പായയിൽ പൊതിഞ്ഞ മൃതദേഹം കല്ലറയിൽ എത്തിയത് എങ്ങനെ? ഇരിട്ടി വാണിയപ്പാറ പള്ളി സെമിത്തേരിയിലെ ദുരൂഹത നീക്കി പോലീസ്

​​​​​​​

കണ്ണൂർ: (KVARTHA) ഇരിട്ടി വാണിയപ്പാറ ഉണ്ണിമിശിഹ പള്ളി സെമിത്തേരിയിൽ പായയിൽ പൊതിഞ്ഞ നിലയിൽ മൃതദേഹം കണ്ടെത്തിയ സംഭവത്തിൽ ദുരൂഹതകളില്ലെന്ന് പോലീസ്. ശാസ്ത്രീയ അന്വേഷണത്തിലാണ് ഇക്കാര്യം വ്യക്തമായത്. സെമിത്തേരി നവീകരണത്തിൻ്റെ ഭാഗമായി കല്ലറയുടെ നമ്പറുകൾ മാറിയതാണ് ഇത്തരമൊരു ആശയക്കുഴപ്പത്തിന് കാരണമായതെന്ന് പോലീസ് വ്യക്തമാക്കി. പള്ളിയിലെ മരണ രജിസ്റ്ററുകൾ പരിശോധിച്ച് കല്ലറയിൽ അടക്കിയത് ആരൊക്കെ എന്നുള്ള വിവരങ്ങൾ ശേഖരിച്ചാണ് പോലീസ് സത്യം കണ്ടെത്തിയത്.

ജൂൺ 13-ന് ഇടവകാംഗത്തിൻ്റെ സംസ്കാരത്തിനായി കല്ലറ തുറന്നപ്പോഴാണ് പായയിൽ പൊതിഞ്ഞ നിലയിൽ മൃതദേഹത്തിന് സമാനമായ വസ്തു കണ്ടെത്തിയത്. നേരത്തെ അടക്കിയ ഒരു മൃതദേഹ അവശിഷ്ടത്തിന് ഒപ്പമായിരുന്നു ഈ വസ്തു ഉണ്ടായിരുന്നത്. ക്രൈസ്തവ ആചാരപ്രകാരം പായയിൽ പൊതിഞ്ഞ് മൃതദേഹം അടക്കാറില്ലാത്തതിനാൽ, സംശയം തോന്നിയ പള്ളി ഭാരവാഹികൾ പെട്ടെന്ന് തന്നെ പോലീസിനെ വിവരമറിയിക്കുകയായിരുന്നു. അന്വേഷണത്തിലൂടെ ദുരൂഹത നീക്കാനാണ് പോലീസിൽ പരാതി നൽകിയതെന്ന് പള്ളി വികാരി ഫാദർ ജിൽബർട്ട് കൊന്നയിൽ വ്യക്തമാക്കി. പ്രദേശവാസിയായ ജിൽസ് ഉണ്ണിമാക്കലിൻ്റെ ഫേസ്ബുക്ക് പോസ്റ്റിലൂടെയാണ് ഈ സംഭവം പുറംലോകം അറിഞ്ഞത്.

പോലീസ് നടത്തിയ വിശദമായ പരിശോധനയിലാണ് കല്ലറ നമ്പറുകൾ മാറിയ വിവരം ശ്രദ്ധയിൽപ്പെട്ടത്. 2006-ലും 2015-ലും ഈ കല്ലറയിൽ മൃതദേഹങ്ങൾ സംസ്കരിച്ചിരുന്നു. ഇതിൽ 2015-ൽ പോസ്റ്റ്‌മോർട്ടം കഴിഞ്ഞ മൃതദേഹമാണ് പായയിൽ പൊതിഞ്ഞ് സംസ്കരിച്ചിരുന്നത്. ഇതിൻ്റെ ഫോട്ടോഗ്രാഫുകൾ പോലീസിന് ലഭിച്ചിട്ടുണ്ട്. ഇതോടെയാണ് മൃതദേഹം സംബന്ധിച്ച ദുരൂഹതകൾ പൂർണമായും നീങ്ങിയത്.

നാട്ടിലെ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Police cleared the mystery of a mat-wrapped body found in an Iritty church cemetery, confirming it was a post-mortem case buried in 2015 after tomb numbers got swapped.

#KannurNews #Iritty #VaniyapparaChurch #KeralaPolice #LocalNewsMalayalam #KeralaNews #AnjanaNews