അന്വേഷണ ഉദ്യോഗസ്ഥനെ സസ്പെൻഡ് ചെയ്യാത്തതെന്ത്? ആഭ്യന്തരവകുപ്പിനെതിരെ രൂക്ഷവിമർശനവുമായി ഹൈകോടതി

കൊച്ചി: (KVARTHA) അഞ്ചരക്കണ്ടി ഡെൻ്റൽ കോളേജ് വിദ്യാർഥി നിതിൻരാജ് മരിച്ച കേസിലെ മുഖ്യപ്രതി ഡോ. എം കെ റാമിന് രക്ഷപ്പെടാൻ സാഹചര്യമൊരുക്കിയ അന്വേഷണ ഉദ്യോഗസ്ഥനെ സസ്പെൻഡ് ചെയ്യാത്തത് ആഭ്യന്തരവകുപ്പിൻ്റെ ഗുരുതര വീഴ്ചയെന്ന് ഹൈകോടതി. ആഭ്യന്തരവകുപ്പിൻ്റെ നടപടി തികച്ചും പക്ഷപാതപരമാണെന്നും കോടതി പലതവണ ആവശ്യപ്പെട്ടിട്ടും ഡിവൈഎസ്പി സുധീർ കല്ലനെ സസ്പെൻഡ് ചെയ്യാത്തത് എന്തുകൊണ്ടാണെന്നും ജസ്റ്റിസ് എ ബദറുദ്ദീൻ ചോദിച്ചു. ഡിവൈഎസ്പി ഗുരുതര വീഴ്ച വരുത്തിയെന്ന് അന്വേഷണത്തിൽ കണ്ടെത്തിയിട്ടും എന്തുകൊണ്ടാണ് ഉദ്യോഗസ്ഥനെ സംരക്ഷിക്കുന്നതെന്നും കോടതി ആരാഞ്ഞു.

നടപടിക്രമങ്ങളിലെ ഇരട്ടത്താപ്പ്

ഉദ്യോഗസ്ഥനെതിരെ സ്വീകരിച്ച നടപടി അറിയിക്കാൻ കോടതി നേരത്തെ നിർദേശിച്ചിരുന്നു. സസ്പെൻഷനുള്ള നടപടിക്രമം പാലിക്കേണ്ടതിനാലാണ് തീരുമാനം നീളുന്നതെന്നായിരുന്നു വിജിലൻസ് അഭിഭാഷകൻ്റെ വാദം. എന്നാൽ സ്വാതന്ത്ര്യദിന ക്വിസിൽ സവർക്കറെക്കുറിച്ച് ചോദ്യമെഴുതിയ അധ്യാപകനെയും തിരുവനന്തപുരം കോർപറേഷൻ വിഷയത്തിൽ കത്തയച്ച അണ്ടർ സെക്രട്ടറിയെയും സസ്പെൻഡ് ചെയ്തത് എന്ത് നടപടിക്രമം പാലിച്ചാണെന്ന് കോടതി ചോദിച്ചു. എഡിജിപി അജിത് കുമാറിനെ സസ്പെൻഡ് ചെയ്തതും ചൂണ്ടിക്കാട്ടിയ കോടതി, സർക്കാരിൻ്റേത് ഇരട്ടത്താപ്പാണെന്ന് വിമർശിച്ചു.

ഉപഹർജി ഉത്തരവിനായി മാറ്റി

ഡോ. റാമിനെ ജാമ്യത്തിൽ പോകാൻ ഡിവൈഎസ്പി സുധീർ കല്ലൻ സഹായിച്ചതിനെയാണ് കോടതി പ്രധാനമായും വിമർശിച്ചത്. ഉയർന്ന ഉദ്യോഗസ്ഥർ ഡിവൈഎസ്പിയെ രക്ഷിക്കാൻ ശ്രമിക്കുകയാണെന്നും നിരീക്ഷിച്ചു. 

അച്ചടക്ക നടപടിയെന്തെന്ന് കോടതിയെ പഠിപ്പിക്കരുതെന്ന് കഴിഞ്ഞതവണ കേസ് പരിഗണിച്ചപ്പോൾ ആഭ്യന്തരവകുപ്പിന് കോടതി താക്കീത് നൽകിയിരുന്നു. ഉദ്യോഗസ്ഥൻ്റെ വീഴ്ച ചൂണ്ടിക്കാട്ടി നിതിൻ രാജിൻ്റെ മാതാപിതാക്കൾ നൽകിയ ഉപഹർജി ഹൈകോടതി ഉത്തരവിനായി മാറ്റിയിരിക്കുകയാണ്. കേസിലെ മുഖ്യപ്രതിയായ ഡോ. റാം നിലവിൽ ജയിലിലാണ്.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: Kerala HC slams Home Department for not suspending DySP Sudheer Kallan in Nithin Raj case.

#Kvartha #KeralaHighCourt #HomeDepartmentKerala #AnjarakandyDentalCollege #NithinRajCase #JusticeABadharudeen #DySPSudheerKallan #MalayalamNews #KeralaNews #AmmuNews