ബംഗ്ലാദേശ് യുവതികളുടെ അറസ്റ്റ്; കണ്ണൂരിൽ സ്പാകൾ കേന്ദ്രീകരിച്ച് പൊലീസ് പരിശോധന ഊർജിതം, കൂടുതൽ പേർ നിരീക്ഷണത്തിൽ

കണ്ണൂർ: (KVARTHA) ബംഗ്ലാദേശി യുവതികളുടെ അറസ്റ്റിന് ശേഷം കണ്ണൂരിലെ സ്പാകൾ കേന്ദ്രീകരിച്ച് പൊലീസ് അന്വേഷണം ഊർജിതമാക്കി. കണ്ണൂർ ജില്ലയിലെ സ്പാ, മസാജ് പാർലറുകളിൽ പാസ്‌പോർട്ടും വിസയുമില്ലാതെ ജോലി ചെയ്യുന്നവർ ഇനിയുമേറെയുണ്ടെന്ന് കണ്ണൂർ ടൗൺ പൊലീസ് നടത്തിയ അന്വേഷണത്തിൽ വ്യക്തമായിട്ടുണ്ട്.

കൂടുതൽ പേർ നിരീക്ഷണത്തിൽ

ബംഗ്ലാദേശിൽ നിന്നും സ്ത്രീകൾ മാത്രമല്ല പുരുഷന്മാരും നഗരത്തിൽ എത്തിയിട്ടുണ്ട്. ഷവർമ, മന്തി റെസ്റ്റോറൻ്റുകൾ, ഇറച്ചിക്കടകൾ എന്നിവിടങ്ങളിലാണ് ഇവർ കൂടുതലായി ജോലി ചെയ്യുന്നത്. ഇത്തരത്തിൽ അനധികൃതമായി ജോലി ചെയ്യുന്നവരിൽ കൂടുതൽ യുവാക്കളാണ്. നിർമാണ മേഖലയിൽ ഉൾപ്പെടെ തദ്ദേശീയ കരാറുകാരുടെ കീഴിൽ ഇവർ ജോലി ചെയ്യുന്നുവെന്നാണ് പൊലീസിന് ലഭിച്ച വിവരം.

കർശന നിർദേശങ്ങളുമായി പൊലീസ്

ഇത്തരത്തിലുള്ള വിദേശികളെ കണ്ടെത്താൻ പൊലീസ് പരിശോധന കർശനമാക്കിയിട്ടുണ്ട്. ഇതിൻ്റെ ഭാഗമായി അതിഥി തൊഴിലാളികളുടെ തിരിച്ചറിയൽ കാർഡുകൾ ഹാജരാക്കാൻ സ്ഥാപന ഉടമകൾക്ക് പൊലീസ് നിർദേശം നൽകി. കണ്ണൂർ ടൗൺ ഇൻസ്പെക്ടർ മഹേഷ് കണ്ടമ്പേത്തിൻ്റെ നേതൃത്വത്തിലാണ് പൊലീസ് അന്വേഷണം നടത്തിവരുന്നത്. 

കണ്ണൂർ നഗരത്തിലെ സ്പാകളിൽ നിന്ന് അഞ്ച് ബംഗ്ലാദേശ് യുവതികളെ പാസ്‌പോർട്ടും വിസയുമില്ലാതെ പിടികൂടിയതിനെ തുടർന്നാണ് പൊലീസ് നടപടി. ഇതര സംസ്ഥാനക്കാർ ജോലി ചെയ്യുന്ന എല്ലാ സ്ഥാപനങ്ങളുടെ ഉടമകളോടും ഇവരുടെ തിരിച്ചറിയൽ കാർഡുകൾ ഹാജരാക്കാനാണ് നിർദേശിച്ചിട്ടുള്ളത്.

വ്യാജ തിരിച്ചറിയൽ കാർഡുകൾ

പിടിയിലായ ബംഗ്ലാദേശ് സ്വദേശികളായ നസ് അക്തർ (40), തസ്ലിമ ഖാത്തുൺ (25), മോയ ഖാത്തുൺ (29), നസ്റിൻ (24), സലീന ഖാൻ (29) എന്നിവർ റിമാൻഡിലാണ്. ഇവർ പൊലീസിനു നൽകിയ മൊഴിയിലാണ് കൂടുതൽ പേർ കണ്ണൂർ ജില്ലയിൽ ജോലി ചെയ്യുന്നുണ്ടെന്നറിഞ്ഞത്. 

ബംഗ്ലാദേശിൽ നിന്ന് അതിർത്തി വഴി കൊൽക്കത്തയിലെത്തി വ്യാജ തിരിച്ചറിയൽ കാർഡുണ്ടാക്കിയാണ് ഇവർ ജോലിക്കെത്തുന്നത്. ഇതിനായി പ്രത്യേക ഏജൻസികളുണ്ടെന്ന് അറസ്റ്റിലായവർ മൊഴി നൽകിയിട്ടുണ്ട്. ആദ്യം പിടിയിലായ സലീന ഖാൻ നൽകിയ വിവരത്തെ തുടർന്നാണ് മറ്റു നാല് പേരെയും പൊലീസ് പിടികൂടിയത്. ബെംഗളൂരിൽ നിന്നാണ് ഇത്തരക്കാരെ കണ്ണൂരിൽ ജോലിക്കെത്തിക്കുന്നത്.

കേന്ദ്ര ഏജൻസികളുടെ ഇടപെടൽ

ഇവരെ കൊണ്ടുവരാൻ പ്രത്യേക സംഘങ്ങൾ പ്രവർത്തിക്കുന്നുണ്ട്. രാജ്യസുരക്ഷയെ ബാധിക്കുന്ന കാര്യമായതിനാൽ കേന്ദ്ര അന്വേഷണ ഏജൻസികളും ഇവരെക്കുറിച്ച് അന്വേഷിക്കുന്നുണ്ട്. കേന്ദ്ര ഏജൻസികളാണ് കണ്ണൂർ സിറ്റി പൊലീസ് കമ്മിഷണർക്ക് രഹസ്യവിവരം നൽകിയത്. പിടിയിലായവരുടെ ജുഡീഷ്യൽ കാലാവധി കഴിഞ്ഞാൽ ബംഗ്ലാദേശിലേക്ക് തന്നെ തിരിച്ചയക്കുമെന്ന് കണ്ണൂർ സിറ്റി പൊലീസ് കമ്മിഷണർ വിജയ് ഭാരത് റെഡ്ഡി അറിയിച്ചു.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം.

Article Summary: Kannur police intensified inspections in spas and massage parlors following the arrest of five Bangladeshi women staying with fake IDs.

#Kvartha #KannurNews #KeralaPolice #FakeID #BangladeshiImmigrants #KannurCityPolice #MalayalamNews #CrimeNews #AmmuNews