കണ്ണപുരം സ്ഫോടനക്കേസ്: പ്രധാന പ്രതി അനു മാലിക്കിനെതിരെ കാപ്പ ചുമത്തും

പഴയങ്ങാടി: (KVARTHA) കണ്ണപുരം കീഴറയിലെ വാടക വീട്ടിൽ നടന്ന ബോംബ് സ്ഫോടനക്കേസിലെ മുഖ്യപ്രതി അനു മാലിക്കിനെതിരെ കാപ്പ (കേരള ആന്റി സോഷ്യൽ ആക്ടിവിറ്റീസ് പ്രിവൻഷൻ ആക്ട്) ചുമത്താൻ പോലീസ് നീക്കം തുടങ്ങി. നിയമവശങ്ങൾ പരിശോധിച്ച് വരികയാണെന്ന് കണ്ണപുരം പോലീസ് അറിയിച്ചു.

ഇയാളുടെ റിമാൻഡ് കാലാവധി പൂർത്തിയായ ശേഷമായിരിക്കും കാപ്പ ചുമത്തുക. അനധികൃതമായി സ്ഫോടക വസ്തുക്കൾ കൈവശം വെക്കുന്നത് ഇയാളുടെ പതിവായ സാഹചര്യത്തിലാണ് ഇങ്ങനെയൊരു തീരുമാനം. 

അഞ്ചോളം സ്ഫോടക വസ്തു കേസുകളിൽ പ്രതിയാണ് അനു മാലിക്ക്. പ്രതിയെ കണ്ണൂർ കോടതിയിൽ ഹാജരാക്കി റിമാൻഡ് ചെയ്തു. കൂടുതൽ ചോദ്യം ചെയ്യലിനും തെളിവെടുപ്പിനുമായി ജുഡീഷ്യൽ കസ്റ്റഡിയിൽ നിന്ന് വിട്ടുകിട്ടാൻ കണ്ണപുരം പോലീസ് ഹരജി നൽകും.

കാഞ്ഞങ്ങാട്ടെ സുഹൃത്തിന്റെ വീട്ടിൽ നിന്നാണ് അനു മാലിക്കിനെ പോലീസ് പിടികൂടിയത്. കണ്ണപുരം കീഴറയിൽ നടന്ന സ്ഫോടനത്തിൽ കൊല്ലപ്പെട്ട മുഹമ്മദ് അഷാം ഇയാളുടെ ബന്ധുവാണ്. അനധികൃതമായി വീട്ടിൽ സൂക്ഷിച്ചിരുന്ന പടക്കശേഖരം പൊട്ടിത്തെറിച്ചതിനെ തുടർന്ന് വീടിന്റെ ഒരു ഭാഗം തകർന്നിരുന്നു.

പയ്യന്നൂരിൽ ഹാർഡ്‌വെയർ ഷോപ്പ് നടത്തുന്നുണ്ടെന്ന് പറഞ്ഞാണ് അനു മാലിക്ക് റിട്ടയേർഡ് അധ്യാപകനായ ഗോവിന്ദനിൽ നിന്ന് കീഴറയിൽ വീട് വാടകക്കെടുത്തത്. പത്രത്തിൽ പരസ്യം കണ്ടാണ് ഇയാൾ വീട് എടുക്കാൻ സമീപിച്ചതെന്ന് വീട്ടുടമ പോലീസിന് മൊഴി നൽകിയിട്ടുണ്ട്.

ഈ വിഷയത്തെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Police to charge Anu Malik under Kaapa in Kannapuram blast case.

#Kannur #Blast #Crime #Police #Kaapa #Kerala