കൊച്ചി: (KVARTHA) കളമശ്ശേരി ഗവൺമെൻ്റ് പോളിടെക്‌നിക് കോളേജിലെ 'പെരിയാർ' മെൻസ് ഹോസ്റ്റലിൽ നിന്നും 1.9 കിലോഗ്രാം കഞ്ചാവ് പിടിച്ചെടുത്ത സംഭവത്തിൽ നിർണായക വിവരങ്ങൾ പുറത്ത്. ഹോളി ആഘോഷവേളയിൽ ലഹരിമരുന്ന് ഉപയോഗം ഉണ്ടാകാൻ സാധ്യതയുണ്ടെന്ന് കാണിച്ച് കോളേജ് പ്രിൻസിപ്പൽ കൊച്ചി ഡി.സി.പിക്ക് നൽകിയ കത്താണ് ഇപ്പോൾ പുറത്തുവന്നിരിക്കുന്നത്. കാമ്പസിനകത്തും പുറത്തും ശക്തമായ നിരീക്ഷണം വേണമെന്ന് പ്രിൻസിപ്പൽ കത്തിൽ അഭ്യർത്ഥിച്ചിട്ടുണ്ട്.

പ്രിൻസിപ്പൽ ഡോ. ഐജു തോമസ് ബുധനാഴ്ചയാണ് ഡി.സി.പിക്ക് മുന്നറിയിപ്പ് കത്ത് നൽകിയത്. വെള്ളിയാഴ്ച ഉച്ച മുതൽ വിദ്യാർത്ഥികൾ ഹോളി ആഘോഷിക്കാൻ തീരുമാനിച്ചിട്ടുണ്ടെന്നും വിശ്വസനീയമായ കേന്ദ്രങ്ങളിൽ നിന്ന് ലഭിച്ച വിവരമനുസരിച്ച് ഈ സമയം മദ്യം, മയക്കുമരുന്ന് തുടങ്ങിയ ലഹരിപദാർത്ഥങ്ങളുടെ ഉപയോഗം വ്യാപകമാകാൻ സാധ്യതയുണ്ടെന്നും കത്തിൽ പറയുന്നു. 

ഇതിനായി വിദ്യാർത്ഥികൾക്കിടയിൽ പണപ്പിരിവ് നടക്കുന്നതായും സൂചനയുണ്ട്. ഈ സാഹചര്യത്തിൽ കോളേജ് കാമ്പസിനുള്ളിൽ പൊലീസിന്റെ സാന്നിധ്യം ഉറപ്പാക്കുകയും നിരീക്ഷണം ശക്തമാക്കുകയും ചെയ്യേണ്ടത് അത്യന്താപേക്ഷിതമാണെന്ന് പ്രിൻസിപ്പൽ കത്തിൽ ചൂണ്ടിക്കാട്ടി. കാമ്പസിന് പുറത്തും ഹോസ്റ്റൽ കേന്ദ്രീകരിച്ചും ലഹരി ഉപയോഗത്തിനെതിരെ ശക്തമായ നടപടി സ്വീകരിക്കണമെന്നും അദ്ദേഹം ആവശ്യപ്പെട്ടിട്ടുണ്ട്.

അതേസമയം, കഞ്ചാവ് പിടികൂടിയ സംഭവത്തിൽ മുഖ്യപ്രതിയായ ആകാശിൻ്റെ മൊഴിയുടെ അടിസ്ഥാനത്തിൽ പൊലീസ് അന്വേഷണം ഊർജിതമാക്കിയിട്ടുണ്ട്. ഇതിൻ്റെ ഭാഗമായി ആലുവ സ്വദേശിയായ ആഷിക്, കൂടെയുണ്ടായിരുന്ന മറ്റൊരാൾ എന്നിവരെ പോലീസ് കസ്റ്റഡിയിലെടുത്തിട്ടുണ്ട്. ഇവരെ വിശദമായി ചോദ്യം ചെയ്തുവരികയാണ്. കസ്റ്റഡിയിലുള്ള ആഷിക്കും മറ്റൊരാളും കളമശ്ശേരി ഗവൺമെൻ്റ് പോളിടെക്‌നിക്കിലെ പൂർവ വിദ്യാർത്ഥികളാണെന്ന് പോലീസ് അറിയിച്ചു.

വ്യാഴാഴ്ച രാത്രി കോളജ് കാമ്പസിലെ പെരിയാർ മെൻസ് ഹോസ്റ്റലിൽ നടത്തിയ റെയ്ഡിലാണ് അവസാന വർഷ വിദ്യാർത്ഥിയായ കെഎസ്‌യു പ്രവർത്തകൻ ആകാശിന്റെ (21) പക്കൽ നിന്ന് 1.9 കിലോഗ്രാം കഞ്ചാവ് പിടികൂടിയത്. ആകാശിനെ റിമാൻഡ് ചെയ്തിരിക്കുകയാണ്. മറ്റൊരു മുറിയിൽനിന്ന് 9.7 ഗ്രാം കഞ്ചാവുമായി ആദിത്യൻ കെ സുനിൽ (20), ആർ അഭിരാജ് (21) എന്നിവരെയും അറസ്റ്റ് ചെയ്തിരുന്നു. ഇവരെ പിന്നീട് ജാമ്യത്തിൽ വിട്ടു. മൂവരും അവസാനവർഷ വിദ്യാർഥികളാണ്.

ഈ വാർത്ത പങ്കുവെക്കാനും അഭിപ്രായങ്ങൾ രേഖപ്പെടുത്താനും മറക്കരുത്.

The principal of Kalamassery Polytechnic had alerted the police about potential drug use during the Holi celebration, leading to a raid at the men's hostel where 1.9 kg of cannabis was seized. The main accused has been remanded, and further investigation is underway with the detention of former students.

#KalamasseryPolytechnic #DrugSeizure #HoliCelebration #KeralaPolice #Narcotics #CollegeNews