ഇരിക്കൂറിലെ കവർച്ചയിൽ വൻ വഴിത്തിരിവ്: മോഷണം നടന്ന വീട്ടിലെ മരുമകൾ ലോഡ്ജിൽ കൊല്ലപ്പെട്ടു; ആൺ സുഹൃത്ത് അറസ്റ്റിൽ

കണ്ണൂർ: (KVARTHA) ഇരിക്കൂർ കല്യാട്ടെ വീട്ടിൽ പട്ടാപ്പകൽ നടന്ന കവർച്ചയിൽ നിർണായകമായ വഴിത്തിരിവ്. മോഷണം നടന്ന വീട്ടിലെ മരുമകളായ യുവതിയെ കർണാടകയിലെ ലോഡ്ജിൽ അതിക്രൂരമായി കൊലപ്പെടുത്തിയ നിലയിൽ കണ്ടെത്തി. 

വായിൽ ഡിറ്റനേറ്റർ വെച്ച് പൊട്ടിച്ചാണ് ദർശിതയെ കൊലപ്പെടുത്തിയതെന്നാണ് പോലീസ് അന്വേഷണത്തിൽ തെളിഞ്ഞത്. സംഭവവുമായി ബന്ധപ്പെട്ട് ദർശിതയുടെ സുഹൃത്തായ സിദ്ധരാജുവിനെ (28) കർണാടക പോലീസ് കസ്റ്റഡിയിലെടുത്തു. ഇയാളാണ് കൊലപാതകത്തിന് പിന്നിലെന്നാണ് പോലീസ് നിഗമനം.

കൊലപാതകവും കവർച്ചയും

വെള്ളിയാഴ്ചയാണ് ഇരിക്കൂർ കല്യാട് ചുങ്കസ്ഥാനത്ത് സിബ്ഗ കോളേജിന് സമീപം അഞ്ചാംപുര വീട്ടിൽ കെ സി സുമതയുടെ വീട്ടിൽ മോഷണം നടന്നത്. സുമതയും മറ്റൊരു മകനായ സൂരജും രാവിലെ ചെങ്കൽപ്പണയിൽ ജോലിക്ക് പോയ സമയത്താണ് മോഷണം നടന്നത്. 

ഈ സമയത്ത് സുമതയുടെ മൂത്ത മകൻ സുഭാഷിന്റെ ഭാര്യ ദർശിതയും (22) രണ്ടര വയസ്സുള്ള മകളും മാത്രമാണ് വീട്ടിലുണ്ടായിരുന്നത്. സുമതയും സൂരജും പോയതിന് പിന്നാലെ ദർശിതയും മകളോടൊപ്പം വീട് പൂട്ടി കർണാടകയിലെ സ്വന്തം വീട്ടിലേക്ക് പോയതായാണ് ആദ്യം പറഞ്ഞിരുന്നത്. 

എന്നാൽ വൈകിട്ട് നാല് മണിയോടെ സുമത തിരിച്ച് വീട്ടിലെത്തിയപ്പോഴാണ് 30 പവൻ സ്വർണവും നാല് ലക്ഷം രൂപയും മോഷണം പോയതായി ശ്രദ്ധയിൽപ്പെട്ടത്.

ആൺസുഹൃത്ത് പോലീസ് പിടിയിൽ

കവർച്ചയെക്കുറിച്ച് വിവരങ്ങൾ ശേഖരിക്കുന്നതിനായി പോലീസ് ദർശിതയെ ബന്ധപ്പെടാൻ ശ്രമിച്ചെങ്കിലും കഴിഞ്ഞില്ല. പിന്നീട് ഞായറാഴ്ചയാണ് മൈസൂരിലെ സാലിഗ്രാമത്തിലെ ഒരു ലോഡ്ജിൽ ദർശിതയെ ക്രൂരമായി കൊലപ്പെടുത്തിയ നിലയിൽ കണ്ടെത്തിയ വിവരം ഇരിട്ടി പോലീസിന് ലഭിച്ചത്. 

കൊലപാതകത്തിൽ ദർശിതയുടെ സുഹൃത്തായ കർണാടക സ്വദേശി സിദ്ധരാജുവിനെ പോലീസ് അറസ്റ്റ് ചെയ്തു. കഴിഞ്ഞ ദിവസം രാവിലെ ക്ഷേത്രത്തിൽ പോയ ശേഷം ഇരുവരും ലോഡ്ജിൽ മുറിയെടുത്തെന്നാണ് മൊഴി. തുടർന്ന് പുറത്തുപോയി ഭക്ഷണം വാങ്ങി തിരിച്ച് വന്നപ്പോൾ ദർശിതയെ കൊല്ലപ്പെട്ട നിലയിൽ കണ്ടെന്നാണ് ഇയാൾ പോലീസിന് നൽകിയ മൊഴി.

അന്വേഷണം ഊർജിതമാക്കി

കവർച്ചയ്ക്ക് പിന്നിൽ ദർശിതയും സുഹൃത്തും ആണെന്നാണ് പോലീസ് സംശയിക്കുന്നത്. സംഭവത്തിൽ കൂടുതൽ പേർക്ക് പങ്കുണ്ടോ എന്നും പോലീസ് അന്വേഷിക്കുന്നുണ്ട്. 

ഇരിട്ടി ഡിവൈഎസ്പി കെ ധനഞ്ജയ ബാബു, കരിക്കോട്ടക്കരി സിഐ കെ ജെ വിനോയ് എന്നിവരുടെ നേതൃത്വത്തിലുള്ള സംഘമാണ് കേസ് അന്വേഷിക്കുന്നത്. കർണാടക പോലീസിൻ്റെ സഹായത്തോടെയാണ് അന്വേഷണം പുരോഗമിക്കുന്നത്.
 

കേരളത്തിൽ വർദ്ധിച്ചുവരുന്ന ക്രൈം വാർത്തകളെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: A woman is found dead in a Karnataka lodge after a robbery at her Kerala home.

#KeralaCrime #Murder #Kannur #Robbery #Investigation #KarnatakaPolice