കെ സുധാകരൻ്റെ പേരിൽ വ്യാജപ്രചാരണം; ഫേസ്ബുക്ക് അക്കൗണ്ടിനെതിരെ കേസെടുത്ത് സൈബർ പൊലീസ്

കണ്ണൂർ: (KVARTHA) മുതിർന്ന കോൺഗ്രസ് നേതാവും കണ്ണൂർ എംപിയുമായ കെ സുധാകരൻ്റെ പേരിൽ സമൂഹമാധ്യമങ്ങളിൽ വ്യാജ പ്രചാരണം നടത്തിയയാൾക്കെതിരെ കണ്ണൂർ സൈബർ ക്രൈം പൊലീസ് കേസെടുത്തു. 'രാജീവ് പിആർ രാജീവ്' എന്ന ഫേസ്ബുക്ക് അക്കൗണ്ടിനെതിരെയാണ് പൊലീസ് സ്വമേധയാ കേസെടുത്തിരിക്കുന്നത്.

വ്യാജ വാർത്തയുടെ ഉള്ളടക്കം

പൊലീസിൻ്റെ വിവരമനുസരിച്ച് 2026 ഒക്ടോബർ രബ്ടിനും നാലിനും ഇടയിലാണ് കേസിനാസ്പദമായ സംഭവം നടന്നത്. 'മുഖ്യമന്ത്രി സ്ഥാനത്ത് നിന്ന് സതീശനെ എത്രയും പെട്ടെന്ന് മാറ്റണം, ഇല്ലെങ്കിൽ ജനങ്ങൾ കോൺഗ്രസുകാരെ ചീമുട്ടയെറിയുന്ന സ്ഥിതിയിലേക്ക് പോവും' എന്ന തരത്തിലുള്ള വ്യാജ വാർത്തയും പോസ്റ്ററുമാണ് പ്രതി ഫേസ്ബുക്കിലൂടെ പ്രചരിപ്പിച്ചത്.  

കെ സുധാകരൻ്റെ അറിവോ സമ്മതമോ ഇല്ലാതെ അദ്ദേഹത്തിൻ്റെ ഫോട്ടോ ഉപയോഗിച്ച് അദ്ദേഹം തന്നെ പോസ്റ്റ് ചെയ്തതാണെന്ന് തോന്നിപ്പിക്കുന്ന തരത്തിലായിരുന്നു പ്രചാരണം. ഇതിലൂടെ കോൺഗ്രസ് പ്രവർത്തകർക്കിടയിലും പൊതുജനങ്ങൾക്കിടയിലും കെ സുധാകരന് അവമതിപ്പുണ്ടാക്കാനും സമൂഹത്തിൽ ലഹളയുണ്ടാക്കാനുമാണ് പ്രതി ശ്രമിച്ചതെന്ന് പൊലീസ് എഫ്ഐആറിൽ വ്യക്തമാക്കുന്നു.

പരാതിയും പൊലീസ് നടപടിയും

കഴിഞ്ഞ ദിവസം യുഡിഎഫ് കൺവീനർ അടൂർ പ്രകാശ് മുഖ്യമന്ത്രിയെ വിമർശിച്ചുകൊണ്ട് വാർത്താ സമ്മേളനം നടത്തിയിരുന്നു. ഇതിന് തൊട്ടുപിന്നാലെയാണ് കെ സുധാകരനെതിരെയും വ്യാജ വാർത്തകൾ പ്രചരിക്കാൻ തുടങ്ങിയത്. വ്യാജ വാർത്ത ശ്രദ്ധയിൽപ്പെട്ടതിനെ തുടർന്ന് സംഭവത്തിൽ അന്വേഷണം ആവശ്യപ്പെട്ട് കെ സുധാകരൻ എംപി ഡിജിപിക്ക് പരാതി നൽകിയിരുന്നു. തുടർന്ന് ഞായറാഴ്ച (ഒക്ടോബർ 4) പൊലീസ് ആസ്ഥാനത്ത് നിന്ന് ലഭിച്ച ഈ പരാതി പരിശോധിച്ചതിൻ്റെ അടിസ്ഥാനത്തിലാണ് സൈബർ പൊലീസ് നടപടി സ്വീകരിച്ചത്.

കേസ് രജിസ്റ്റർ ചെയ്തു

ഞായറാഴ്ച ഉച്ചയോടെയാണ് ബിഎൻഎസ് വകുപ്പുകളായ 192, 353(1)(ബി) യും 2000-ലെ ഇൻഫർമേഷൻ ടെക്നോളജി ആക്ടിലെ 66(സി) വകുപ്പും പ്രകാരം ക്രൈം നമ്പർ 0025/2026 ആയി പൊലീസ് കേസ് രജിസ്റ്റർ ചെയ്തു. കണ്ണൂർ സൈബർ ക്രൈം പൊലീസ് ഇൻസ്പെക്ടർ കെവി മഹേഷാണ് കേസിൻ്റെ തുടരന്വേഷണം നടത്തുന്നത്. വ്യാജ വാർത്ത പ്രചരിപ്പിച്ച ഫേസ്ബുക്ക് പോസ്റ്റും ലിങ്കും ഉൾപ്പെടെയുള്ള വിവരങ്ങൾ പൊലീസ് ശേഖരിച്ചിട്ടുണ്ട്. പ്രതിയെ കണ്ടെത്താനുള്ള അന്വേഷണം ഊർജിതമാക്കിയതായി പൊലീസ് അറിയിച്ചു.

ഈ ക്രൈം/രാഷ്ട്രീയ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. ഏറ്റവും പുതിയ വാർത്തകളും വിവരങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. 

Article Summary: Kannur Cyber Crime Police registered a case against a Facebook account named 'Rajiv PR Rajiv' for spreading fake news using Congress leader K. Sudhakaran's image. The fake post aimed to create unrest among party workers. The action was taken based on a complaint filed by the MP to the DGP.

#Kvartha #KannurNews #KSudhakaran #CyberCrime #KeralaPolice #FakeNews #Congress #MalayalamNews #AmmuNews