കെ രഘുനാഥ് വധക്കേസ്; മുൻ എംപിയുടെ മക്കളും ഡിവൈഎസ്പിയും സിബിഐ പിടിയിൽ

ബംഗളൂരു: (KVARTHA) വൻ സ്വത്തുക്കളുള്ള പ്രമുഖ റിയൽ എസ്റ്റേറ്റ് ഉടമ കെ രഘുനാഥ് കൊല്ലപ്പെട്ട കേസിൽ മുൻ ആന്ധ്രാപ്രദേശ് എംപിയുടെ രണ്ട് മക്കളേയും ഡിവൈഎസ്പിയെയും സിബിഐ അറസ്റ്റ് ചെയ്തു. മുൻ എംപിയും തിരുമല തിരുപ്പതി ദേവസ്ഥാനം മുൻ ചെയർമാനുമായിരുന്ന പരേതനായ ഡി കെ ആദികേശവലുവിന്റെ മകൻ ഡി എ ശ്രീനിവാസ്, മകൾ ഡി എ കൽപജ എന്നിവരെയും ബംഗളൂരിലെ സംസ്ഥാന മനുഷ്യാവകാശ കമ്മീഷൻ ഡിവൈഎസ്പി എസ് വൈ മോഹനെയുമാണ് സിബിഐ ഉദ്യോഗസ്ഥർ പിടികൂടിയത്.

2019 മേയിലാണ് റിയൽ എസ്റ്റേറ്റ് ഉടമയായ കെ രഘുനാഥിനെ മരിച്ച നിലയിൽ കണ്ടെത്തിയത്. ആദികേശവലുവിന്റെ അടുത്ത വിശ്വസ്തനായിരുന്ന രഘുനാഥും എംപിയുടെ മക്കളും തമ്മിൽ കോടികൾ വിലമതിക്കുന്ന സ്വത്തുക്കളുടെ ഉടമസ്ഥാവകാശം സംബന്ധിച്ച് വലിയ തർക്കങ്ങൾ നിലനിന്നിരുന്നതായി സിബിഐ പറയുന്നു. 2013-ൽ ആദികേശവലു മരിച്ചതോടെയാണ് ഈ തർക്കങ്ങൾ ആരംഭിച്ചതെന്ന് അന്വേഷണസംഘം ചൂണ്ടിക്കാട്ടുന്നു.

സ്വത്തിന്റെ പൂർണ്ണ ഉടമസ്ഥാവകാശം തനിക്കാണെന്ന് രഘുനാഥ് അവകാശപ്പെട്ടിരുന്നു. ഇത് സംബന്ധിച്ച തർക്കങ്ങൾക്കിടെ 2019 മേയ് മാസത്തിൽ രഘുനാഥിനെ ദുരൂഹ സാഹചര്യത്തിൽ മരിച്ച നിലയിൽ കണ്ടെത്തുകയായിരുന്നു. 

സംഭവത്തിൽ ആദ്യം കർണാടക പൊലീസ് അന്വേഷണം നടത്തിയെങ്കിലും ഇതിൽ അതൃപ്തി പ്രകടിപ്പിച്ച് ബന്ധുക്കൾ കോടതിയെ സമീപിച്ചു. ഒടുവിൽ സുപ്രീംകോടതി ഉത്തരവിട്ടതോടെയാണ് കേസ് സിബിഐ ഏറ്റെടുത്തത്.

ക്രിമിനൽ ഗൂഢാലോചന, വഞ്ചന, വിലപ്പെട്ട രേഖകൾ വ്യാജമായി നിർമ്മിക്കൽ, സർക്കാർ സ്റ്റാമ്പുകളുടെയും സീലുകളുടെയും വ്യാജരേഖകൾ ഉണ്ടാക്കൽ, തെളിവ് നശിപ്പിക്കൽ, വ്യാജ തെളിവുകൾ സൃഷ്ടിക്കൽ തുടങ്ങിയ ഗുരുതരമായ വകുപ്പുകൾ പ്രകാരമാണ് പ്രതികളുടെ അറസ്റ്റ് രേഖപ്പെടുത്തിയതെന്ന് സിബിഐ പത്രക്കുറിപ്പിൽ അറിയിച്ചു. 

കൊലപാതകം മറച്ചുവെക്കാനും തെളിവുകൾ ഇല്ലാതാക്കാനും ഡിവൈഎസ്പി എസ് വൈ മോഹൻ സഹായിച്ചതായും സിബിഐ സംശയിക്കുന്നു. കേസിൽ കൂടുതൽ പേർക്ക് പങ്കുണ്ടോ എന്ന കാര്യത്തിൽ വിശദമായ അന്വേഷണം നടന്നുവരികയാണ്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായം താഴെ കമന്റ് ചെയ്യൂ. ഷെയർ ചെയ്യുക. 

Article Summary: CBI arrests children of former Andhra MP and a DySP in the K Raghunath murder case.

 #Bengaluru #CBInews #MurderCase #KarnatakaPolice #JusticeForRaghunath #CrimeNews