'സത്യം ഒരു ദിവസം തെളിയും'; മരിക്കുന്നതിന് മുൻപ് ജസീല ചിത്രീകരിച്ച വീഡിയോ പുറത്ത്

കാസർകോട്: (KVARTHA) യുവതി വിഷം ഉള്ളിൽ ചെന്ന് മരിച്ച സംഭവത്തിൽ ദുരൂഹത ആരോപിച്ച് കുടുംബം. കാസർകോട് മുളിയാർ പൊവ്വൽ ബെഞ്ച് കോടതിക്ക് സമീപത്തെ ജസീല (24) മരിച്ച സംഭവത്തിലാണ് ഭർതൃവീട്ടുകാർക്കും അയൽക്കാർക്കും പോലീസിനുമെതിരെ കുടുംബം പരാതിയുമായി രംഗത്തെത്തിയത്. 

വിഷം ഉള്ളിൽ ചെന്ന നിലയിൽ കണ്ടെത്തിയ ജസീല ചികിത്സയിലിരിക്കെ മരിച്ചതെന്നാണ് വിവരം. അസ്വാഭാവിക മരണമെന്ന നിലയിലാണ് പോലീസ് ഈ കേസിൽ അന്വേഷണം നടത്തുന്നത്.

ആരോപണം

മോഷണക്കുറ്റം ആരോപിച്ച് അപമാനിച്ചതിൽ മനംനൊന്താണ് ജസീല ജീവനൊടുക്കിയതെന്നാണ് കുടുംബത്തിന്റെ പ്രധാന ആരോപണം. മരിക്കുന്നതിന് മുൻപ് ജസീല ഇത് വിശദീകരിച്ച് ഒരു വീഡിയോ ചിത്രീകരിച്ചിരുന്നു. കുടുംബം ഈ വീഡിയോ പുറത്തുവിട്ടിട്ടുണ്ട്. 

അടുത്തിടെ ജസീലയുടെ ഭർതൃവീടിന് സമീപത്തെ വീട്ടിൽ ഒരു വിവാഹം നടന്നിരുന്നു. ഈ വിവാഹാഘോഷത്തിനിടെ അവിടെ നിന്ന് ഒരു സ്വർണ്ണമാല നഷ്ടപ്പെട്ടുവെന്ന പരാതി ഉയർന്നിരുന്നു. ഇതിന് പിന്നിൽ ജസീലയാണെന്നായിരുന്നു അയൽവാസികളുടെ ആരോപണം.

പോലീസ് നടപടി

മോഷണ ആരോപണത്തെ തുടർന്ന് ആദൂർ പോലീസ് ജസീലയെ ചോദ്യം ചെയ്തിരുന്നതായി കുടുംബം പറയുന്നു. എന്നാൽ, സംഭവത്തിൽ ജസീലയ്ക്ക് പങ്കുള്ളതായി കണ്ടെത്താനായിരുന്നില്ല. മാത്രമല്ല, മാല മോഷണവുമായി ബന്ധപ്പെട്ട് ആദൂർ പോലീസ് കേസും രജിസ്റ്റർ ചെയ്തിരുന്നില്ലെന്നാണ് ലഭ്യമായ വിവരം. 

വനിതാ പോലീസ് ഉദ്യോഗസ്ഥർ ഇല്ലാതെയാണ് ജസീലയെ പോലീസ് ചോദ്യം ചെയ്തതെന്നും കുടുംബം ആരോപിക്കുന്നുണ്ട്. പോലീസ് ചോദ്യം ചെയ്ത് വിട്ടയച്ചതിന് പിന്നാലെ യുവതി കടുത്ത മാനസിക പ്രയാസത്തിലായിരുന്നു. 

ഇതിനുപിന്നാലെയാണ് ജസീലയെ വിഷം ഉള്ളിൽ ചെന്ന നിലയിൽ കണ്ടെത്തിയത്. തുടർന്ന് ഗുരുതരാവസ്ഥയിലായ യുവതിയെ ആശുപത്രിയിൽ പ്രവേശിപ്പിക്കുകയായിരുന്നു.

വീഡിയോയിലെ വെളിപ്പെടുത്തൽ

മൊബൈൽ ഫോണിൽ ചിത്രീകരിച്ച ജസീലയുടെ വാക്കുകൾ കുടുംബം പുറത്തുവിട്ടിട്ടുണ്ട്. 'ഞാൻ എന്തായാലും ചെയ്യാത്ത തെറ്റിൻ്റെ പേരിൽ കുറേ അനുഭവിക്കുന്നുണ്ട്. എന്റെ ഫ്രണ്ടിന്റെ ഉമ്മാന്റെ ഗോൾഡ് മിസായിട്ടുണ്ട്. അത് ഞാൻ എടുത്തെന്നാണ് പറയുന്നത്. ഞാൻ എടുത്തിട്ടുപോലുമില്ല. 

എനിക്ക് അറിയത്തുപോലുമില്ല അങ്ങനെയൊരു സാധനമുള്ളത്. സത്യം ആരും വിശ്വസിക്കുന്നില്ല. ഞാൻ രേഖാമൂലം പരാതി കൊടുക്കാമെന്ന് വിചാരിച്ചപ്പോൾ ആദൂർ പോലീസ് ‌സ്റ്റേഷനിലെ ആൾക്കാർ അതിന് സമ്മതിക്കുന്നില്ല' എന്ന് വീഡിയോയിൽ പറയുന്നു.

ഭർത്താവിനും ഭർതൃമാതാവിനുമെതിരെയും വീഡിയോയിൽ പരാമർശമുണ്ട്. 'എന്റെ മരണത്തിന് ഉത്തരവാദി ഇവരൊക്കെയാണ്. എൻ്റെ ഭർത്താവും ഇതിൽ പങ്കാളിയാണ്. ഭർത്താവിന്റെ ഉമ്മയും ഉണ്ട്. ഞാൻ അധികം ജീവിച്ചിരിക്കില്ല. എന്നെ എന്തിനാണ് ഇങ്ങനെ നാണംകെടുത്തിയത്. സത്യം ഒരു ദിവസം തെളിയുമെന്ന വിശ്വാസത്തോടെ ഞാൻ പോവുകയാണ്' എന്നും ജസീല വീഡിയോയിൽ വ്യക്തമാക്കുന്നു.

അന്വേഷണം

ആരോപണങ്ങളുടെ പശ്ചാത്തലത്തിൽ യുവതിയുടെ കുടുംബം ഭർതൃവീട്ടുകാർക്കും അയൽക്കാർക്കും പോലീസിനുമെതിരെ ഔദ്യോഗികമായി പരാതി നൽകിയിട്ടുണ്ട്. ചികിത്സയിലിരിക്കെ യുവതിയുടെ മരണമൊഴി മജിസ്ട്രേറ്റ് നേരിട്ടെത്തി രേഖപ്പെടുത്തിയിരുന്നു. സംഭവത്തിൽ കാസർകോട് വിദ്യാനഗർ പോലീസ് അസ്വാഭാവിക മരണത്തിന് കേസ് രജിസ്‌റ്റർ ചെയ്‌ത്‌ വിശദമായ അന്വേഷണം നടത്തിവരികയാണ്.

ശ്രദ്ധിക്കുക: സ്വയം ജീവനെടുക്കുന്നത് ഒരു പരിഹാരമല്ല. മാനസിക സമ്മർദ്ദമോ നിരാശയോ അനുഭവപ്പെടുന്നവർ സഹായം തേടണം. 📞 ദിശ ഹെൽപ്പ്‌ലൈൻ: 1056 / 0471-2552056 📞 ടെലിമാനസ്: 14416

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: 24-year-old Jaseela died in Kasaragod after alleged harassment over a false theft charge; family blames in-laws and police.

#KasaragodNews #JusticeForJaseela #MentalHarassment #KeralaPolice #Muliyar #Powwal #KVARTHA