണ്ട്.

കണ്ണൂരിലെ വിനോദസഞ്ചാര കേന്ദ്രത്തിലുണ്ടായ ഗുണ്ടാ ആക്രമണത്തെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: Gang attack at Edakkanam River View Point in Kannur, five injured.

#Kannur #GangAttack #TouristSpot #Iritty #KeralaNews #CrimeNews