കൊച്ചി: (KVARTHA) നടി ഹണി റോസിനെ ലൈംഗികമായി അധിക്ഷേപിച്ച കേസിൽ റിമാൻഡിലായിരുന്ന വ്യവസായി ബോബി ചെമ്മണൂരിന് ഹൈകോടതി ജാമ്യം അനുവദിച്ചു. ജസ്റ്റിസ് പി വി കുഞ്ഞികൃഷ്ണന്റെ ബെഞ്ചാണ് ജാമ്യാപേക്ഷ പരിഗണിച്ചത്. കോടതി ബോബിയെ രൂക്ഷമായി വിമർശിച്ചെങ്കിലും ജാമ്യം അനുവദിക്കാമെന്ന് വാക്കാൽ സൂചിപ്പിച്ചു. 

ജാമ്യാപേക്ഷ പരിഗണിച്ച ഉടൻ പ്രതിഭാഗം അഭിഭാഷകൻ ജാമ്യം അനുവദിക്കണമെന്ന് ശക്തമായി വാദിച്ചു. ബോബി ഇതിനകം ആറ് ദിവസം ജയിലിൽ കഴിഞ്ഞെന്നും, പരമാവധി മൂന്ന് വർഷം വരെ തടവ് ലഭിക്കാവുന്ന വകുപ്പുകളാണ് ചുമത്തിയിട്ടുള്ളതെന്നും, ഈ കേസിൽ ഒരു ദിവസത്തെ റിമാൻഡ് പോലും ആവശ്യമില്ലെന്നും പ്രതിഭാഗം വാദിച്ചു. 

പ്രോസിക്യൂഷൻ ജാമ്യത്തെ എതിർത്തെങ്കിലും, പൊലീസ് കസ്റ്റഡി അപേക്ഷ പോലും നൽകാത്ത സാഹചര്യത്തിൽ എന്തിനാണ് റിമാൻഡ് ചെയ്യുന്നതെന്ന് കോടതി ചോദിച്ചു. സമൂഹത്തിന് ഒരു സന്ദേശം നൽകണമെന്ന പ്രോസിക്യൂഷൻ വാദത്തോട്, ഇതിനോടകം തന്നെ സമൂഹം അത് മനസ്സിലാക്കിയിട്ടുണ്ടെന്ന് കോടതി പ്രതികരിച്ചു. വാദപ്രതിവാദങ്ങൾക്കു ശേഷം കോടതി ജാമ്യം അനുവദിച്ചു. ഉച്ചകഴിഞ്ഞ് മൂന്നരയ്ക്ക് വിശദമായ ഉത്തരവ് പുറപ്പെടുവിക്കാമെന്നും കോടതി വ്യക്തമാക്കി. 

ഹണി റോസിന്റെ പരാതിയിൽ കഴിഞ്ഞ ബുധനാഴ്ച അറസ്റ്റിലായ ബോബിയെ പിറ്റേന്ന് എറണാകുളം ഫസ്റ്റ് ക്ലാസ് ജുഡീഷ്യൽ മജിസ്ട്രേറ്റ് കോടതി 14 ദിവസത്തേക്ക് റിമാൻഡ് ചെയ്തിരുന്നു. വെള്ളിയാഴ്ച ഹൈകോടതിയിൽ ജാമ്യാപേക്ഷ നൽകിയെങ്കിലും അടിയന്തര പ്രാധാന്യമില്ലെന്ന് കണ്ട് പരിഗണിക്കുന്നത് ചൊവ്വാഴ്ചത്തേക്ക് മാറ്റിവെക്കുകയായിരുന്നു. വ്യാഴാഴ്ച മുതൽ ബോബി കാക്കനാട് ജില്ലാ ജയിലിലാണ്.

ഹണി റോസ് നൽകിയ പരാതിയിൽ തനിക്കെതിരെ തുടർച്ചയായി ലൈംഗികാധിക്ഷേപവും അപകീർത്തികരവുമായ പരാമർശങ്ങൾ നടത്തുന്നു എന്ന് ആരോപിച്ചിരുന്നു. റിമാൻഡിലായി ആറാം ദിവസമാണ് ഹൈകോടതി ബോബിക്ക് ജാമ്യം അനുവദിച്ചത്. ജാമ്യ ഉത്തരവ് പുറത്തിറങ്ങുന്നതോടെ ബോബി ചെമ്മണൂർ ജയിൽ മോചിതനായേക്കും.

#BobbyChemmanur #SexualHarassment #KeralaCourt #BailGranted #HoneyRose #CrimeNews