ഒഴുക്കിൽപ്പെട്ട റഹീമിനെ കണ്ടെത്താനാകാതെ അധികൃതർ; തിരച്ചിൽ ദുഷ്കരം

ഇരിട്ടി: (KVARTHA) വാഹന പരിശോധനയ്ക്കിടെ പുഴയിൽ ചാടിയ യുവാവിനെ രണ്ടാം ദിവസവും കണ്ടെത്താനായില്ല. കേരള-കർണാടക അതിർത്തിയിലെ കൂട്ടുപുഴ പോലീസ് ചെക്ക് പോസ്റ്റിൽവെച്ച് വാഹന പരിശോധനയ്ക്കിടെയാണ് കാറിൽനിന്ന് ഇറങ്ങിയോടിയ യുവാവ് തൊട്ടടുത്തുള്ള പുഴയിലേക്ക് ചാടിയത്. കാപ്പ കേസിലെ പ്രതിയും ചക്കരക്കൽ പോലീസ് സ്റ്റേഷൻ പരിധിയിലെ അബ്ദുൽ റഹീമിനെയാണ് (30) കാണാതായത്.

കഴിഞ്ഞ വെള്ളിയാഴ്ച വൈകീട്ട് ആറുമണിയോടെയാണ് സംഭവം. പുഴയിൽ ചാടിയ ഉടൻ റഹീം ഒരു വള്ളിയിൽ പിടിച്ച് നിന്നെങ്കിലും ശക്തമായ കുത്തൊഴുക്കിൽ പിടിവിട്ട് മുങ്ങിത്താഴുകയും ഏകദേശം നൂറുമീറ്റർ അകലെയുള്ള കച്ചേരിക്കടവ് പാലം വരെ ഒഴുകിപ്പോകുകയും ചെയ്തതായി പുഴയോരത്ത് മീൻ പിടിക്കുകയായിരുന്നവർ പോലീസിനോട് പറഞ്ഞു.

സംഭവദിവസം രാത്രി എട്ടുമണിവരെ പോലീസും അഗ്നിശമന സേനയും നാട്ടുകാരുടെ സഹായത്തോടെ തിരച്ചിൽ നടത്തിയെങ്കിലും കനത്ത മഴയും പുഴയിലെ കുത്തൊഴുക്കും വെളിച്ചക്കുറവും കാരണം നിർത്തിവെക്കേണ്ടിവന്നു. പിന്നീട് ശനിയാഴ്ച മുഴുവനായും കൂട്ടുപുഴ മുതൽ ഇരിട്ടി പാലം വരെയുള്ള പുഴയുടെ ഇരുകരകളിലും തിരച്ചിൽ നടത്തിയെങ്കിലും ഫലമുണ്ടായില്ല.
 

ഇരിട്ടി, പേരാവൂർ, മട്ടന്നൂർ, കൂത്തുപറമ്പ് യൂണിറ്റുകളിലെ അഗ്നിരക്ഷാ സേനാംഗങ്ങളും സിവിൽ ഡിഫൻസ് സംഘവും രണ്ട് ഡിങ്കി ബോട്ടുകളിലായാണ് തിരച്ചിൽ നടത്തുന്നത്. ഇരിട്ടി അഗ്നിരക്ഷാ നിലയം സ്റ്റേഷൻ ഓഫീസർ ഉണ്ണികൃഷ്ണനാണ് തെരച്ചിലിന് നേതൃത്വം നൽകുന്നത്. വള്ളിത്തോട് ഒരുമ റെസ്ക്യൂ ടീം അംഗങ്ങളും ഇവർക്കൊപ്പം തെരച്ചിലിൽ പങ്കെടുത്തു.

കനത്ത മഴയിൽ അടിയൊഴുക്ക് ശക്തമായതും പാറക്കൂട്ടങ്ങളും കയങ്ങളും നിറഞ്ഞ പുഴയും തിരച്ചിൽ അതീവ ദുഷ്കരമാക്കുന്നുണ്ട്. റഹീം ഏറെ ദൂരം ഒഴുകിപ്പോകാൻ സാധ്യതയുണ്ടെന്നും അധികൃതർ അറിയിച്ചു.

ഇരിട്ടി സിഐ എ. കുട്ടിക്കൃഷ്ണൻ, എസ്ഐ എം.ജെ. ബെന്നി, എഎസ്ഐ റെജി എന്നിവരുടെ നേതൃത്വത്തിലുള്ള പോലീസ് സംഘവും റവന്യൂ അധികൃതരും സ്ഥലത്തെത്തിയിരുന്നു. റഹീമിനൊപ്പം കാറിലുണ്ടായിരുന്ന ഹാരിസ്, നിതിൻ എന്നിവരെ പോലീസ് ചോദ്യം ചെയ്ത് വിട്ടയച്ചു. ആവശ്യമുള്ളപ്പോൾ ഹാജരാകണമെന്ന വ്യവസ്ഥയിലാണ് ഇവരെ വിട്ടയച്ചത്.

അതേസമയം, ഇവർ സഞ്ചരിച്ച ഇന്നോവ ക്രിസ്റ്റ കാർ പോലീസ് കസ്റ്റഡിയിലെടുത്തിട്ടുണ്ട്. കാറിൽ നടത്തിയ പരിശോധനയിൽ അസ്വാഭാവികമായി ഒന്നും കണ്ടെത്താനായില്ല. എന്നാൽ, കാറിന്റെ ഉടമസ്ഥാവകാശത്തെക്കുറിച്ചുള്ള സംശയങ്ങൾ നിലനിൽക്കുന്നതിനാലാണ് പോലീസ് വാഹനം കസ്റ്റഡിയിൽവെച്ചത്. 

കോഴിക്കോട് സ്വദേശിയായ നിതിൻ ലോറിയിലാണ് ഗോണിക്കൊപ്പയിലേക്ക് പോയതെന്നും തിരികെ ഇന്നോവ കാറിലാണ് മൂവരും യാത്ര ചെയ്തതെന്നും പോലീസ് കണ്ടെത്തി. കാർ കർണാടകത്തിൽനിന്ന് മോഷ്ടിച്ചതാണോ എന്ന സംശയവും പോലീസിനുണ്ട്. ഇതിലെ ദുരൂഹതകൾ വിശദമായി അന്വേഷിച്ചുവരികയാണ്.
 

ഈ സംഭവത്തെക്കുറിച്ച് നിങ്ങൾക്കെന്താണ് പറയാനുള്ളത്? നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Search continues for a man who jumped into a river in Iritty.

#Iritty #MissingPerson #KeralaPolice #SearchAndRescue #Kannur #RiverAccident