കളമശ്ശേരി പോളിടെക്‌നിക് കഞ്ചാവ് കേസ്: മുഖ്യപ്രതി ഒഡീഷയിൽ പിടിയിൽ, കൂടുതൽ വിവരങ്ങൾ പുറത്ത്

കളമശ്ശേരി: (KVARTHA) കളമശ്ശേരി പോളിടെക്‌നിക്കിൽ നിന്ന് കഞ്ചാവ് പിടികൂടിയ കേസിൽ മുഖ്യപ്രതിയായ അജയ് പ്രദാനെ കളമശ്ശേരി പൊലീസ് ഒഡീഷയിലെ ദരിങ്ക്ബാദിൽ നിന്ന് പിടികൂടി. ഹോസ്റ്റലിലേക്ക് കഞ്ചാവ് എത്തിക്കാൻ ഇതര സംസ്ഥാനക്കാരുടെ സംഘത്തിന് ഇത് കൈമാറിയത് ഇയാളാണെന്ന് പൊലീസ് അറിയിച്ചു.

മാർച്ച് 14 വെള്ളിയാഴ്ച പുലർച്ചെ കളമശ്ശേരി പോളിടെക്നിക്കിലെ ആൺകുട്ടികളുടെ ഹോസ്റ്റലിൽ നടത്തിയ പരിശോധനയിലാണ് ഏകദേശം രണ്ട് കിലോയോളം കഞ്ചാവ് പിടികൂടിയത്. വ്യാഴാഴ്ച രാത്രി ഒമ്പത് മണിയോടെ ആരംഭിച്ച പരിശോധന വെള്ളിയാഴ്ച പുലർച്ചെ വരെ നീണ്ടു. 

സംഭവവുമായി ബന്ധപ്പെട്ട് കെഎസ്‌യു പ്രവർത്തകരായ ആദിത്യൻ, ആകാശ്, എസ്എഫ്‌ഐ പ്രവർത്തകനായ അഭിരാജ് എന്നിവരെ പൊലീസ് പിടികൂടിയിരുന്നു. ഇതിൽ ആകാശിന്റെ മുറിയിൽ നിന്നാണ് 1.9 കിലോ കഞ്ചാവ് കണ്ടെത്തിയത്. ആകാശ് വിദ്യാർത്ഥികൾക്ക് കഞ്ചാവ് വിൽപന നടത്തിയിരുന്നതായി പൊലീസ് റിമാൻഡ് റിപ്പോർട്ടിൽ വ്യക്തമാക്കിയിരുന്നു.
 

തുടർന്ന്, ഇവർക്ക് കഞ്ചാവ് നൽകിയ പൂർവ്വവിദ്യാർത്ഥികളായ ആഷിക്ക്, ഷാലിക്ക് എന്നിവരെയും പൊലീസ് അറസ്റ്റ് ചെയ്തു. ഷാലിക്ക് ക്യാമ്പസിലെ കെഎസ്‌യു നേതാവായിരുന്നു. ഇവരുടെ മൊഴിയുടെ അടിസ്ഥാനത്തിൽ കേസിലെ മുഖ്യപ്രതികളിലൊരാളായ അനുരാജിനെയും പൊലീസ് കസ്റ്റഡിയിലെടുത്തിരുന്നു. അനുരാജിന് വേണ്ടിയാണ് കഞ്ചാവ് എത്തിച്ചതെന്ന് ഇരുവരും മൊഴി നൽകിയിരുന്നു.

ഈ കേസിൽ കോളേജ് പ്രിൻസിപ്പൽ പൊലീസിന് നൽകിയ കത്താണ് നിർണായകമായത്. ക്യാമ്പസിൽ ലഹരി ഇടപാടുകൾ നടക്കുന്നുണ്ടെന്ന് ചൂണ്ടിക്കാട്ടിയായിരുന്നു പ്രിൻസിപ്പലിന്റെ കത്ത്. സംഭവത്തെ തുടർന്ന് കേസുമായി ബന്ധപ്പെട്ട നാല് വിദ്യാർത്ഥികളെ കോളേജിൽ നിന്ന് പുറത്താക്കിയിരുന്നു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായം പങ്കുവെക്കൂ, 
 

Article Summary: Main accused in Kalamassery Polytechnic cannabis case arrested.

#Kalamassery #CannabisCase #OdishaArrest #StudentDrugAbuse #KeralaPolice #DrugTrafficking