തൊഴിൽ വാഗ്ദാനം ചെയ്ത് ലക്ഷങ്ങൾ തട്ടി; 14 കേസിലെ പിടികിട്ടാപ്പുള്ളി കണ്ണൂർ ക്രൈംബ്രാഞ്ചിന്റെ  പിടിയിൽ

കണ്ണൂർ: (KVARTHA) ഇന്ത്യൻ റെയിൽവേ, ഇന്ത്യൻ ആർമി, വിദേശ രാജ്യങ്ങൾ എന്നിവിടങ്ങളിൽ ജോലി വാഗ്ദാനം ചെയ്ത് നിരവധി പേരിൽ നിന്ന് ലക്ഷങ്ങൾ തട്ടിയെടുത്ത കേസിലെ പിടികിട്ടാപ്പുള്ളിയെ കണ്ണൂർ ക്രൈംബ്രാഞ്ച് സംഘം അറസ്റ്റ് ചെയ്തു. എസ് സന്തോഷ് കുമാർ (56) എന്നയാളെയാണ്  ക്രൈംബ്രാഞ്ച് എസ്പി ബാലകൃഷ്ണൻ നായരുടെ നേതൃത്വത്തിലുള്ള സംഘം എറണാകുളം കാക്കനാട് വെച്ച് പിടികൂടിയത്. കേരളത്തിലും കർണാടകയിലുമായി പത്തനംതിട്ട, കണ്ണൂർ, ആലപ്പുഴ, മംഗ്ളൂരു തുടങ്ങിയ സ്ഥലങ്ങളിലെ വിവിധ പൊലീസ് സ്റ്റേഷനുകളിൽ ഇയാൾക്കെതിരെ നിരവധി കേസുകൾ നിലവിലുണ്ട്. കോടതിയിൽ ഹാജരാകാതെ മുങ്ങിയതിനെത്തുടർന്ന് ഇയാളെ പിടികിട്ടാപ്പുള്ളിയായി പ്രഖ്യാപിച്ചിരുന്നു.

സീനിയർ സിവിൽ പൊലീസ് ഓഫീസർമാരായ പി പി പ്രമോദ്, പി ഷിനോജ്, കെ ബിജു എന്നിവരടങ്ങുന്ന അന്വേഷണ സംഘമാണ് തട്ടിപ്പുകാരനെ എറണാകുളത്ത് നിന്ന് പിടികൂടിയത്. സർക്കാർ-സ്വകാര്യ മേഖലകളിൽ വിസയും ജോലിയും നൽകാമെന്ന് വിശ്വസിപ്പിച്ച് ആളുകളെ കബളിപ്പിക്കുകയായിരുന്നു ഇയാളുടെ രീതി. വിവിധ ജില്ലകളിലായി ഇയാൾ തട്ടിയെടുത്ത പണത്തിൻ്റെ ആകെ തുക സംബന്ധിച്ച് ഉദ്യോഗസ്ഥർ അന്വേഷണം നടത്തി വരികയാണ്.

പ്രതിക്കെതിരെ കണ്ണൂർ ക്രൈംബ്രാഞ്ച്, കാട്ടാക്കട, കനകക്കുന്ന്, പന്തളം, അടൂർ, ഏനാത്ത്, പുളികീഴ്, ഹരിപ്പാട്, കർണാടകയിലെ മംഗ്ളൂരു ഈസ്റ്റ് എന്നീ പൊലീസ് സ്റ്റേഷനുകളിലായി ആകെ പതിനാല് കേസുകളാണ് നിലവിലുള്ളത്. അറസ്റ്റിലായ പ്രതിയെ കോടതിയിൽ ഹാജരാക്കി കണ്ണൂർ സെൻട്രൽ ജയിലിലേക്ക് റിമാൻഡ് ചെയ്തു. കൂടുതൽ പേർ ഇയാളുടെ തട്ടിപ്പിനിരയായിട്ടുണ്ടോ എന്ന് പരിശോധിക്കാൻ പൊലീസ് നീക്കം ആരംഭിച്ചിട്ടുണ്ട്.

നാട്ടിലെ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: S. Santhosh Kumar (56), a wanted fraudster in 14 job scam cases, was arrested by the Kannur Crime Branch in Kakkanad for swindling money by promising non-existent jobs in the Indian Railways, Army, and abroad.

#JobScam #KannurCrimeBranch #FraudCase #KeralaPolice #WantedCriminal #MalayalamNews #AnjanaNews