കണ്ണൂരിൽ ബിജെപി നേതാവിൻ്റെ കൊലപാതകം: ഭാര്യ അറസ്റ്റിൽ; പ്രണയബന്ധവും ഗൂഢാലോചനയും പുറത്ത്
● കൊലപാതകം നടന്ന ദിവസം മിനി നമ്പ്യാർ വീട്ടിലുണ്ടായിരുന്നില്ല.
● വെടിയൊച്ച കേട്ടിട്ടും മിനി നമ്പ്യാർ വീട്ടിലേക്ക് വരാതിരുന്നത് സംശയത്തിനിടയാക്കി.
● വാട്‌സാപ്പ് സന്ദേശങ്ങളും ഫോൺ രേഖകളും നിർണ്ണായകമായി.
● പ്രതിയെ പയ്യന്നൂർ ഒന്നാം ക്ലാസ് മജിസ്ട്രേട്ട് കോടതി റിമാൻഡ് ചെയ്തു.
പിലാത്തറ (കണ്ണൂർ): (KVARTHA) കൈതപ്രം സ്വദേശിയും ബിജെപി പ്രാദേശിക നേതാവുമായ കെ കെ രാധാകൃഷ്ണൻ വെടിയേറ്റു മരിച്ച സംഭവത്തിൽ ഭാര്യ വി വി മിനി നമ്പ്യാരെ പൊലീസ് അറസ്റ്റ് ചെയ്തു. ബിജെപി മുൻ ജില്ലാ കമ്മിറ്റി അംഗം കൂടിയാണ് മിനി നമ്പ്യാർ.
കൊലപാതക ഗൂഢാലോചനയിൽ മിനി നമ്പ്യാർക്ക് പങ്കുണ്ടെന്ന് പ്രത്യേക അന്വേഷകസംഘം കണ്ടെത്തിയതിനെ തുടർന്നാണ് പരിയാരം എസ്എച്ച്ഒയുടെ നേതൃത്വത്തിലുള്ള സംഘം അറസ്റ്റ് രേഖപ്പെടുത്തിയത്.
ചൊവ്വാഴ്ച ഉച്ചയോടെ മിനി നമ്പ്യാരെ പരിയാരം പൊലീസ് സ്റ്റേഷനിലേക്ക് ചോദ്യം ചെയ്യാനായി വിളിച്ചു വരുത്തുകയും തുടർന്ന് അറസ്റ്റ് രേഖപ്പെടുത്തുകയുമായിരുന്നു. പയ്യന്നൂർ ഒന്നാം ക്ലാസ് മജിസ്ട്രേട്ട് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. സംഭവത്തിൽ രാധാകൃഷ്ണനെ വെടിവെച്ച് കൊലപ്പെടുത്തിയ എൻ കെ സന്തോഷിനെ നേരത്തെ തന്നെ പൊലീസ് അറസ്റ്റ് ചെയ്തിരുന്നു.
പൊലീസ് അന്വേഷണത്തിൽ മിനി നമ്പ്യാരും അറസ്റ്റിലായ സന്തോഷും ദീർഘകാലമായി അടുത്ത ബന്ധം പുലർത്തിയിരുന്നു എന്ന് കണ്ടെത്തി. ഇരുവരും തമ്മിലുള്ള വാട്‌സാപ്പ് സന്ദേശങ്ങളും ഫോൺ രേഖകളും പൊലീസ് വിശദമായി പരിശോധിച്ചു.
കൊലപാതകം നടന്ന മാർച്ച് 20ന് സന്തോഷും മിനി നമ്പ്യാരും തമ്മിൽ നിരവധി ഫോൺ സന്ദേശങ്ങൾ കൈമാറിയതായി പൊലീസ് കണ്ടെത്തി. ഈ വിവരങ്ങളുടെ അടിസ്ഥാനത്തിലാണ് കൊലപാതക ഗൂഢാലോചനയിൽ മിനി നമ്പ്യാർക്ക് പങ്കുണ്ടെന്ന നിഗമനത്തിൽ പൊലീസ് എത്തിയത്.
മിനി നമ്പ്യാരും സന്തോഷും തമ്മിലുള്ള അടുപ്പത്തെക്കുറിച്ച് രാധാകൃഷ്ണൻ പലതവണ ചോദ്യം ചെയ്തിരുന്നതായും വിവരങ്ങളുണ്ട്. കൊലപാതകം നടന്ന ദിവസവും ഈ ബന്ധത്തിൻ്റെ പേരിൽ രാധാകൃഷ്ണൻ ഭാര്യയെ ശകാരിച്ചിരുന്നു. കൊലപാതകം നടന്നതിന് ശേഷവും ഇരുവരും തമ്മിൽ ബന്ധം പുലർത്തിയിരുന്നതായാണ് പൊലീസ് സംശയിക്കുന്നത്.
രാധാകൃഷ്ണൻ പുതുതായി നിർമ്മിക്കുന്ന വീട്ടിൽ വെച്ചായിരുന്നു കൊലപാതകം നടന്നത്. മിനി നമ്പ്യാർ കൊലപാതകം നടന്ന ദിവസം മാതമംഗലത്തെ സ്വന്തം വീട്ടിൽ നിന്നും തൊട്ടടുത്തുള്ള അമ്മയുടെ വീട്ടിലേക്ക് പോയിരുന്നു. വെടിയൊച്ച കേട്ടിട്ടും മിനി നമ്പ്യാർ കൊലപാതകം നടന്ന വീട്ടിലേക്ക് വരാതിരുന്നത് പൊലീസിൻ്റെ സംശയം വർദ്ധിപ്പിച്ചു.
ഈ സാഹചര്യത്തെളിവുകളും ഫോൺ രേഖകളും വാട്‌സാപ്പ് സന്ദേശങ്ങളുമാണ് മിനി നമ്പ്യാരുടെ അറസ്റ്റിലേക്ക് നയിച്ചത്. സംഭവത്തെക്കുറിച്ച് കൂടുതൽ അന്വേഷണം നടക്കുകയാണെന്ന് പൊലീസ് അറിയിച്ചു.
ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.
Summary: BJP leader murdered in Kannur, wife arrested. Investigation revealed love affair and conspiracy.
#KannurNews, #CrimeNews, #KeralaPolice, #MurderCase, #Arrest, #LocalNews
